محمد الصاوى: مشهد اباحة - شعر




مشهد اباحة - شعر 

بقلم: محمد الصاوى 


ومن جلد الشجر نابي
كتير متعلم التجديف
سهرت الليل وكان نابي
بتتحمل يا درس خفيف
وكان نفسي اقولى سؤال
وكنت منين ..؟
وانا زيك
لكن بينا كتير ف الشكل والمضمون
ولما عليك بدأت أهون
طردتك م الشجر للريح
ودلوقتى بتبكي الدم ع الفرقة
ولابس ف الميدان خرقة
ولسه القطن قلبه نضيف
للي سكناني وساكنها الف مارد م السماسرة
واللى طردانى وطالعها اللي شانقني بمنصه
واللى رافعه ع اللي باقي مننا حبه أباطرة
يا نبليون الغبي
البلاد اللى تأمن نفسها ف أحضان جنابك
عندنا ف بلدنا قالوا
إنها باعت شرفها
يعني مش حره وعفيه
والعنين جواها كسره
والايدين المتدارية م النسيم
والشفايف اللي يعشقها النديم
كل حاجة فيها راجفه
وزعونا حته حته بالبطاقة
وازروعنا فوق نياشينكوا البليدة
واوهبونا عماله لبلاد الصداقة
واصرخي فينا الفضيلة
علمينا كمان ف تعليم الاوطنة
واحصدينا زي ما يحلي لجنابك
واللى يقدر يوم على رشوة ميزانك
يزرعولنا النهضة فى شوارع بيظانطا
يا بيظانطا
ياللي حواريكِ وشوارعك
لسه صايبها العمي
ياللي دستورك وشارعك
لسه هيعيش إنما
الحية لسه فايته تلاميذها الديابة
والعقارب والكلاب
عامله ليه على روسنا سادة
وليه بنحضر الف مره ف العزا
ولسه بردة القهوه سادة
ولسه بردة النور زيادة بس شاحح
واللى راح من بين إيديكي يا إزيس
إختارتي ليه
من بين 13 عريس
الف حسرة
الف نصره
للي طالع للسما
وما شافش نيلك
رامي ملحه ع الغلابة
والمبادئ واللى بادئ
واللى كان بالدم صادق
تاجروا بينا فوق مشاريع لصطفاف
كسبوا أحلام التخلف بالهتاف
شوفتوا أكتر من كده مشهد إباحة
حاحا حاحا
لسه بردة ف القصايد
رافضة الصراحة
والوقاحة
علمي قلبي البجاحة
لو ماكنش أدبنا نافع
لو ماكنش الصوت رسالة
يبقي بايخ .. طعمه مايع
تبقي لمتنا وكلامنا والقصايد
كلها دخلت مصايد
وإحنا موتنا .. جوه صوتنا
والفجر بيكسر جناحة
وفاتني ضايع





شارك المقال

فيس بوكتويترجوجل +


الإبتساماتإخفاء