ندا أحمد حجازى: أفيونة الكسل




أفيونة الكسل 

بقلم: ندا أحمد حجازى

الحمد لله على نعمة الكسل حمدًا كثيرًا طيبًا مباركاً فيه. 

ولم العجب!!.. فقد استشعرت أن الكسل نعمه، بل ومن أهم النعم التى قد يحظى بها شخص ما.

الكسل يفعل بى مايفعله "الكوكاين والخمور وسجاير الـ LM أزرق والاحمر والحشيش وعلب الكوله" بأصحابهم  وعلى سبيل السرد وليس الحصر استعرضت بعضًا من هذه النعم فى نقاط.

1- لو شوفت صرصار ممكن أجرى. بس لو مكسله وبردانه هابتدى أستوعب إن الصرصار حشره وإن أنا "بنى ادم"..  أنا أقوى منه هو أصغر وأضعف.. هو حتى لو مشي عليا أكتر أذيه ممكن يسببهالى هى إنى أقرف منه.. طب أقرف ولاَّ أقوم من تحت البطانيه وأبرد؟.. لا يبقي أقرف وبوصل للنتيجه دى بشكل مرضي فى النهايه عشان الكسل إنتصر.


2- لو حد مزعلنى وعايزه أعاتبه وأنا مكسله أفكر.. هاعاتبه أقوله إيه فأبتبدى أفكر التفكير الأسهل إن عتاب الندل إجتنابه وباقوم ساكته والكسل بينتصر!.


3- لو مرتبطه وحبيبي مزعلنى وجه الزعل فى لحظة كسل باقوم أتخيل يعنى فى الأخر هنفضل مقضينها من غير جواز؟.. طب ماهو جه قدامه كام مليون فرصه إنه يكمل للخطوه دى ومكملش.. وأفضل أفتكر.. كل بنت كلمها وكل لحظه ضايقنى فيها وكل غمزه غمزها لبنت تانيه وقالى إن "عينه إنطرفت" وفجاه "بينطرف كله على بعضه فى عينى" وباقوم محركه ايدى بحركه بطيئه على زرار كى بورد الاب وعملاله بلوك يختصر كل سنين النكد الجايه الى هاكسل اقضيها..


4- لو شايفه قدامى حاجه غلط بتحصل هاكسل أقوم لها وهاختصر على نفسي إجابات الأشخاص الى طالعه من مؤخرتهم  والفرهده الى بتفردهدها منهم وباروح اقولهم انتو صح، مع علامة لايك كبيره  بصباعى الكبير فى الهوا كده.


5- بكسل أكل..  اه والله باكسل أمضغ  وباكسل أبلع وبكسل أحَضر أكل أو أطلب أكل أو أفكر فى الأكل.


6- بكسل أشتغل وبكسل أرد على المدير والعملا  وده بيدينى راحه نفسيه طول اليوم.


7- بكسل أفكر فى الأسئله الوجوديه الى فاشخه دماغى.


8- بكسل أشوف الحقيقه وأفهمها  وبكتفي بسطحيات الأمور يعنى..  ممكن فى الوقت ده من السنه أكسل أسبح  على حد فاديله ايدى يسبح عليها عادى، بس يركز فى العد.. هو عشان انا مبعدش هاكسل اعد !.


9- بكسل أتناقش ف مشاكل "الدايت" ومشاكل "الفلوس" ومشاكل "الموت" وفى إن فى مشاكل أصلا وفى انى مكسله عن المشاكل.


10- بكسل اقرأ حاجه لأخرها فبقلب من أول صفحتين وأخر صفحتين وبلاقي كتب كتيره لسه مقرتهاش.. بعد وقت بقي أتسلى فيهم.


11- بكسل أتفرج على التليفزيون أو أفتح الفيس بوك فبحافظ على عينى.


12- بكسل أحكى اللى حصل فى موضوع ما فبرميه فى الصندوق الاسود فى دماغى وبنساه أسرع.


13- بكسل أختار لبس فبلبس ستارة الصالون وأنزل وباستخدم "الاباليك" كاكسسوار.


14- بكسل أكتب فكتبت الكلام ده إستبن للقرايه فى وقت ما الكسل يمنعى عن الكتابه.





شارك المقال

فيس بوكتويترجوجل +


الإبتساماتإخفاء