وسام عثمان: هما مين فينا المصريين



هما مين فينا المصريين؟



بقلم : وسام عثمان




ميين فينا المصرييين..؟


اللي راكبين عربيات رمسيس من الستينات وماشين بيها في الشوارع... ولا اللي راكبين بي ام دبليو فئه سابعه ومالين بيها الشوارع..!

مين فينا المصريين؟

اللي بيخرجوا في جنينه قاعدين على ملايه كروهات بيشربوا شاي،  بنص جنيه.. ولا اللي قاعدين في مطعم عايم على النيل بيتغدوا..!

مين فينا المصريين؟

أكوام الفلوس اللي جوه البنوك وبراها ولا أكوام الزباله لنفس النفوس جوه البيوت وبراها..!

مين فينا المصريين؟ 
الناس اللي فارشه بضاعة على مزلقانات القطر ولما بيجي القطر  بتشيلها عشان  تعديه.. فيهم الخير والله.. ولا اللي ليها محلات كبيره محدش بيخطيها.. مش مهم  القصد غسيل أموال والسلام.. ولا اللي رايحين يشتروا بضاعة راحت صلاحيتها من سوق المطريه ولا المرج ولا الوراق ولا الطالبية.. ما اهو أصل عليها عرض.. ولا اللي باعتين يجيبوا أكلهم من بره..!

مين فينا المصريين؟

البنت المنقبه اللي الواد ماسك إيديها وهاريها ولا البنت المحجبه أم بنطلون اللي بتحفّظ قراّن في المركز.. الواد اللي عرفها الصبح ونام معاها بليل في شقه صاحبتها.. ولا اللي بيشوف مراته لأول مره في ليله دخلتها...!

مين فينا المصريين؟

الوشوش الشقيانة التعبانة اللي طالعة من سلم مترو الانفاق ولا الوشوش اللي على سلم سيتي ستارز..!

مين فينا المصريين؟

اللي عيالهم في مدارس على بابها حرنكش وتكاتك وجوه مفيش حصص من أصله؟ ولا اللي الكيدز بتوعهم عندهم حصه للسباحه يومين في الإسبوع.. مييييين؟!.

اللي لازم وقفه العيد بيره وحشيش ولا اللي بيعتكفوا في العشر الأواخر.. اللي بيسبوا الدين ليل نهار ولا اللي هبوا على إساءه الرسول...!

مين فينا المصريين؟

اللي في شارع الهرم ولا العزيز بالله.. اللي نزلوا الميدان ولا اللي قاعدين في البيوت... اللي بيفلت من الاعدام ولا اللي القطر عليه بيفوت..!

مين فينا المصريين ...؟!

اللي بيحبوا بعض ولا اللي على بعض بيدوسوا...

مييين ؟؟
المسلم اللي بيحب ويفدي المسيحي بجد بس اللي هوا عارفه وأي مسيحي تاني مش صاحبه يبقى ابن كلب ولا المسيحي اللي بيحب ويفدي المسلم بجد بس برضه اللي هوا عارفه وأي مسلم تاني مايعرفوش يبقى برضه ابن كلب....!

مين ؟؟

اللي بيعملوا سبوع ولادهم في الشارع ..آه والله في الشارع ولسه شايف واحد قريب بالشموع وهون حديد ولااللي بيجيب منظم حفلات يعملّه حفله للسبوع ...!

مين فينا المصريين...؟

اللي عملوا حرب أكتوبر ولا اللي بيعملوا حرب الشوارع دلوقتي.. اللي نضفوا الميدان بعد 18 يوم ولا اللي بيوسخوا البلدمن ساعتها....!!

مييين فينا المصريين  ؟؟





شارك المقال

فيس بوكتويترجوجل +


الإبتساماتإخفاء