حنان العقباوي: اعرف مين زار بروفايلك واشكره بسرعة



اعرف مين زار بروفايلك واشكره بسرعة



بقلم: حنان العقباوي

أنا في الحقيقة مش عارفة إذا كان الموضوع ده ينطبق علي كل المجتمعات العربية والأجنبية ولاَّ مجتمعنا إحنا بس؛ عامة أيًا كان أنا هتكلم عن الموضوع وأقول الكلمتين اللي محشورين في زوري ورزقي علي الله بقي.

 طبعًا طبعًا مواقع التواصل الإجتماعي وعلي رأسها الـ Facebook مليئة بجميع أشكال وأنواع الألعاب والتطبيقات، مرة شوف شكلك كمان 20 سنة ومرة شوف شكل إبنك المستقبلي ومرة أنت شبه مين من الحيوانات؛ غير لعبة candy crush  وكم الـ invitations اللي بييجي للواحد كل يوم.

بس دونًا عن كل التطبيقات دي اللي نوعًا ما بتكون موضة تاخدلها يومين وتروح لحال سبيلها، أنا هخص بالذكر تطبيق اسمه "اعرف مين زار بروفايلك"، التطبيق ده غير إنه مطول معانا بقاله فترة كبيرة، عامل كده زي عفريت العلبة بيطلعنا في كل حاجة، هتلاقيه في الـ Home Page و في أي comment علي أي public post، هتلاقي جملة إعلانية منورة كده مضمونها كالآتي "أنا عرفت مين زار بروفايلي النهاردة.. لو انت كمان عاوز تعرف اضغط الرابط" وطبعا ممكن  يكون في شوية تجويد من نوعية "الكلام ده بجد مش هزار" أو"أنا جربت بنفسي"..ألخ.

طبعا احنا عارفين إن التطبيق  ده أي كلام ومش حقيقي، بس اللي مخليني أفكر في الموضوع ده هو الاهتمام الزايد أوي بحوار مين زار البروفايل ومين دور علينا ومين خطرنا علي باله النهاردة؟!!! 

غير  طبعا الألشة المشهورة بتاعة "هو أنا هستفاد ايه يعني لما أعرف مين زار بروفايلي.. هردله الزيارة مثلا؟"  واالي تعتبر إلي حد كبير منطقية وغير الخنقة الفظيعة اللي بيسببها أي comment  فيه رابط التطبيق ده خاصة للناس اللي غاوية تقرا معظم الكومناتات زي حالاتي – الـ يعني متخصصة علم نفس في الـ Facebook! ما علينا.

بجد تعالوا نفكر في الموضوع ده، ازاي في شريحة كبيرة مهتمة فعلا بالتطبيق ده وعاوزة تعرف مين زار بروفايلها النهاردة؟! ليه أصلا حاجة زي دي تكون مهمة، ماهو بردو احنا مش معزولين في جزيرة ولا في قارة تانية عشان يكون تواصلنا افتراضي للدرجة دي! ليه أصلا واحد فاضي يخترع اشتغالة زي دي والناس زي مايكون ماصدقت تمسك فيها بكل قوتها!  هو احنا فعلا للدرجة دي حياتنا بقت فاضية من جوة وبتفتقر للأهداف عشان كده صدقنا؟!  وللا احنا بقينا بنتلكك عشان نحس إن احنا فارقين مع حد وفي حد بيدور علينا وعاوز يعرف أخبارنا وأحوالنا؟! وللا احنا خلاص كل حياتنا بقت كلها افتراضية حتي الزيارات اللي هي بالأساس واجب اجتماعي لتعزيز التواصل الإنساني؟! ولاَّ الـ Facebook من كتر مابنحط عليه أدق تفاصيل حياتنا بقي بيتنا والناس بتيجي تزورنا فيه؟!

نهايته، يا جماعة ياريت بس تعقلوا التطبيق قبل ما تدخلوا عليه، وياريت تعيشوا حياتكوا الحقيقية وتتزاروا في الحقيقة كده وتتبادلوا الهدايا والورود والشيكولاتة بدل ما تتبادلوا البوستات واللايكات. ورجاء شخصي يعني بلاش تدخلو ترزعوا الرابط ده في كل التعلقات عشان فعلا بتخنق. 



شارك المقال

فيس بوكتويترجوجل +


الإبتساماتإخفاء