محمد إمام: صالونات - شعر



صالونات - شعر

شعر: محمـد إمـام



بالنسبة لكل خيالاتك
عن حفل خطوبتكم
و عن بيتكم
و كل قصيدة عن عشقك
نويت تهديها
يوم فرحك
للبنت الي حبيتها
و لما ملّتك .. سابت
بالنسبة لمن كانت
ف يوم انت اللي خليتها
رقم واحد
احب اقولك انه خلاص
مفيش خيالات
و لا حفلات
مفيش حاجة ف يوم ترجع
من اللي فات
و لما هتيجي تتجوز
هيبقى غالبا صالونات
مفيش اشعار
هتبقى المسالة دايما
نقط تقييم
عشان تختار
هتبقى القصة بالاشكال
و بالأوزان
و بالأطوال
و لون العين
خلاص فاتت حكاية الشخص
و الارواح
معادش يهمك الا تكون
جسد مرتاح
و يوم فرحك
مفيش حبيبين
هتبقى عريس
و هيا عروسة مش اكتر
تخش القاعة تتمختر
بماجدة الرومي او بهشام
و رقصة سلو
ما بين بدلة و بين فستان
من الآخر
هتفرح فرحة متعادة
على ذوق الدي جيه البايخ
على كيف البشر إلّاك
و إلا قلبك الشايخ
(صحيح اهل الهوى مساكين)
و اهل الحب بالعِشرة
مداقوش عمرهم ابدا
حلاوة الحب للعاشقين
و بالنسبة لمن هتكون
رقم واحد
احب اقولك انها مهما حبيتها
هتفضل برضه رقم اتنين

شارك المقال

فيس بوكتويترجوجل +


الإبتساماتإخفاء