ولاء الدين فاروق: مش طالبه أكون طالب



 مش طالبه أكون طالب - شعر 


بقلم: ولاء الدين فاروق



أنا خلصت واجباتى
و جدول بكره الاتِ
و طاقتى خلاص بقت زيرو
ف طظ ف كل هواياتى
بقيت مخزن ل معلومه
بأن الفيل بزلومه
و إن فى دولة ف القارة
بياكلو لحمة مفرومه
و أن الكوكب الملعون
دا حكمه ف يوم واحد مجنون
معاهدة .. شروط .. دا أنا صغنطوط
يدوبك قلمى بقا مسنون
و عم محسن البقال
دا جاله للمحل عيال
و عايزين يشترو بوبنون
ف ورينا بقا الهِمه
و احسِب حسبة البِرما
بدل لِعبَك على التليفون
يعدى اليوم و يجى الصبح
دى شتوية .. بتدبح دبح
لكن هنزل بلا حيله
بشنطه داهيه و تقيله
بتحنى ضهرى من بدرى
و هى بداية الشِيله
طابور .. بلا كلمه ننطقها
نغنى بصوتنا المنبوح
مفيش و لا حاجه بنطِيقها
و ريحة التعب بتفوح
و جوا الفصل .. يا واد ركز
و اياك لو تكون شارد
لكن اغلط و ايه يعنى
انا طالب
و غلطى احتمال وارد
ف ليه تذنـبنى يا أستاذى
على الحيط
هلاقيها أنا منك
ولا من أمى ف البيت
تعدى حصة ورا حصة
و لا خلاويص و لا لِسه
دا كله حشو للمُخيخ
طفولتنا بقت حسه
بأن الأكل كله فسيخ
فأيامنا بقت مُره
و تعليمنا بقا بفلوس
و أبويا ف كل مرة درس
بيلعن حظه المتعوس
أنا بعزف على آله
لكنى خلاص بقيت آله
فلا عزفى بقا  مسموع
و لا التى دى شغاله
أنا بحلم بتعليمى
ميبقاش زى كل ما فات
بمنهج اه اكاديمى
و بيقربنى م اللى ات
كفاية حشو ارجوكم
دماغى مربعات سيجا
انا ليا سعة تخزين
لكن فاكرننى كام جيجا
دا انا لسه بشقشق اشُق ف طريقى
تكونو ليه سبب ضيقى
لو انتو صح بحقيقى
بطريقتكم و منهجكم
ف خلونى اقولهلكم
ماهُماش كلمتين ف السِر
بلدنا بجد بسببكم
محلك سِر