ياسمين حسن: عن الأخطاء


عن الأخطاء

بقلم: ياسمين حسن


هنتكلم عن الأخطاء.. المسروقة بالتحديد...

أغلبنا بيعشق نفس الغلطة ..يكررها.. يفتكرها شئ لطيف أو مثال هيكون عظيم لو طبقه على نفسه..

ده مش حقيقي.. لكن بيحصل.. يعجبك موقف مع أشرف اللي معاك في الشغل فتاخد الموقف زي ما هو من غير إضافات وتطبقه على الطرف التاني في علاقتك..  وهو نفس اللي بيحصل معاكي لمّا نانسي صاحبتك تقابلك في المول بالصدفة وتحكي على موقف أو شئ حصل بينها وبين إسلام، فا تروحي واخدة الموقف بكل تفاصيله وتطبقيه على الطرف التاني في علاقتك ..

ده بيحصل من غير ما حد بيسأل نفسه ده ممكن يتناسب أصلاً مع الطرف التاني ولا لأ، أو ده مناسب لشخصيته ولا هيكون غريب..
يا ترى ده مجرد تقليد أعمى وبس؟ !!

ولا ده سببه أن الشخص بيكون مش مالك حلم فبيستمده من الناس اللي حواليه؟!!

صدقني، في كل الأحوال لو الموضوع مش منك.. حالتك.. حياتك اللي أنت عارفها؛ ساعتها مش هتستمتع.. هتكره الموقف وتفتكره وأنت لوحدك.. تلوم نفسك كأنك سرقت فكرة..

الخلاصة اللي عايزة أقولها لك ولنفسي.. كن نفسك.. اقبل الأشخاص زي ما هم مهما كانت علاقتك بيهم..

أنت وأنا وكلنا.. مفيش فينا حد كامل بلاش ..ومش في مصلحة أي طرف انه يطلع عقده على الطرف التاني..

أنا بحاول اعيش كده على فكرة..