وسام عثمان: نعم للتحرش

نعم للتحرش

بقلم : وسام عثمان


أيوه نعم للتحرش ,, مش انت كده جدع
أيوه ,, برضه نعم للتحرش ,, لو فاكر دي المُتع
شجع نفسك واتحرش خليك واد جرئ
وسيبني بأختك أتحرش بلاش خُلْقك يضيق
ياجدع مش هي دي الرجوله 
ما أنا ذيّك برضه راجل
لوحد قالك ده إختبار فحوله
ما تسبني أجرب في أختك ياراجل
الله !! زعلت ليه؟؟
عشان أختك ولا عشان دوَّختك
ولا عشان قلت ,,, ياراجل
ولّا افتكرت لو انّي بأختك اتحرشت ,, مش حتبقى راجل
طب هو ده اللي همك ,,, وما فرقش معاك أختك
طب إيه رأيك ,,, لو تخليها أمك
الله !! الله!!  زعلت تاني ليه
ما اللي عليه دين لازم يوفيه
أمك ,,, أختك ,,, بنتك ,,, مراتك
المهم أنا عايز أتحرش وخلاص
المهم انا عايز أتحرش وخلاص
خلي بالك مش أنا اللي بقول
ده كلامك بس بيرُد فيك علطول
بس شكلك فعلاً مش همك
لأنك لسه بتتحرش بأُمك
بتقول يا ناس هايج ومكبوت
طب انت كده استريّحت ياكتكوت
ده حتى فين المتعه والراحه
بطريقه مليانه بجاحه
انت فاهم بقولك ايه ؟؟  ,,, ولا دماغك مش فيك ؟
فاهم أنا عايز منك ايه ؟؟ ,, ولا انت عقلك ناسيك؟
عقلك خلاص ,,, مش فوق في مُخك
عقلك خلاص ,,, بقه تحت كرشك
هو اللي بيمشيك ,,, هو اللي بيفكّرلك
حرام أقولك ياحيوان ,,, الحيوان أشرف منك.