بهاء حجازي: ( شُخرم ) يربح المليون




( شُخرم )  يربح المليون

بقلم : بهاء حجازي


صباح الخير عزيزي المواطن، صباح الفل عزيزتي المواطنة، بداية في بلد زي بلدنا دي متفوتش فرصة للسعادة ومتلحقهاش، متفوتش مواصلة توصلك لمكان حلو ومتركبهاش. 

هو عموما أنا عارف إنك كدا كدا (هتركبها )، بس خد كلامي من باب  (وذكّر)  أومن باب ملئ الفراغ دول 500 كلمة ياجدع ( كان بيتطلب مني 500 كلمة في الجورنال ).

 زمان وأنا صغير مُدرّسة الرياضه قالتلي إن في مسابقة للقصة القصيرة  وعاوزاك تكتب قصة وتشارك، السؤال بقي ليه مدرسة الرياضة هي اللي تشرِف علي دا،  رغم إن ده تخصص (مُدرّسة العلوم )، الإجابة بوضوح مدرسة الرياضه هي مدرسة العربي هي مدرسة التدبير المنزلي، كانت طالعه ب3 مناظر في الفيلم ده، كانت بتاخد العيال علي المحارة وتسلمهم علي المفتاح بس غالبا المفتاح كان بيضيع فالعيال بتفضل أقفال ( وليه يازمان مسبتناش أبرياء ).

  جبت ورقه وقلم، وقلت أكتب قصة عن ايه، عن ايه عن ايه عن ايه ؟  إنه تيجي في دماغي فكرة يامؤمن، مفيش، لحد ماشوفت إعلان لمسلسل ( سنبل والمليون ) للجميل  محمد  صبحي، قلت صحيح هو لو أنا معايا مليون جنيه هعمل ايه ؟ وطبعآعلي أيامنا مكانتش لسه طلعت صوفي نار، وسبت القصه وقعدت أفكر ؟؟ وبعقلية طفل عنده 8 سنين مسكت الورقة وقعدت أكتب الحاجات اللي محتاجها .

1- أنا محتاج أتجوز الأبلة نوسة ، بس تقوم هي من أجازة الوضع وبعد كدا هتلعب... 
 ( رومانسيه ممزوجه بغباء ) 

2- عاوز فيلا تكون 7 أدوار عشان أأُجر منها 6 أدوار أعيش منهم .... ( رفاهية ممزوجه بعفن أو عاوز أعمل الأيدي الناعمة الجزء التاني ).

3- محتاج أسافر بره  سوريا أو لبنان أو إسكندرية... ( كان عندي شبه إقتناع إن اسكندرية دي تبع دول الإتحاد الأوربي ).
4- كنت عاوز أقابل نور الشريف ولحد دلوقتي مش عارف ليه يمكن لما أقابلو أعرف...( دا بيبقي بيسموه ايه ).

5- لاحظت إن المليون جنيه قربوا يخلصوا ونسيت أهم حاجة في العالم كله إني أطلع أبويا وأمي الحج 

  حطيت الورقة دي في كتاب الرياضه ونمت
، روحت المدرسة الصبح، وشوف حكمة ربنا يامؤمن الأبلة تسيب كتب العيال كلها وتمسك في كتاب العبد لله تقرأ فيه، وتلاقي الورقة وطبعآ مش هقولك علي اللي حصل، شردتلي ( بنت اللذين) قالت إن شُخرم عاوز يتجوزني، دة أنا حتي لسه مقمتش بالسلامة من الحمل، قال يعني لو كنت عاوز أتجوزها بعد ماتوضع كان عادي، ولأن المُدرسة دي  كان ليها قرايب مهمين أنا إتعمل معايا الجلاشة، دقوا مسمار كبير في الحيطة وربطوا فيه حبل بتاع 30سم وعلقوني فيه بالشقلوب، وأول مرة أكتشف إن رجلين مُدرسة الرسم حلوة  قوي ( بالمناسبة دا ينفع فكرة إعلان مع صوت فويس أوفر  " يا إلهي إنها تستعمل إيزي سويت ") , وإن الأستاذ عباس مش لابس شراب ولابس الجزمة كدا المعفن , أما البت عفاف فكان في رجلها شعر شبه الشعر اللي في مناخير عم حسان الفراش وحواجب يوسف داوود , ياه الدنيا صغيرة قوي ياشيخ والله  .

روحت البيت وكتبت في الورقة الحاجة السادسة اللي محتاج أجيبها بالمليون جنيه 

6- 10 علب لعلاج البواسير .





شارك المقال

فيس بوكتويترجوجل +


الإبتساماتإخفاء