محمود نبيل العيساوي: كسوف الروح - شعر







كسوف الروح 

بقلم: محمود نبيل العيساوي


إهداء 
لكل اللي ملوش إهداء 
وكل بنية ظنت إنها سطر في قصيدة شعر من نسل السهر 



الشعر شحات ابن ناس 
بيشد روح الغرقانين في اللوم 
الشعر أطعم م العسل 
وشروط سطور العاشقين مُرَّه 
علشان كده ، عاوزك جبل
عاوزك جبل 
مش زي صاحبي اللي اتخبل 
لما انتهى بينا السمر 
عاوزك قمر 
يخدم عليكي الليل 
السما 
تصفا عشانك تتنتشي :
( روحي إليكِ بلا خجل )
حضنك دفا 
وأنا والشتا أشواط 
بندوس في بعض بذكرياتنا الكافرة بلقانا 
نروي أرواحهم عياط 
عاوزك رباط 
( واغرثي فيَّ الأمل ) 
زيني قليبك وفا 
ردي الحنان اللي اتنسف 
مش زي أبويا اتكسف 
( من أوجهٍ روت العدم  ) 
لاجل الثراء المحتمل 
بلد 
متصلحش لفقير 
ولا يرضى بيها الأغنيا
لو كان هيهديها الضمير 
كنا عشقنا الأوليا 
( وكسونا عري الصيف تباريح الشتا 
مليون بنية من دموعك دمعت 
واشتاقها حضن اشتاق لحضن اشتقتله 
مليون عليل يخشى الشتا 
مشقوقله فيها الذكريات فهتقتله 
أنا لما جاني العمر ملفوف بالعدم 
مزعت توبه الأسود الحامي 
ولباس شعوري ببكرة بدري غزلتله
( لكن هذا الغد قد راقت له )
دمع الولد 
دم النيات 
وكسفة الروح من صبرها 
ع الاغتراب 
والاضطراب 
هيلو التراب 
على أي شارد م الفؤاد



شارك المقال

فيس بوكتويترجوجل +


الإبتساماتإخفاء