مصباح المهدى: قصائد متفرقة | ورقة شعر

9

قصائد متفرقة | قصيدة

مصباح المهدى 



(1)

بتبدأ نهارها بطابور ذنب ساعه
وتقطع في تورتة أسى كل ساعه
منين تييجي كلمة حبيبي وحبيبتي
أكيد إنتي ستي وحبيبتي المُطاعه

(2)

نويت ألتزم بالسقوف والحيطان
واركّب لراسي شريط الأمان
نويت أبقى طيب ما ازعّلش حد
واصلِّي واسلّم على أي حد

(3)

العلاج اللي يقدر عليه حد زيّك
نص قرص اسبرين
تبلعه يبقى رحلة علاج بره مصر
تنقعه بعد حبّة دُعا يبقى هيصه
المرض للي عنده من الوقت ساعه
وعنده استطاعه
وله يا جماعه بديل لو تداعى
عليه المرض والفّلس والجنون

(4)

أنا التور يقولوا : احلبوه ، يحلبوني
أنا البصمجي الفذ قد بصّموني
أنا اللي اتخذت القرار بالفرار
أنا الردّة عن كل طيب جميل
أنا المستحيل اللي أصبح ذليل
أنا الإنفتاح السداح العليل
أنا الزاد منعت الولاد يطفحوه
أنا راعي هذا الفساد أو أبوه
أنا التور يقولوا : احلبوه ، يحلبوني

(5)

المعزّ ..
الصقلي اللي خلاه إله
وبقانون الطوارئ ، قانون الاشتباه
إنت شكلك مريب يُستحَب اعتقالك
ولو أنصف المنصفون اغتيالك
ولو جينا للحق
إنت وعيالك
خطر ع الجميع
العَوّز ..
مسئولية فقير مش إدارجي
المرض ..
مسئولية جهاز المناعه
أعلنوا في الإذاعه
إن هذا الوطن للي يقدر يشيل
يرجي إعادة شحن البطاقة