بهاء حجازي يكتب:اللازمة.

اللازمة 

كتب/بهاء حجازي
عزيزي المواطن , في البداية أحب أعرفك بنفسي , انا انسان سعيد جدا لدرجة الحزن , ومتسألنيش ازاي لأني مش هقولك من أول مرة كده، هتقول عليَ ( مدلوق )  , استني لما ناخد علي بعض الاول .
كل واحد مننا انا وانت والاستاذة اللي لابسة ازرق ليه ( لزمة ) في الكلام , في الحركة , مثلا  , اخوك اللي بيكتب ناو  ( اللي هو انا ) عنده لزمة انه يقول ماشي , يعني اقولك (  انت فاهمني ماشي فالراجل الاولاني ماشي يوسف وهبي دة ماشي عسل )  هي دي اللزمة .
عندي واحد صاحبي ( بيتأتأ )  وعنده لزمة جملة  ( مع احترامي ليك )  , يعني يكلمك كلمة ويقلك بعدها مع احترامي ليك , مثلا مرة كان بيسألني عن سن سوزان مبارك  , قالي يابهاء مع احترامي ليك سوزان عندها مع احترامي ليك كام سنه مع احترامي ليك ؟ , لاحظ انه هو كمان بيتأتأ , بصيتله وقالتله انت عاوز سنها قبل السؤال ولا بعده .
مرة روحت اكشف نفسي ( المرض مش الانا )  , لقيت هناك زيطة وزمبليطة اصل المرضي النفسيين في بلدنا اكتر من اللي بيلبسوا كوتشيهات ( جمع كوتشي ) وانا لما بتوتر ( نسبة الي التوتر مش تويتير )  بأكل في شفايفي ( زي لطفي لبيب في يانا ياخالتي ) , دخلت عند الدكتورة وتوترت وقعدت اكل في شفايفي , الدكتورة بصتلي كدة ونزلت طرف الفستان , وقالتلي ايه يا استاذ دة ,  دة انت لولا شكلك محترم انا قلت انك عاوز تغتصبني , السؤال بقي عرفت ازاي اني محترم , مع العلم اني حاطط نغمة موبايلي اغنية لنقيب الموسيقين , ولابس تي شيرت مكتوب  عليه  ( كله شمال ياصاحبي  ) .
اللزمة دي حصرت ناس كتير في اماكن محدودة , مثلا ماينفعش تتفرج علي فريد شوقي ومتشوفهوش بيضرب و ماينفعش  تشوف امينه رزق مبتعيطش , منفعش تشوف مرسي وماتضحكش .
خلاصة الكلام عزيزي ابدأ الاول وشوف لزمتك ايه , لو حاجة حلوة ماشي يبقي ماشي , ولو مش حاجة ماشي حلوة ماشي يبقي تغيرها ماشي , انا كنت عاوز افتكرلك انا كت رايح اكشف نفسي ليه .... اه انا مشكلتي اني بنسي .
هو انا قلتلك كنت رايح اكشف نفسي ليه ؟ نسيت احكيلك عن الدكتورة اللي كانت مفكراني هغتصبها 


الإبتساماتإخفاء