بهاء حجازي: صوفي نار رئيسة جمهورية


صوفي نار رئيسة جمهورية


بقلم: بهاء حجازي


هذا المقال هزلي ساخر، ولا علاقة له بالواقع ولا علاقة له بكشري أبو طارق. 

أنا كنت راكب جنب السواق في الميكروباص، وواضح جدًا إنه مسطول، فنفخ في وشي حرفيًا وداني ماليزيا، وقعدت مع مهاتير محمد، وبعد ما فوقت سألني: هو ماتش مصر وكوت ديفوار إمتي؟ 

بصتله باستغراب وقولت له: ويلعبوا ليه؟ 

قال لي: مش النهاردة نهائي افريقيا 2006؟ 

قولت له: لا النهاردة نهائي كاس العالم 2002؟ 

هذا الرجل فاته الكثير أهمهم على الإطلاق هو السيدة موضوع المقال الذي سنتحدث عنه!. 

أستاذي الفاضل، أنا عارف إن اللي شدك تدخل تقرأ هو اسم صوفي نار (وشهرتها صافيناز على رمش عيونها) مش اسمي، ودة شيء لا يضايقني بالمرة بالعكس، ده يقهرني. 

تفتكر عزيزي المواطن لو الأستاذ صوفي نار (إشمعني عكاشة بيقول الأستاذ ريم ماجد) بقت رئيسة جمهورية، صوفي نار اللي هزت عرش كل حاجة في الحاجات بفيديو مدته 4 دقايق، في حين إن مرسي قال خطبة بدأت في يوم وانتهت في يوم تاني، ومهزش غير الكرسي اللي قاعد عليه. 

الموضوع قد يكون ساذج وسطحي (لا دا هو أكيد كدا)، ولكن خلينا نشوف إيه هي الفوائد، وإيه هي المَضَار ( قال مَضَار قال) من إنها تكون رئيسة جمهورية، وإنت تحكم بنفسك. 

أولًا: بالنسبة لموضوع انشقاق الصف والمصالحة مش هنبقي محتاجين نوحد الصف، مصر كلها ستهتف باسمها، وبعدين مش هيطلع واحد يقولك إنه مش عارف اسم رئيس الجمهورية، زي ما بيحصل مع رئيسنا عدلي مسعود، لا طبعًا كله هيبقي حافظ، العيل دلوقتي قبل ما يقول بابا وماما بيقول صوفي نار، ثم إنها مش هتحتاج حد يطبلها اللي بيحتاج حد يطبله غالبًا ما يكون شخص محروق (يعني مولع)، أما صوفي فهي اللي هتخلي الشعب يولع.

ثانيا: بالنسبة لموضوع جنسية والدا (يعني أبوا) المرشح، فاحنا بقى هنلغي الشرط دة، ودة يتيح لواحد زي حازم صلاح أبو إبراهيم إنه يترشح، لأن صوفي نار أصلا أرمينية، وده هيخلي السلفيين يشاركوا في الحياة السياسية، وبطمّن الليبرالين إن صوفي نار هتكسب يعني هتكسب، ودا هيحل أزمة عزوف الشباب عن الانتخابات.

عاوز أقولك إن احتمال يخلوا الانتخابات بتَذَاكر. بالنسبة لموضوع التعليم فاهيحصل فيه طفرات يا أستاذي الفاضل..

أولًا بالنسبة للتاريخ، العيال هتحفظ جزئية تاريخ مصر الحديث صم، ليه؟ 

لأن اللي هتسطّره صوفي نار..

وثانيًا ودة الأهم هنعمل مسابقات أوائل الطلبة واللي هيكسب هيقضي ليلة مع الريس، وشوف بقى المستوي الدراسي للطلبة، هيبقي عندك 50 زويل، و50 مجدي يعقوب، و50 سبكي و50 متحرش (لاحظ التكرار بين السبكي والمتحرش يوضح المعني ويكويه)، أضف إلى إنجازات التعليم إن العيال هيحبوا الفصول ماهي صورة الريس هتبقي متعلّقة في الفصل، وبالنسبة بقي للتربية الوطنية اللي محدش بيفتحها هيبقي عليها إقبال تاريخي، ليه؟ 

سألتني ليه... هقولك لأن بيبقي فيها إفتتاحية بيكتبها رئيس الجمهورية. 

موضوع الإعلام بقي فحدث ولا حرج، هيبقي عندك إعلام بجد، إعلام يخلو من التطبيل، أولًا ودا طبيعي. فيلم القشاش هيتحط في كلاسيكيات السينما، والقطر القشاش المعفن ده اللي بيوصل الصعيد في ست ساعات ضوئية، هيبقي مكيف، أنا مش عاوز أخوض في تفاصيل، اللي عاوزين نعمله حمله للست دي علشان تترشح ونسميها يا بو زلومة وصدر وباك فوضناك ضد أي حاجة، وأنا من مكاني هذا بطالب الأخت صافيناز بأنها ترتدي نضارة وتطلع تقول بيان للناس هيتذاع على قناة شعبيات برعاية الحاج حنفي محمود حنفي.

لو سألتني إيه علاقة صوفي نار بالرئاسة...؟ هقولك إيه علاقة عزمي مجاهد بالإعلام؟ وإيه علاقة أحمد مرتضي منصور بمجلس الشعب؟ وإيه علاقة السبكي بالسينما؟ وإيه علاقة بريطانيا بالطيارة الروسية؟،،  وايه.. وإيه.. وإيه وإيه إيه...!