هبة كامل: المولد النبوى الشريف




 المولد النبوى الشريف 






كل عام وأنتم بخير جميعًا بمناسبة المولد النبوى الشريف.. الموافق الغد بأذن الله.. يعنى بكرة اجااازة (هييييييييييه).. أهم حاجه الأجازة وأنا بقولك من دلوقتى الشعب هيضرب يوم الخميس كمان إحنا شعب يموت فى الأنتخه والتفخيد.. نقدس النوم والراحة.. آه يا بلد،
ونقعد فى البيت نسمع أفلام الشيماء، رابعة العدوية، الرسالة، الخ..
  
طبعا كلنا عارفين تاريخ حلاوة المولد وإن أول من إبتدعها هم الفاطميين، الدولة الفاطمية.. لما كانوا في القاهرة عملوا حلاوة المولد وقتها في يوم المولد النبوى لكسب ود الشعب المصرى وغيرهم من أى إستعمار مر على البلد ديه كان بيلعب على وتر الدين.. وأنت عارف وأنا عارف.. !!

فكرة العروسة بقى جت منين ..؟

هقولكم.. فى يوم المولد النبوى فى عهد الحاكم بالله..  خرج الحاكم وكان له زوجة بيحبها جداٌ فقرر انها تخرج معاه يوم المولد النبوى..

وشاهد الشعب هذا الموكب وكانت ترتدى فستان أبيض وعلى رأسها تاج من الياسمين، فقام صُناع الحلوى بصنع قالب حلوى للأميرة واخرون بصنع قالب حلوى للأمير وهو يمتطى حصانه.

هى ديه قصة العروسة والحصان ..!!

يبقى كل الهيصة اللى أنت شايفنها دي أساسها الفاطميين.. إذن  لو مع أحفادهم حق براءة الإختراع كان زمانهم مظبطين كل التجار اللى بيستغلوا اليوم ده، لكن هقولكم ايه.. أصل التجار مش غلطانين.. انتم ازاى يجليكم قلب تدفعوا 200 ، 300 جنية فى عروسة بلاستك !!!!

ليه يعنى مش صعبان عليكم فلوسكم؟

وكل ده عشان تجيبها لخطيبتك.. غير الحلويات طبعًا.. أنا مش معترضه على الحلاوة لكن العروسه ايه ده  وبعد كده لما تبقى مراتك تبقى العروسه البلاستك عامله زاى الكوبه ومش عارفه تعمل فيها ايه ولا توديها فين تلفها بكيس عشان التراب وخلاويص ع كده .. حرام ولا حلال؟.
طب أنا فاكرة وأنا صغيره أيام العروسه الحلاوة البيضه الجميله بفستانها ومكياجها الملخبط لكن كانت جميله وإخواتى يجيبوا حصان وماما تعمل مهلبيه يااااه.. أيام وفى الصعيد كانت الحلاوة لونها أحمر.. العروسه حمرا  والحصان أحمر.. أيام.


مش تقولى عروسه بلاستك وكل وحده تقعد تتباهى خطيبها جبلها عروسه بكام وطولها إيه وبتنور إزاى.. يا بنتى شوف حاجه تنفعك  يعنى يجيبلك علبة حلاوة كلها علف فوليه وحمصيه وبندقية على لوزيه اه  حاجه كده ولا أحلى وسيبى الرجيم لاصحابه..

نتكلم جد شوية.. فعلاً يا جماعه إيه علاقة المولد بكل الأشكال اللى بنشوفها الايام ديه  احتفل بالمولد لكن بطريقة تليق بمكانة سيدنا النبى عندك هو أن ذكره يلزم لسانك دائماٌ اللهم صل وسلم على سيدنا محمد ..

اتكلموا عن  احياء  سنه مهجورة، يعنى مثلا اتكلمى مع خطيبك ان سيدنا النبى كان يساعد زوجاته فى اعمال المنزل، انه كان يدلل زوجاته، كيف كان حبه للسيدة خديجه، كيف كان يدلل السيدة عائشة...

استغلى الموقف لصالحك مش تقوللى عروسة بلاستك !!..

كل سنة وانتم طيبين جميعًا 


شارك المقال

فيس بوكتويترجوجل +


الإبتساماتإخفاء