هبة كامل: ياحلاوة.. عملوا عيد حب


يا حلاوة عملوا عيد حب!!


بقلم:هبة كامل 


من كام يوم احتفلت مصر بعيد الحب يوم 4 نوفمبر، ولإننا شعب عاطفى، ومشاعره أوفر و زى ما هو واضح إن حتى إدارة البلاد ماشية بالحب، وبالحب اتجمعنا، والدنيا هتسمعنا وكده لا نكتفى بيوم واحد فعملنا يوم لوحدنا.. خاص بينا إحنا.. غير اليوم العالمى لعيد الحب اللى هو في الأصل 14 فبراير.

مالك؟ مصدوم ليه؟ آه وربنا فيه عيد حب تانى وهدية تانية..

حاسة بيك والله..

هقولك كده بسرعة مين اللى عمل يوم عيد الحب المصرى:

دي كانت فكرة الأستاذ مصطفى أمين، وسببه حكاية طريفة جدآ.. "لما خرج الأستاذ مصطفى أمين من سجنه فى يناير 74.. كان ماشي في حى السيدة زينب، وبالصدفة كان أمامه نعش لميت ماشي في جنازته 3 أشخاص! طبعًا الأستاذ تعجب جدًا؛ إزاى الحال ده يكون فى حى زي حى السيدة زينب المشهور بالجدعنة والشهامة! و لما سأل عرف إن هذا النعش لرجل عجوز جدًا.. قد جاوز السبعين، وأنه لم يكن يحب أحد، فلم يجد من يحبه.."

بس يا سيدى، ومن هنا فكر الأستاذ مصطفى فى فكرة يوم الحب، أو عيد الحب المصرى حتى يكون يومًا لكل مصري.. يسترجع فيه نفسه في علاقاته مع أصدقائه، أهله.. حتى يصل وِدًا قد انقطع.. وهكذا.

جينا إحنا بقى وعملنا إيه؟ حوّرنا الليلة كلها وقولنا عيد حب ومحبين وهدايا بين الجنسين ودباديب وقلوب حمرا وكده.. والله بقى لو حضرتك نسيت تجيب هدية أو تقول كل سنة وإنتي طيبة يا حبيبتى.. بقدرة قادر يتحول عيد الحب لعيد النكد والخصام آه.. هو كده.. يا إما بقى تنزِل أوبشن يرن جوه حضرتك فى كل مناسبة يفكرك بالهدية والكلام الجميل!!

كل حاجه إتقسمت، وعملنا وقت مخصوص لمشاعرنا لما الحياة أصبحت مملة وبتعدي بالعافية..

أنا مش شايفة إنه يلزمنى يوم مخصوص أقول فيه للإنسان اللي بحبه... بحبك، أو عشان أقرب من أهلى وجيرانى وأصحابى..

خلاص خصصنا مواعيد لمشاعرنا وسعادتنا؛ إمتى نخرج؟! إمتى نحب؟! إمتى نتصدق أو نكرم فقير؟ّ! حتى ده خصصنا له وقت محدد فى السنة..

مش مصدقنى؟ تعالى.. هقولك شهر رمضان يا سيدى، وكمية إعلانات إتبرع، وتصدق وكمية الخير اللى بيتعمل فى الشهر ده لو اتوزعت صح هتكفى السنة كلها.

يوم اليتيم أول جمعة من شهر ابريل.. مين قال؟!! بالذمة فى حاجة إسمها كده؟ اليوم ده كل الناس مهتمة باليتيم وألعاب وهدايا وحلويات وملابس كتير بزيادة، حتى الإعلام يفتكرهم لما يقرب اليوم ده وبعد كده ولا كلمة، مفيش مرة مجموعة من الشباب قسموا وقتهم وراحوا يوم فى الإسبوع لدار أيتام، حد يعلم دين إسلامي.. دين مسيحى رياضة عربى علوم أى حاجة، بالذمة مش زيارة يوم كل إسبوع مش هتكون أحسن بكتير من التمثيل اللى بيحصل في يوم اليتيم ده ونروح ناخد سلفى مع الاطفال وخلصت كده الليلة.


بالاستدلال العقلى وعشان ما طولش عليك هتلاقى نفس الكلام على مستشفى سرطان الاطفال، دار المسنين أقولك على حاجة حتى مصابين وشهداء ثورة يناير ماحدش يعرف عنهم حاجة ولا بيسأل ولا نعرف مكانهم حتى، محدش يزعل مني أنا قصدي مواسم الاهتمام ومليش في السياسة !!

نكمل بقه باقى تقسيم المواسم اللى نزل على مشاعرنا، تعالى لفكرة يوم الخميس ولا ليلة الخميس.. أيوه بقه جينا للكلام الصح قولي يا أستاذة قولي.. ده كلام عيب على فكرة.

مش اللي بيحصل، لا طبعًا عيب إننا وصّلنا المشاعر للتقسيم ده.. هقولك أنا على سبب الليلة ديه من الأساس إيه والرمز ليها ليه؟..

جدتى قالت لى يا بنتى ليلة خميس إيه وجمعة إيه؟ ده جدك الله يبشبش الطوبة اللي تحت راسه لياليه كلها خميس.. وهى يابنتي المشاعر لها مواعيد.. كل الحكاية إن حفلة أم كلثوم كانت كل خميس من كل إسبوع تقريبًا، و كان الشعب مابين ناس بتروح تحضر الحفلة أو ناس بتسمعها عبر الأثير ــ حلوة الأثير دي ــ ويسهر مع صوت الست ويتسلطن ويسلطن اللي حواليه عشان صابح جمعة أجازة بس!

هى ديه الليلة المشهورة بليلة الخميس فى حد يعمل كده، يخصص وقت لمشاعره وتعبيره عن الحب؟! كل يوم هو عيد حب ما دمنا فى قرب من نحب، كل يوم هو عيد حب فى همهمة أمك بالدعاء لك، كل يوم هو عيد حب وأمان فى حياة أبوك الشقيان التعبان اللى عاوز كل يوم تقوله كل يوم وإنت طيب، كل يوم عيد حب ما دام هناك من هو مهتم لأمرك و من يجود بالسؤال عليك ومن تستشعر فى قربه بالراحة والهدوء، كل يوم هو عيد حب طول ما إنت مبتسم بعيدًا عن أى ضغط ومشاكل، و الدنيا كلها تهون مدامنا فى قرب من نحب وعلى رأى الست.. ساعة فى قرب الحبيب.





شارك المقال

فيس بوكتويترجوجل +


الإبتساماتإخفاء