حنان العقباوي: يلاَّ كلنا ندخل برجلنا اليمين



حنان العقباوي: يلاَّ كلنا ندخل برجلنا اليمين


بقلم: حنان العقباوي


وإحنا علي أعتاب عام جديد كده، أكيد كلنا بنتمني إنه يكون عام سعيد علينا وبنتمني إن ربنا يحققلنا فيه كل أمنياتنا، وأنه يكون أحسن من سنين كتير عدت. 

طبعا الأمنيات دي بتختلف من واحد للتاني، فيه اللي عاوز شغل جديد وفيه واحد تاني عاوز نفسه يسافر، وفيه واحد تالت نفسه يخلص دراسة، وواحد رابع  نفسه يتجوز وهكذا دواليك.. بس أنا النهاردة في الحقيقة مش هتكلم عن الأمنيات الفردية دي، أنا هتكلم عن حاجة بقت من طقوس حياتنا اليومية، أنا هتكلم عن مواقع التواصل الاجتماعي اللي بيحتل فيها المرتبة الأولي بلا منازع Facebook.. يا جماعة دي دعوة عامة من خلال هذا المنبر إنه كلنا نغير من طريقة استخدامنا لـ  Facebook  في 2016. 

تعالوا  نعمل New Look   لـ Facebook في 2016، الـ  New Look ده بقي بيتلخص في الأتي:

1- جو العين صابتني ورب العرش نجاني وكده، يا جماعة والله احنا مش فاضييين نحسدكوا ولا عندنا وقت لكده، وبعدين خايفين علي نفسكوا أوي، بلاوش بقي تشاركونا أسعد لحظات حياتكو دي عشان متتحسدوش. أصلاً خلوا الواحد كاتم في قلبه وساكت ماحنا عارفين انكوا بتروحوا تتصوروا وتعملوا check-in  وتمشوا من غير ما تطلبوا حاجة!

2- الـ check in  بقي اللي عمال علي بطال، مش ناقص غير انه نعمل check in  وإحنا داخلين الحمام! والله ما ينفع كده أبدا يا جماعة، أنا أفهم إنك في مكان حلو فبتعمل check in، إنما مش قادرة أفهم ليه بتعمل check in  وانت في المستشفي؟! ياسيدي ربنا يشفيك ويعافيك، بس اللي أفهمه يا إما تقول إنك في المستشفي الفلانية عشان كذا وتطلب إنه  ندعيلك وأكيد ساعتها مش هنتأخر، يا إما متقولش! إنما تعمل check in  في المستشفي وتسكت، واحنا روحنا تطلع علي ما ترد علينا، ساعتها غالبا بنكون عاوزين ندعي عليك بس الضمير الحي هو اللي بيخلينا نمسك لسانا بالعافية.. آه والله زي مابقولك كده!

3- البوست اللي بتطلب فيه الدعوة أو تكتب فيه "إن لله وإنا إليه راجعون" وتسكت من غير ما تقول في ايه... برجاء التوضيح بعد كده عشان فعلا بتطلع عيننا علي مانعرف ايه الموضوع!

4- كل يوم الفجر، تكتب صلاة الفجر وقلوب كتير وتسكت!!! طب وبالنسبة لياقي الصلوات؟ فين الظهر والعصر والمغرب ولعشاء يا أفندي؟ عموما أنا ضد النوع ده من البوستات عشان إحنا مش محتاجين نعمل إعلان عن الصلاة، وبعدين يعني إحنا بنصلي لربنا مش للأخ مارك زوكربرج؟!!! اللي أعرفه لو عندك دعاء وعاوز الناس تأمن عليه وتاخد الثواب أهلا وسهلا إنما تكتب صلاة الفجر وقلوب.. إيه الرومانسية الأوفر دي!!!

5- البوستات بتاعة Best Day Ever  و Best trip Ever ، طبعا أكتر حد بيكتب  النوع ده من البوستات هما البنات، كفاية أفورة عشان خاطر ربنا يا شيخة، مش كل خروجة تبقي Best Day وترجعي تقولي محسودة!!! بطللي أفورة ومحدش هيحسدك .

6- بوستات من نوعية أخبروا أخي وأخبروا أمي والجو ده، يا جماعة الناس دي قاعدين في الأوضة اللي جمبكوا ومعاكوا أرقام تليفوناتهم، كده كده هتعرفوا توصلولهم، فبلاش تدخلونا إحنا في الأمور العائلية دي الله يكرمكو وروحوا بنفسكوا عبروا عن مشاعركوا المكنونة ليهم!

7- أخيرا وليس آخرا الألعاب الظريفة النميسة بتاعة انت شبه مين من الممثلين وشكلك هيكون ايه بعد 20 سنة وتاريخ ميلادك بيقولك ايه... عيب بقي إحنا كبرنا علي الحاجات دي والله يا جماعة. 

نهايته، يا جماعة تعالو في 2016 نحاول نستمتع  بحياتنا الحقيقية وكفانا حياة افتراضية وعزلة في شاشات تليفوناتنا، تعالوا نقول للي بنحبهم إننا بنحبهم في وشهم مش نقولهم في حياتنا الإفتراضية، تعالوا  كلنا  نعيش الواقع ونخليه أجمل!

كل سنة وانتو طيبين  









الإبتساماتإخفاء