حنان العقباوي: أيها اللونين النبيتي والفوشيا...



أيها اللونين النبيتي والفوشيا... مش عارفة من غيركم كنا عملنا ايه!!!




تنويه... 

"هذا المقال خاص بالستات والبنات فقط لما يحتويه من كلام عن الموضة والألوان ولن يهمك إطلاقًا عزيزي الرجل... لذا أنصحك أيها الرجل بالإبتعاد فورًا، ولقد أعذر من أنذر."


كل يوم الصبح بيدور بيني وبين ذاتي الحوار الآتي:

- يا تري ألبس إيه علي البلوزة دي؟

- إلبسي البنطلون النبيتي هيليق أوي

- يا تري ألبس إيه علي البنطلون ده؟

- البلوزة الفوشيا الجديدة هتبقي حلوة أوي

- الجو برد... لازم أخد جاكيت.. بس أنهي واحد هيليق علي الشيميز ده؟

- الجاكيت النبيتي هيمشي علي فكرة

أولاً تعريف اللونين دول: اللون النبيتي ده لون ناتج عن خلط اللونين الأحمر والبني، ممكن مجازآ نقول عليه أحمر غامق ، أما الفوشيا فهو نتاج خلط اللونين الأحمر والروز، وبعض الناس ده بالنسبة لها بيكون بمبي غامق ،  بردو عادي، مفيش أي مشكلة، أنا أصلا معنديش أي أزمة في أسامي الألوان، مشكلتي في تركيب الألوان علي بعض!>

بصراحة ياجماعة اللونين دول  إختراع وفي الحقيقة أنا مُمتنّة أوي لخبراء الموضة اللي دخّلوا اللونين دول في معظم اللبس، والألطف بردو إني لقيت ستات وبنات كتير رأيهم من رأيي ، يعني دلوقتي ممكن مثلآ بلوزة أبيض في إسود عليها إيشارب أو شال فوشيا أونبيتي مع عقد وشنطة بنفس اللون. 

عشان كده نصيحتي ليكي أيتها السيدة وأيتها الفتاة في هذا الشتاء اقتناء قطعة علي الأقل من اللونين دول، هتنفعك  جدآ وهتدعيلي.

 ثانياً وده بقي لُب الموضوع، زمان كانت الألوان وقواعد اللبس دايما ثابتين، بمعني إنه مثلا لو لابسة حاجة منقوشة أو مقلمة، يبقي لازم الباقي يكون سادة بلون من الألوان اللي موجودة في النقشة  أو التقليمة ، زمان كنتي تحسي كده إن الستات ذوقها موحد، واللطيف في الموضوع ده إن الألوان في الشارع كانت بتقي مريحة للعين عمومآ، هي البهرجة كلها كانت بتبقي في الموديلات، الياقة كبيرة أوي، الأوبيليتات بتزود طول الست 20 سم علي الأقل، الجيب واسعة أوي - وده طبعا أكيد قفلنا كلنا من الموضة في الوقت ده وخلى معظم الصور والذكريات كوميدية جدآ بسبب الموديلات- إنما الألوان كانت غالبا عادية جدآ وزي ما قلت القواعد كانت ثابتة. 

أما مع بداية الألفينات، بدأت الموضة شوية شوية تتغير ومبقاش فيه قواعد ثابتة أوي زي زمان، صحيح الأزياء بقت بسيطة مش معقدة زي الأول بس بقي تركيب الألوان الغريبة  علي بعض هو السائد. الجميل في الموضوع ده إنه بيدينا فرصة نغير من شكل اللبس، وده بيدي إحساس بالتنوع وبيخللي كل قطعة تظهربشكل جديد كل مرة، وكمان أتاح لنا استخدام كل قطع اللبس فمبقتيش مضطرة تركني حاجة لغاية ماتجبيلها حاجة تمشي معاها! 

أما بقي الوجه القبيح للموضوع ده فهو كرنفال الألوان اللي بقينا بنشوفه في الشارع وده بيسبب تلوث بصري  - ال يعني كان ناقصنا كمان تلوث بصري بسبب الألوان! – صحيح خبراء الموضة قالوا إن ممكن نركب ألوان غريبة مع بعض زي الأصفر مع البرتقالي أو مع الفوشيا وغيره عكس ما كان متعارف عليه زمان، بس ده يا بنات وياستات مش بيدينا الحق أبدا إننا نلبس أصفر وموف وأخضر وفوشيا سوا! ذنبي ايه أنا أشوف واحدة  الصبح لابسة بلوزة صفرا علي بنطلون موف وجزمة خضرا وشنطة فوشيا في نفس الطقم ، دي إعلانات المساحيق مركبتش الألوان دي سوا! أما الطُرح بقي فحدث ولاحرج... كان من نعم ربنا علينا إن الأوبيليتات إتلغت بس في ناس صعب عليها الحوار ده وقررت إنها تزود ال 20سم في الطرح بدل الأوبليتات، تحسي كده إنها لفة راسها بورق هدايا مش إيشاربات!

الإختراعات حلوة مفيش كلام، والتغيير والتجديد مطلوبين خصوصا للّي بتنزل كل يوم ،  وهدف كل ست وكل بنت إنها تحس إنها مختلفة ومتميزة عن التانية  ،  بس يا جماعة من فضلكوا بهدوء شوية مش كده ، ارحموا عينينا ونظرنا اللي أصلا بيضيع بسبب الكمبيوتر والفيس بوك ،  مش لازم نقضي عليه بكرنفال الألوان كمان!




شارك المقال

فيس بوكتويترجوجل +


الإبتساماتإخفاء