ولاء حجازي: خلاص هنا


ولاء حجازي: خلاص هنا




كلنا بنشوف العجب فى المواصلات وخصوصًا وقت الزحمة، ولنا في الكرسى اللى جنب السواق حكايات ومغامرات، يلاَّ بينا أخدكم في ركوبة في وقت زحمة، والبنات إتفرجوا وأنتم ساكتين عشان في الغالب كلنا زى بعض في الموضوع ده.

أول ما بتهل بنفسك كده على الموقف وتبص من بعيد وتلاقى كمية ناس واقفة بتقول فى سرك ( أهلاً بالمعركة، إستعنا على الشقا بالله)، مافيش عربيات في الموقف، بس أول ما بتيجى عربية، تقوم مركز عينك على الكرسى اللى جنب السواق، هو الكرسى الوحيد اللى مش كتير بيفكروا يفتحوه ويركبوا فيه، وفي الغالب كل الناس بتقف عند باب العربيه اللى ورا، تعالوا بقى نشوف أنواع السواقين ومعاملتهم للكرسى اللى ( قدام ).

خلاص هنا يا برنس، والجملة دى بتحمل أكتر من معنى، 
خلاص هنا يعنى مستنى حد تبعه هياخده في طريقه، أو خلاص هنا عشان مستنى يختار بنتين حلوين يقعدوا جنبه!.. وتقريبًا الإحتمال التانى هو الإحتمال الأكيد.

ده فيه سواق على خط رمسيس الوراق بدون ذكر أسماء (بس إسمه شادى)، شادى ده بقى حالف ورحمة الغالية مايطلع من الموقف إلا وجنبه بنتين مختارهم من الموقف ع الفرازة، بس البنات غلبانين عارفينه لكن هيعملوا إيه فى الزحمة والوقت اتأخر وعاوزين يروحوا بيوتهم فبيضطروا يركبوا، وطول الطريق بقى مشغلهم الأثنين سكرتيراته، خد عِدي لى الفكه دى، فُكي لى العشرة دى، وهىء ومىء لو البنات اللى جنبه فتحوله ع الرابع، وطبعا لكم أن تتخيلوا نظرات الناس للبنات اللى إختارهم شادى أو غيره عشان يركبوا جنبه، أكيد انتم عارفين الناس بيظنوا إيه، بس والله فيه بنات محترمات ماتستاهلش الظن السىء ده من الناس..

المهم إن الكرسى اللى جنب السواق ده حاجه فخيمه عنده، وزى ما فيه حد قال لـ أخويا قبل كده (تقريبا يا إبنى السواق بيعتبر الكرسى القدمانى ده واجهة العربية بتاعته، عشان كده لازم يركب بنات حلوه، أو رجاله بس يكونوا وسيمين برضو وشياكه)، إنتم إيه رأيكم؟.

تفتكروا فعلا السواق معتبر الكرسى واجهة لعربيته؟

ولاَّ إستغلال فى إنه يركب بنات عشان يقعد طول الطريق يهزر معاهم؟

ولاَّ بلاش نظلمهم يا جماعه ونقول إنهم بيركبوا البنات عشان يضحكوا معاهم.. 

ما جايز دى شهامه منهم إنهم عاوزين ينقذوا البنات من الزحمه ويروحوهم بيوتهم بدرى، تفتكروا؟

المهم إننا نحسن الظن وخلاص إلى أن يتم البت في الموضوع، وفي الآخر مش هنوصل للفكره، بس هتفضل دايمًا تفتح الكرسى اللى قدام وهيفضل السواق يقول لك، خلاص هنا...

شكرًا.. والسلام عليكم.


شارك المقال

فيس بوكتويترجوجل +


الإبتساماتإخفاء