حنان العقباوى: 0900 هو انت لسة شوفت حاجة..!





0900 هو انت لسة شوفت حاجة..!






أنا عارفة إن الموضوع ده مش جديد، بس بجد أنا فعلا نفسي أعرف مين صاحب 0900 اللي بقت بتقدم خدمات غريبة جدا، 0900 دي مش مجرد خدمة عادية، دي تقريبا بقت أسلوب حياة وبتتدخل في كل تفاصيل حياتنا. 

أول ما ظهرت أرقام 0900، كانت بتقدم خدمات الموبايل و المسابقات، ده كان مفهوم علشان وقتها النت والسمارت فونز مكانوش منتشرين بالشكل ده، فكنا غالبا بنلجأ للأرقام دي عشان ننزل لوجوهات وخلفيات ورنات لموبايلاتنا؛ وطبعا برامج المسابقات عشان حلم إنننا نكسب فلوس من الهوا. بعد كده الأرقام دي بقت خاصة  بشركات الطيران وبرامج التوك الشووالفتاوي الدينية، وده بردو عادي، مش مشكلة خالص، هي صحيح غالية شوية، وصحيح بردو إن محدش بيرد عليك عشان كده لازم تتحلي بالصبر، بس لغاية هنا والخدمات مفهومة ومقبولة نوعا ما. 

بس بقالنا كده بتاع سنتين تلاتة أو يمكن أكتر كمان، وأرقام 0900 بقت بتقدم خدمات غريبة، وده وإن دل علي شئ فهو بيدل علي الثقافة الاستهلاكية والتواكلية بتاعتنا، أي حاجة ممكن تبقي منتج وتتباع، بقي في خطوط للي عايزة تتجوز، واللي محتارة تطبخ ايه، واللي عاوز استشارة قانونية، واللي عاوز قرض حسن، واللي عاوزة تخس، واللي عندها أسئلة متعلقة بالتجميل، واللي عايز يفضفض معي إحدي الفنانات بدون ذكر أسماء يعني؟!!!

طب يا جماعة ازاي يعني الحاجات دي تتقدم عن طريق التليفون، أنا مش هتكلم هنا عن سعر الدقيقة واللطعة والكلام ده، ماليش فيه؛ أنا بتكلم عن نوعية الخدمة المقدمة، لو بنت عاوزة تتجوز، 0900 هتعملها ايه؟ دي الخاطبة بتاعة زمان كانت أوقع.

واحد عنده مشكلة قانونية وعاوز حل، هو بردو مش لازم المحامي يشوف الورق ويدرس حيثيات الموقف (حلوة حيثيات دي متنكروش)، واحدة محتارة مش عارفة تطبخ ايه، ما تكلم مامتها وللا تتفرج علي سي بي سي سفرة والشيف شربيني! طيب أنا تخينة وعاوزة أخس، 0900 هيساعدوني ازاي، هو مش لازم الدكتور يشوفني ويعمللي تحاليل؟!

أنا عاوزة قرض.. ما أروح بنك، واللي هيقوللي ربا، ممكن يروح بنك إسلامي. واللي عايز يفضفض، طب ليه اتكلم مع حد معرفوش ما اتكلم مع أصحابي أضمن وببلاش كمان! وكلو كوم والمواضيع اللي متعلقة بالتجميل دي كوم تاني خالص.. افهمها دي بقي... ازاي ؟!!! كده كتير اوي بصراحة .

والغريب إن لسة في خدمات عفي عليها الزمن بيعلنوا عنها من خلال 0900، يعني مثلا لو عاوز تروش موبايلك وتنزل ألعاب علي تليفونك وأغاني ولا البرنامج الخطير اللي بيخليك تعرف رقم المتصل من غير مايكون متسجل عندك في التليفون (آه والله هما بيقولوا كده في الإعلان). يعني هو أنا ليه اتصل بالتليفون في حين إن خدمات الموبايل متاحة لينا كلنا وكمان ببلاش نسبيا (كده كده دافعين اشتراك النت).

الكلام ده كله بيخليني أفكر وأسأل نفسي يا تري ايه الجديد من 0900 خاصة مع بداية السنة الجديدة... أكيد طبعا وحتما ولابد يبتكروا خدمات جديدة مثلا "لو عايز تكلم مراتك تسألها عاملة ايه علي الغدا... كلمنا علي 0900 واحنا نسألهالك"، "أكيد ندمان إنك مأثر مع أهلك ومش بتسأل عليهم.. كلمنا علي 0900 واحنا هنشرحلهم ظروفك"، "لو عاوز تخرج مع الشلة.. كلمنا علي 0900 واحنا هنظبطلك خروجة"،" لو قاعد زعلان.. كلمنا علي 0900 واحنا نزغزغك"، "لو مش لاقي حاجة تعملها.. كلمنا علي 0900 عشان احنا كمان مش عارفين نعمل ايه". 

يا قوم اغيثونا من الثقافة الاستهلاكية دي والاستخفاف بعقولنا ده.. ناقص ايه تاني بس يا ربي!  


    




شارك المقال

فيس بوكتويترجوجل +


الإبتساماتإخفاء