ياسمين حسن: هنغرز كلنا من كتر العمق!



هنغرز كلنا من كتر العمق !!


بقلم: ياسمين حسن


العمق.. كلها بتتكلم وبتفتي، لكن مش كلها عميقة.. دي مرحلة لتحت بتغرز فيها بكل طاقتك علشان تبقى شخص "عميق".. بس في خطوات لازم تنفذها .. الحكاية مش سايبة كده ولا أي شخص ينفع يبقى "عميق".. 

من أساسيات العمق عدم الاهتمام باللبس أو الشعر.. شكلك لازم يكون عبثي.. أيوة عبثي ولازم تستخدم كلمة عبث في الكلام كتير ..
لازم على قد ما تقدر تكون مش مفهوم شكلك.. كلامك.. تعبيراتك..

 تبتدي بقى تشرب قهوة .. ومفيش حاجه اسمها مُرّه مش بحبها ..ما الحياة مُرّه وبنحبها "ودي مثلاً جملة عميقة ممكن تكتبها بوست على الفيس بوك"..

مع القهوة لازم تكون بتسمع فيروز.. مش هينفع أي مطرب تاني يا فيروز مع القهوة يا العمق هيروح ..ومش أي مكان تشربها فيه، لازم القهوة اللي هقعد فيها تكون قديمة جداً..

الارتباط.. مش هينفع ترتبط زي أي حد، أنت شخص عميق وليك شروط ..بنت كده عميقة تليق بيك ..وأنت بتتكلم معاها حاول تتكلم عن الطاقة كتير ،يعني أنا اخدت منك طاقة إيجابية ده بيوصل للبنات العميقة أسرع .. مش هينفع تعزمها زي الأشخاص العادية وتقوله تعالي ننزل نشرب قهوة .. لأ طبعاً، هتقول لها "نفسي اشم ريحتك في الهوا الصبح وابان في عينكي وأنا بشرب القهوة"،  هي هتنبهر بالطريقة وتوافق، وبعد ما اليوم يخلص تكتب حاجة على الفيس بوك مش مفهومة .. أي جملة ملهاش أي معنى هتنبهر تاني عادي ..

وبعد فترة زمنية مش كبيرة أنت هتزهق، ساعتها لازم تفركش بشكل عميق.. أنت مختلف.. هتختفي شوية، وبعدين تقول روحي وجعاني.. معنديش طاقة أكمل .. هي هتصدق وهتنبهر بيك برضه ..

حلو الشغل ده.. مش كده.. حاجة بالغرز ده تديك إحساس أنك فيمص.. عارف انت العيال الفمايصة دي.. ما تنساش سيلفي العمق..