وسام عثمان: هاي تك



هاي تك



بقلم : وسام عثمان



الإنترنت  جعل العالم قريه صغيره...قريه صغيره إيه ..؟؟!! ده بقه أوضه وصاله ... ممكن أكلم واحده في الهند , وواحد من كوالالمبور بيكلم نفس الواحده اللي في الهند  وطبعآ أنا والراجل بتاع كوالالمبور مش عايزين نعرف بعض أساسآ..  لكن مع ظهور مواقع التواصل الاجتماعي وخاصه الفيس بوك أصبح للهاي تك مذاق آخر ..وقد أطلق على هذا كله .. العالم الإفتراضي .. لأنك لاتعيش في عالمك الحقيقي بل تخرج منه ,, قد يكون هربآ ,أو خوفآ , أو مللآ ... وأيآ كان السبب فأنت في كل الأحوال تعيش مع أناس لاتعرف أغلبهم وتتبادل معهم الحديث وتبني معهم آمال وطموحات وأفكار وقد تعملون سويآ ..قد تضحكون ..قد تتشاجرون...كل هذا يختفي فجأه ..مع log out …    أو  sign out ..   أو shut down …أو غالبآ  كل ما النور يقطع ...كأنك كنت في حلم وحين إستيقظت فقدت حلمك....نأتي الآن إلى عالمنا الإفتراضي الجميل ...الفيس بوك ... وأنا هنا لن أتحدث عن عالم الفيس بوك من حيث الإعدادات ( لامؤاخذه السيتينج )  أو إنشاء حساب ( وليعاذ بالله ,, أكونت ) أو جئت لأعطيك درسآ  في التعامل معه ...حاش لله…  سأتحدث عن الفيس بوك بنظره فلسفيه واقعيه متعمقه متحجره !!!.

لما حد بيعمل حساب بيفكر وهو بيختار إسم الأكونت بتاعه إنه يكون إسم معروف سهل الوصول إليه أو يختار إسم الناس تشقطه بيه.

- أغلب البنات بتحط أسماءها الحقيقيه بس مش أغلبهم بيحطوا صورهم الحقيقيه.

- معظم المصريين مش حاطيين معلومات كامله عنهم مع إن المفروض الناس بتتعرف على بعض من خلال الفيس ده ..مش بتستخبي من بعض ,,, بس نعمل إيه.. شعب عنده حس أمني عالى.

- البنات حتموت وتتعرف على ولد ..الولاد حتموت على أي حاجه وخلاص.

- قمه السعاده لأي فيس بوكي  لما  يفتح الفيس بتاعه ويلاقي إشعارات (notification) وأجمل منظر لما بيشوف المربع الأحمر أبو رقم أبيض جوَاه بعدد الإشعارات.. ساعتها بيحس إنه مهم والناس بتحبه وبتتفاعل معاه ..كلنا هذا الرجل.

- تذداد السعاده الى القمه لما المربع الأحمر ده يظهرعلى الإنبوكس فتعرف إن حد باعتلك رساله مخصوص على الخاص ....كلنا هذا الرجل برضه.

-نظريه رفع أي بوست....أي حد يكتب أي حاجه في أي اتجاه في أي وقت ... ويرفعه .. وكله حيجيب رزقه.

- عندما تجد أحد اصدقائك قد أرسل إليك تعليق..( comment)  على بوست ليك فإعلم أنه عمل معاك واجب جامد جدآ لانه كتب وإستخدم كل صوابعه على الكيبورد  عشان يكتبلك.. أحسن من غيره بكتيير اللي بيحرك صوباع واحد بالضغط كليك شمال على (like) وقال ايه هو كده بيخدمك.
- بمناسبه ( like) نيجي بقه لفلسفه اللايك .. ودي قصتها قصه....

- واحد بيعمل لايك لمجرد إنه عارفك وبس.. وفيه واحد أو واحده بيعمل لايك لأن الكلام عجبه فعلا بس مكسَل يكتبلك تعليق عليه.
- ممكن حد يعمل لايك لحد مايعرفوش بس  إيه ؟؟.. الحد ده أكيد حتكون بنت وهو عملَّها لايك ..يمكن ..يمكن... يتعرف عليها !! 

- واحد بيعمل لايك لصحابه وده عشان يضمن إن ممكن حد فيهم يردَله  اللايك دي في يوم من الأيام ( يعني حاجه كده ذي النقطه في الافراح) ...هاشتاج عادات المصريين بين الماضي والحاضر  وربنا ما يقطعهاعاده.

- فيه ناس بقه والنيعمه والنيعمه بتعمل لايك من غير ما تقرا البوست أصلآ...هي كده كده بتحبك وفرحانه بيك . ولولولولي.

- لايك لايك مفيش كلام ..لما تلاقي حد عامل لايك وكمان كاتب تعليق .. نفسي أعملك إتنين تلاته لايك ..أو كتبلك ملييييون لايك ..وده فعلا مقتنع بكلامك اللي كتبته ,,, أو مش فاهم منه حاجه.

- لايك المحاياه .. لما واحد يعمل لايك على حاجه هو نفسه اللي كاتبها  ولما تلومه وتقول فيه حد يعمل لايك لنفسه.. يقولك عشان البوست يبقى عليه تفاعل ويعيش ...ساعتها تدرك أنه بوست إبن سبعه .. وربنا يحفظه ويديله العمر 
- لايك المليون دولار.. لما تلاقي واحد كل ساعه ينزَل نفس البوست ومفيش حد معبره أساسآ  ولو بربع لايك  ويقعد عالحال ده كدا شهووور.. .. هوً هوً  نفس البوست وبرضه مفيش فايده.. لغايه لما الحاج مارك بذات نفسه حيطلع في يوم عالفيس ويقوله إرحم أمي بقه.. لايك ياعم  ........  كده الواد ده عدًى خلاص.. أوعى حد يعمل كده مارك حيخلي فيسك شوارع.

- لايك الأهلويه .. هو أي لايك على أي حاجه أهلويه عالفيس.

- لايك الأهلويه ... هو أي لايك على أي حاجه زملكاويه عالفيس ..ماهو كله بياكل عيش على حس الرجاله.
- لايك الزملكاويه  ....... لسه ماشوفتهاش.

لايك.. كسبان كسبان.. لما تلاقي إستفتاء عالفيس ويقولك لو شايف إن بلديه المحله أقوى من ريال مدريد، دوس لايك  ولو ريال مدريد أقوى .. كومنت، طبعآ بلديه المحله حتكسب وتطلع أقوى .. والسبب بسيط إن دوسه اللايك أسهل بكتيير من كتابه الكومنت .. ودي فلسفه مثل هذا النوع من الاستفتاءات.

- لايك حتعملها حتعملها غصب عنك ..... لو بتحب النبي ؟ دوس لايك 

- لايك علشاني أنا بقى على الكلام الحلو ده ..و إبعتها لعشره من أصدقائك أستحلفك بالله، وصدقني بمجرد أن ترسلها ستسمع خبر سعيد جدآ سيفرحك ... أنا فعلا بمجرد أن أرسلتها لعشره من اصدقائي سمعت خبر أفرحني جدآ استحلفك بالله انشرها ولاتجعلها تقف عندك !!!!!






شارك المقال

فيس بوكتويترجوجل +


الإبتساماتإخفاء