أية الهوارى - النيش قبل العريس




النيش قبل العريس



بقلم: أية الهوارى



أنا زى أى بنت في جهازها مع سفرتها نيش و طبعا ده عادة قديمة تقريبًا من أيام الفراعنه تتوارثها الأجيال و معروف عنه إنه أكتر منطقه محظوره فى البيت ممنوع اللمس و الإقتراب و التصوير كمان.. واللى يفكر بس.. مجرد تفكير بس.. مظنش إنه بيقعد عايش ثانيه.

طبعا مفيش واحده متجوزه معندهاش نيش أيًا كان حجمه.. لونه..  محتوياتة، المهم.. إنه موجود وأى واحده بمجرد ما يتقدملها العريس وتبتدى تجهز نفسها بتفكر الأول فى الحاجات اللى هتشتريها و تحطها فى النيش ده قبل أى حاجة.

أنا بقى الحمد لله مظبطه النيش بتاعى يمكن أكتر ما مظبطة الشقة كلها على بعضها ما أنا قولتلكوا دى وراثه و طبعًا أساسى محطوط طقم الصينى و أفخم أنواع الأطقم من كاسات على كبايات على طقم كاكاو اللى لحد دلوقتى معرفش مين الفاضى اللى إخترع طقم مخصوص للكاكاو..!، وأى حاجه غالية وثمينه محطوطه فيه طبعًا زى الكريستال مثلا ده لو فيه يعنى..

فى يوم كنت قاعده مع نفسى و عينى وقعت على النيش اللى لأول مره أفكر فيه و أخد بالى منه و أبص ليه بتمعن كده و سألت نفسى سؤال: هو أنا لأمتى هافضل محنطاه كده ومش بستخدم الحاجات اللى فيه؟

ليه مدلعش نفسى زى الأفلام والمسلسلات كده العربى و الهندى و التركى و اعمل فيها بنت ناس بقى و أكل فى طقم الصينى و لا أشرب فى طقم الكاسات ده اللى متزين بالفصوص و لا أستخدام الفازه الكريستال دى؟

ليه الخوف من إنى أقرب ليه ده و لأمتى هافضل خايفه؟

هل يعنى هفضل محافظه عليهم وده يبقى ورثى لعيالى؟

ولاَّ شايلاه لوقت زنقه زى الدهب يمكن الواحد يتزنق فى قرشين واروح أبيع الحاجات اللى طبعًا إتصرف عليها قد كده ومش هتجيب جنيه فى بيعها؟

لأ ده كمان من إهتمامى بيه و تقديسى ليه جبت حد متخصص شغلته يرص النيش ويظبطه والناس دى بقت موجوده كتير أوى الأيام دى و شغلانه تكسب يعنى ...

كل دى كانت أسئله بتدور فى دماغى وقررت أفكر بصوت عالى وسألت جوزى هو إحنا ليه صحيح مش بنستخدم الحاجات  اللى فى النيش؟

والرد كان كالأتى:

اه معرفش ليه إنتى حرمانه منها يعنى جايبه حاجات فى الجهاز تفرجينى عليها بس؟ 

يعنى ليه متخلنيش أشرب فى طقم الكاسات ده (هو هو اللى كان عينى عليه برضه)؟ 

ولا ليه مش بتحطى ليا الأكل فى الطقم الصينى ومزهقانى 6 سنين بطقم واحد كل يوم أكل فيه ماتدلعينا كده..!

ادلعك؟.. كل ده شايله يا أخويا من ناحيه النيش في قلبك و إزاى بس فكرت مجرد تفكير أو تحلم إنك فى يوم تقرب لحاجات النيش وتستخدمها انت متعرفش قيمه النيش فى البيت ولا إيه؟

و لما إستخدم بقى حاجته هرجع أرصها تانى زى ما كانت..؟ ولاَّ افرض حاجه إتكسرت..؟ فى داهيه بس برضه النيش ليه مكانتة ومركزه اللى لا يمكن حد يهزها أبدًا.

و يبقى الحال على ما هو عليه و النيش واقف بفخر فى الركن البعيد الهادى و إحنا خايفين نقرب للمنطقه العسكريه دى.



الإبتساماتإخفاء