شيرين بدران: العلاقات الناضجة



بقلم: شيرين بدران



العلاقة بين طرفين بتجمعهم مشاعر الحب، أهم سمة لازم تتوفر فيها هي النضوج النضوج  العقلي والنفسي اللي بيضمن الإستمرارية في العلاقة؛ لأن العلاقات غير الناضجة مش بتدوم كتير ومصيرها الفشل مهما طالت الايام.

قبل مانحكم عن نضج العلاقة أو لأه؟ لازم الأول نعرف اساسيات لابد من توافرها قبل الخوض فى أي علاقة، عشان لو الأساس مش سليم أي حاجة هاتترتب عليها بعد كده هاتبقى فاشلة؛ لأن مابني على باطل فهو باطل.

أولا:-  قبل ما نقبل على الإرتباط، لازم نكون مدركين لشيء مهم جدًا إننا مش بندور على الحب ؛الحب هو اللي بيلاقينا، ومش بنقع ف الحب؛ إحنا بنسمو للحب، لأن الوقوع زي ماهو متعارف عليه هو الهبوط من أعلى إلى اسفل وده بيرمز للتدني، وهذا اللفظ لا يليق أبدا بأنبل وأجمل مشاعر ف الوجود مشاعر الحب.

ثانيا :- الحب الناضج هو الحب الأبدي، اللي بيكون فى إطار ديني وإجتماعي سليم، وفى مجتمعنا الشرقي الحب الناضج هو اللي بينتهي بالزواج، الحب اللي فى النور، ولازم مايكونش في عراقيل تتصدى للعلاقة، يعني  يكون السن للطرفين مناسب، وتكون الظروف المادية بتسمح بالزواج، والظروف الإجتماعية كمان لازم يكون في تكافؤ إجتماعي وثقافي بقدر الإمكان. 

ثالثا :- الحب معناه هو الإطمئنان والأمان والإستقرار النفسي، ولازم الطرفين يكونوا مع بعض من غير أي هدف أو مصلحة، إلا تكوين علاقة سوية تدوم للأبد، سواء كان الهدف مادي أو جنسي، أو حتى هدف تكوين أسرة وبس، أو لمجرد ماحدش يفوته قطر الزواج، العلاقات القائمة على تبادل المصالح بتبقى علاقات غير ناضجة ومش بتستمر كتير. 

رابعا :- الحب الناضج هو الحب السهل، اللي مافيهوش إستجداء للمشاعر او إستعطاف أو إستغلال، والإستغلال مش بس جسدي، ممكن يكون إستغلال عاطفي كمان، اللي هو إستنزاف مشاعر الأخر دايما بخلق محيط ملبك بالدراما، وإفتعال الأزمات لإختبار مشاعر الأخر، ووضعه دايما كأنه ف إختبار.. يا جماعة الدراما وإفتعال الأزمات ده إسلوب طفولي جدا، ولا يليق أبدا بشخصيات عاقلة وناضجة وعايزة تكون علاقة  ناجحة ؛لأن الحب الناضج هو اللي بيريح البال مش بيتعبه، ولو بتفتعل الأزمات عشان تتأكد من حب شريكك يبقى مافيش ثقة، وبالتالي في شك، والشك عدو لدود جدا للعلاقات الناضجة.
طالما حبينا بعض حب ناضج ،يبقى لازم نكون واثقين ف مشاعر بعض جدا وبالنا مرتاح .

خامسا  :- الحب الناضج عمره ما بيتبني على تعاسة الأخرين، لأن الحب اتخلق عشان يسعدنا ويخلق طاقة إيجابية تنعكس على كل المحيطين، ولو الحب ده هايسبب ضرر لمخلوق، يبقى العلاقة من الأول فاشلة ومش هاتستمر وبالتالي مش ناضجة .

صفات العلاقات الناضجة.. الحب الناضج هو اللي بيعليك، وييخليك تصلح من نفسك، وتحب كل اللي حواليك، وينجحك، ويقويك ويطمنك، ويدعمك، ويزيد من ثقتك بنفسك، ويخليك تمشي لقدام  بخطى ثابتة .

الحب الناضج بيجاوب على الأسئلة مش بيطرحها يعني مافيهوش أسئلة من نوع ياترى بيحبني ؟ ياترى علاقتنا هاتستمر؟ ياترى بيخوني ؟ ياترى بجد بيغير عليا ولا بيمثل ؟ وهكذا 

م اﻷخر ؛الحب الناضج  هو اللي بيطمنك وبيزرع جواك اليقين والتأكد من مشاعر الأخر دون أدنى شك .

الحب الناضج بيصحبه  نضج عمري وعقلي وفكري وجسدي وإجتماعي، بيحوي كافة أنواع النضوج، وقبل الخوض فى أي علاقة لازم تتأكد إن في تكامل فى نضجك، وإن مافيش خلل عشان العلاقة  تستمر. 

الحب الناضج إتخلق عشان بس ينجح ويستمر لأخر يوم فى عمرك، ومش عشان يفشل ولو فشل لأي سبب فده بيكون قضاء وقدر ونصيب ربنا.

الحب الناضج هو اللي بيشبع إحتياجاتك ورغباتك، ومش بيسيب جواك أدنى إحتياج لحب لتاني يعوضك النقص، مجرد انك تعيشه مش بيبقى عندك إحتياج ﻷي شيء، وعندك رضا، وعندك القناعة الكاملة بشريك حياتك .

الحب الناضج الشريكين فيه بيكملوا بعض، وبيتعلموا من بعض وبيقوموا بعض وممكن توصل إنهم يربوا بعض من أول وجديد، دون سيطرة أو إستغلال أو فرض الرأي لمجرد إن رأي واحد فيهم يمشي وخلاص، وبيكملوا بعض مش معنى إنهم يبقوا شخص واحد لأه؛ يكونوا شخصين ناجحين وكل واحد يعوض النقص اللي عنده من التاني.

العلاقات الناضجة بتكون عميقة لأبعد مدي والسطحية والتدني لا تليق بها أبدا.. العلاقات الناضجة لا تهتم بالماضي، أو جروح الماضي، أو أخطاء الماضي، الشركاء الناضجين هما اللي بيدوا جروح بعض، وبيصلحوا اخطاء بعض، وبيساعدوا بعض عشان يجتازوا كافة أنواع المحن، مع إنكار كامل للذات، وعدم إذلال الأخر بشكل أو بأخر لوقوفه جنبه أو لتصحيح أخطائه، أو إنه ضيع عمره وهو بيساعده وواقف جنبه .

الخلاصة

الحب اما لعبة ها تنتهي أو إحساس جميل  ومشاعر نبيلة بتدوم للابد.

الحب إما يضعفنا أو يقوينا

إما يجرجنا أو يسعدنا

إما يكرهنا فى الحياة  أو يخلينا نعيشها 

إما غلط أو صح.

والشركاء إما ناضجين أو غير ناضجين



شيرين ☺




شارك المقال

فيس بوكتويترجوجل +


الإبتساماتإخفاء