سحر الإمام - خزعبلات منطقية

خزعبلات منطقية 

بقلم: سحـر الإمـام 

انسان مش واضح .. متلخبط دايما .. مش عارف هل هو ده اللى هو عايزه ولا دى رغبة حد تانى .. طموحه وأهدافه مش محددة .. مش عارف يوصف احساسه .. خايف يعبر عن مشاعر مش عيب ولا حرام .. من بره شكله متوازن جدا .. ومن جوه .. الاختلال بعينه .. الشخص ده ساكن جوه معظمنا .. لو اى حد قرا المواصفات دى هايقولك ده انا ..
يؤسفنى ان اقول لحضرتك انك اتربيت غلط .. أو اتربيت بالصدفة .. اهلك عملو منك كوكتيل عقد نفسية على فخفخينة رغبات مكبوتة محترمة .. 
صدقنى الخلل مش فالمجتمع .. لأننا احنا المجتمع .. احنا اللى عملنا العيب .. وساعات بنحوّله لحرام كمان .. احنا اللى عندنا فراغ يكفى لإننا نقعد نوصّف ونقسّم التصرفات لعيب وغلط وحرام ومايصحش ..
هو احنا ليه بنخاف على ولادنا؟ .. بنخاف من ايه؟ .. وهل ده يستدعى نحطهم فى فقاعة يادوب يتفرجو على الأحداث مايشاركوش فيها .. ما سألناش نفسنا عن المجهول اللى احنا خايفين منه ده .. هل هو خطر عليهم ؟ ولا علينا احنا؟ .. خايفين من الألم؟ .. من غير الألم مش هايتعلّمو .. ومن غير أزمات قوية تقطم الوسط هايبقو ضعاف وهشّين من جوّه ..
محتاجين نتحررمن خوفنا على ولادنا .. محتاجين نحقنهم بشوية ثقة .. نقوّى مراقبتهم لنفسهم من خلال مراقبتهم لربنا .. يطوّرو مبادئهم مش يغيّروها .. نشوف الدنيا بعنيهم .. نصغرلهم .. نتجنن شوية معاهم .. نحب نفسنا عشان نعرف نحبّهم .. ناخد عشان نعرف ندّى .. ماينفعش نضحى على طول .. احنا مش أبطال ولا أساطير .. 
"لازم" .. لازم تبقى الأحسن .. لازم تبقى الأول .. ليه لازم .. ليه الإجبار .. ممكن تبقى كويس .. ممكن ذكى .. ممكن  سعيد .. ماتعيشّ حياتك فى سبق زى الخيل .. افرح ب اللى حققته وماتبصّش لحد ..
ماتحاولش تدارى عيوبك .. انت أصلا ليه بتداريها ومن مين؟! .. عشان الناس تشوفك أحسن؟! .. وبعدين؟! .. حاول تقبل عيوبك زى ماهى لو ماقدرتش تشتغل عليها وتصلحها .. عادى .. مش قادر .. مش عارف .. احترم قدراتك وجهدك .. احترم صورتك فالمراية .. احترم صدقك مع نفسك وماتعاقبهاش عشان شايفة حقيقتك وبتقولهالك ..  صدقنى المجهود اللى بتبذله عشان تدارى وتخبّى وتتجمّل أكتر بكتير من المجهود اللى محتاجه عشان تصلّحها.
مش لازم تبقى عميق فأى حاجة .. حب بالراحة .. اكره بالراحة .. اتعلّم وافهم بالراحة .. كل حاجة قابلة للتغيير.. دى سنّة الحياة .. فاماتتعمّقش فيها اوى .. عشان لما تتغير هى ما تتوهش انت .. حتى انت نفسك بمفاهيمك بمعتقداتك قابل للتغيير خلال مراحل عمرك كلها .. اقبل التغيير ده .. واتبسط بيه.
الحياة أبسط وأعقد مما تتخيل .. ماتستغربش .. بسيطة فمكوناتها ومتطلباتها .. معقدة فى طريقة ممارستها .. ممارستها فن .. فن ازاى تقدر تعيش .. تحب نفسك وتقدّرها من غير مبالغة وأنانية .. تفرح من غير ما تتعصب ففرحك .. تزعل وما توقفش عند زعلك وتعرف تكمل .. ترفض ببساطة من غير تعصّب وعنصرية وتهكّم .. تحب من غير تطرّف .. تكوّن علاقات بسيطة مش معقّدة ومريضة ومليانة احتياج أو تملّك ..   
محتاجين كورسات فى حب الحياة .. احنا المدرّبين والمتدربين .. مش هاينفع حد تانى يعمل ده غيرنا احنا.. لازم نحل المعادلات دى ونطلّع نتايج نقبلها ونعرف نعيشها.

شارك المقال

فيس بوكتويترجوجل +