ماجد عبدالله: خمره يا شيخ؟ عيب عليك في السن ده



خمره يا شيخ ؟؟ عيب عليك في السن ده 


بقلم: ماجد عبدالله




لأول مره هكتب مقال بالعاميه بس الي حصل وشفناه وقريناه خلاني اقرر اني اتكلم ببساطه بالصلاه على النبي ....

كلنا قرينا كتاب الله ومؤمنين بيه ايمان تام لا شك فيه وكلنا بنسمع لمشايخ ولتفسير القرأن الكريم وبنقرأ وبنتعمق في التفسير علشان نفهم اكتر , لكن انه يخرج علينا شيخ يدعي انه أزهري وياريت مقيم في مصر ده بيتحفنا بفتاويه من استراليا سيدني البلد الي كل شغلته فيها امام مسجد هناك ويقول ان الخمره مش حرام وان مافيش نص واضح في القرأن او السنه يفيد بتحريم الخمر ؟ 

اولا الشيخ ده اسمه ايه ؟ ايواااا سألتني حضرتك ... 

اسمه الشيخ مصطفى راشد بيقول انه واخد دكتوراه من جامعة الازهر وانه خريج كليه الشريعه بدمنهور لكن الكليه نفت ده والدكتوراه بتاعته الي حصل عليها تحت عنوان الحجاب ليس فريضه اسلاميه بردو الازهر نفى حصوله على اي درجه من درجات الدكتوراه .. 

ايه الي حصل وخلاه قلب الدنيا ؟ 

الي حصل ان الراجل ده طلع في برنامج البيت بيتك عبر السكايب من سيدني في استراليا وعمال يجادل ضد علماء الازهر الدكتور سعد الدين الهلالي استاذ الفقه المقارن في الازهر و الدكتور حسن الجنايني  الي دخل معاهم في سيجال وجابوله ادله من القرأن والسنه ان الخمر وكل ما يذهب العقل حرام بالتلاته وهو ميقتنعش ودماغه زي الصخر وبيفسر ده بأن الإسلام لم يحرم الخمر، وإنما حرم السكر، لأن الآيات التي وردت في القرآن بالكامل لم تحرّم الخمر وإنما حرمت السكر"، رادّا على المستدلين بالآيات الآمرة باجتنابها على تحريمها بأن هذا أمر بالاجتناب، وهو لا يعني التحريم، ولو أن الله أراد تحريمها لقال فيها قولا حاسما كما قال في غيرها {حرمت عليكم الميتة..}. 

طلع في قناة الحياه وبيتكلم عن نفس الموضوع بردو بس المذيع سأله سؤال جميل جدا قاله لما ياشيخ الخمره حرام انت مش بتشربها ليييييييييييه ؟

طبعا الشيخ الجليل الجميل ارتبك في الكلام ورد وقال انا مش بشربه اصل دي تربيه ...
نعم ؟؟ تربيه ايه يا شيخ ... انت فاهم الدين من اي اتجاه بالضبط ؟ 

وزي ما قال الشيخ المحترم علي جمعه إن مصطفى راشد لو لبس الملابس  الأزهريه ده مش معناه ان كلامه صحيح، واحنا مش عارفين اذا كان فعلا ازهري او لا ، ودي لعبه ان حد يلبس ازهري ويحلل الحرام ويحرم الحلال ، وده غلط.

وبالتالي كلام مصطفى راشد حول عدم تحريم الخمر كلام فاسد فإذا قلنا بعدم حرمة الخمر فده معناه عدم حرمة الزنا..

وترديدا لكلام الدكتور سعد الدين انت يا شيخ مصطفى ده اذا كنت (شيخ ) انت قاعد في استراليا علشان تأذي المصريين فتاوى لا اساس لها ... 

والله العظيم حرام الي بيحصل فينا ده .. كل شويه يطلع علينا شيخ ولا اتنين يعملوا بلبله بفتوتين تلاته يثيروا الجدل ويدخلوا الناس في حيره , وبعد الي شفته في برنامج البيت بيتك بجد تحيه للأزهر و لرجال الازهر لانهم فعلا خط الدفاع الاول والاخير في مواجهة الفتاوى من الشيوخ المزيفين ..

كلمه اخيره ... ارحمنا يا شيخ مصطفى وارحم نفسك  .. لو مش حرام فعلا اشرب انت وسيبنا احنا في حالنا ... انت هتسأل امام ربنا على فتاويك الضاله ولا نملك الا حسبنا الله ونعم الوكيل .