مصباح المهدى: يرجي إعادة شحن البطاقة | ورقة شعر





يرجي إعادة شحن البطاقة | قصيدة 


بقلم: مصباح المهدى

1-

المقابل كيلو لحمة و100 جنيه
الغلابة يدوا صوتهم للسفيه
لسه فيه ف الجعبة خيبه
للسفيه : ان يحدد شكل أيامنا اللي جايه
أغلبيه بدون معارضه
كوره في العارضه المعارضه
والغلابه :
بره تشكيل الفريق


2-

 كان في إيده يكون حرامي
كان في إيدها
تكون مرات صاحب السعادة
قهوة من غير بن ساده
للشريف
كان في إيده رغيف مدعم
نفسه يبقى رغيف حواوشي
كان في جيبه جنيه مقطّع
نفسه لو بالزق يمشي
كان في ودنه صوت مراته
نفسي ترجع مره شايل
كل مره تقول يا مايل
كل مره تقول يا خيبه
كان ف إيدك
تبقي واحد من ولاة الامر
واحد عنده هيبه


3-

 بعد طرحة وجلابيه
طرحة بس وجوز شراب
الأمل ف اللفة شاب
وانتي شابه 
شاربه إيه خلاكي صالبه العود يماني
والولاد
من غلب فيروس سي لفيروس غلب تاني
وزّعوا بينهم قناني الصبر وانتي بترقصي لهم
ع البلاجات ترقصي لهم
و ف مارينا وشرم برضه بترقصي لهم
رقصينا
تغرقي في البحر الاحمر
بينا وتقبي ف مارينا



4-

 كل عام والوضع طارد
طرد آلي 
للي جوه يهج برة
للي برة
ييجي يحتل المجرة
أرض/مصنع/سوق وجامع
والفتاوى وابن آوى
وانتي حرة تذيعي ماتش الكورة ذيعي
وانتي حرة تبيعي باقي الارض بيعي
إحنا لا في الكورة جبنا اجوان
ولا في السيما جبنا
لو لقينا الجبنه جبنا
لو لقينا العيش رضينا
(مصر يا اما يا سفينه)
اوصلي لبر السلامه
(يرجي إعادة شحن البطاقة)