ولاء حجازى: ممكن.. ولاَّ هتكسفونى؟





كل واحد مننا عنده أمه.. فيه اللى عايش معاها لسه وفيه اللى كبر وإتجوز وراح بيت تانى وفيه وفيه ....!
كل أم ليها عبارات أو جمل معينة بتقولها فى أوقات معينة، ومش هنقدر نقول عبارات مميزة لأن تقريبا هى مصطلحات وكلهم حافظينها، حتى من كتر ماهى مكرره فإحنا حفظناها زى مثلا:

* ادعى على إبنى وأكره اللى مايقولش بعد الشر، أو أكره اللى يقول آمين (طب يا حاجه انتى أصلاً بتدعى عليه ليه من الأول، ما تدعيله ربنا يهديه وإحنا نقول آمين وتحبينا بدل ما تكرهينا، ويمكن كمان تكون ساعة إجابة وربنا فعلا يهديه، بدل ما تدعى عليه ويتعفرت أكتر ماهو)

* وإنت خارج م البيت لازم تقول ( خد الباب وراك ، أو خد الباب ف إيدك ) آخده ورايا والا فى إيدى إزاى يعنى ! ما تقولى إقفل الباب وخلاص .

* هات لى أد كام قرن فلفل من التلاجة، ( مانعرفش ليه ' أد ' دى اتقالت ، ده غير إنك لو جبتلها قرنين هتقول لك هات كمان واحد ) طب ما تقولى من الأول هات ٣ قرون فلفل !

* تبقى بتاخد بريك بعد ما ذاكرت تقوم تدخل عليك وإنت ماسك الموبايل وتقول لك ( طول ما إنت بتلعب فى المخروب ده والنبى ما هتنفع ، يابنى ذاكر شويه وحلل الفلوس اللى بنصرفها عليك ) طب يا ست الكل ده انا بذاكر بقالى ٥ ساعات ومافكرتيش تدخلى عليا ووقت ما تدخلى تقفشينى وأنا بالعب فى الموب ! ده إيه ياربى الظلم ده ! ..

 * تقول لها : ماما صحينى الساعة ٧ ، تفضل وراك من الساعة 6 وتقعد تقول لك : قوم يا حمادة الساعة بقيت 8 وهى لسه 6:30 ، على فكرة الكذاب بيروح النار يا ماما ، ده حتى إنت اللى معلمهالى وغنيتهالى وأنا صغير .

* تكون فى أوضتك وتخرج منها تجيب حاجه من المطبخ مثلا ، تصرخ وتقول : مش عارفه مابتطفوش النور ليه بعد ما تخرجوا ، والا هو هرى فى جتتنا وخلاص ، وفى الآخر فاتورة الكهرباء تيجى ااااد كده ، ما انتوا ما بتتعبوش فى حاجة ، لو بتشتغلوا كنتوا عرفتوا القرش بييجى إزاى وحافظتوا عليه ! ( على فكرة يا ماما الموقف مش مستدعى كل ده ، ده أنا كنت داخل أجيب كوباية مايه أشربها وراجع أوضتى تانى .

* تعمل فى يوم أكله إنت مش بتحبها ، وتكون بقالك عشرين سنة كل إما تعملها تقول لك : طب دوقها بس والله هتعجبك ، ( والله يا ماما لو كنت عاوز أجرب ادوقها ، ماكنتش تعبتك العشرين سنة اللى فاتوا دول وكنت وفرت عليكى واكلتها ) ، زى السبانخ مثلا .

* تبقى بتزعق لك وإنت بقى عشان محترم باصص فى الأرض ومش بترد ، تقوم لطشاك بالكف على وشك وتقول لك : هو أنا بكلم نفسى ! ولو حاولت ترد عليها تقول لك : إنت بتبجح فيا يا قليل الأدب ، يا خسارة تربيتى فيك ، ( لا تعليق ، بجد لا تعليق ) .

* ما تصاحبش إبن فلان ، ده واد صايع وأنا مش بحبه ، ( وأصلا الولد ده وهو رايح يصيع كان إبنها راجع ، يعنى إبنها صايع قديم ) .
ها ؟؟ كفاية كده والا أقول جمل تانى ؟؟

* هات المشبك اللى وقع ده وإنت طالع .

* إلهى يجيك ويحط عليك يا بعيد .

* والنبى ما إنت نافع .

* أنا ما خلفتش ولا ليا عياااااال .

* ما تلبسش الشراب وإنت نايم عشان هيأثر على نظرك .

* ما تاكلش وإنت واقف ، الأكل هينزل فى رجلك .

* الموبايل إشتكى منك ، نفسى الكتب تشتكى منك هى كمان .

* يا خسارة شبابى اللى ضاع عليكم فى التربية ويارييييتنى عرفت أربى .

* يا ترى هييجى عليا اليوم اللى هشيل ولادك فيه .

* إقفل التلاجة وإنت بتشرررررررب .

كلام كتير وعبارات كلها مكرره ومحفوظة وتوارثت من جيل للتانى للى بعده بدون أدنى تغيير ، وما زلنا فى 2016 والجمل ذاتها بتتقال ، طب يا جماعة غيروا ، حطوا التاتش بتاع جيلكم ، زودوا كلمة يذكركم بيها التاريخ ، إنما لأ ، كل واحدة اصبحت أم ، تقعد تكرر فى نفس الجمل فى كل المواقف .

طيب بالنسبة لأمهات القرن العشرين ، إيه ؟؟ مش ناويين تجددوا وتقضوا على الجمل دى ؟؟ ، الجمل اللى معظمها وبسببها معظم الجيل طلع عنده عته ( لا مؤاخذه ) ، ممكن نرتقى شويه ؟؟ ممكن نغير الجمل دى بجمل اشيك ؟؟ ممكن مايفرقش معانا المشبك اللى وقع ومش لازم نهاتى فى الشارع عشان تجيبيه ؟ ، طيب ممكن تشرحولهم ليه ما ينفعش نسيب باب التلاجة مفتوح وإحنا بنشرب بدل ما نصرخ فيهم ويشرقوا من الخضه وهما بيشربوا ، ممكن تسيبوهم يناموا بالشراب عادى ( بس يكون نضيف ومن الدولاب ) ؟
ممكن تتاكدى الأول إبنك اللى صايع والا إبن عمو فلان قبل ما تتهميه وتقوليله ماتصاحبهوش ؟؟ ممكن لما يطلبوا منكم تصحوهم الساعة 7 يبقى 7 مش قبل ولا بعد وما نحورش ؟؟ ممكن تدخلوا تصحوهم بطبطبه على الهادى بدل ما تنادى وإنتى فى آخر الشقة ويقوم إبنك من نومه مفزوع وبكده تبقى قفلتيله اليوم من اوله بالصوت العالى ده ؟
ممكن ما ندعيش على أولادنا ، ليه نستنى اللى يقول بعد الشر ! إفترضى إنها كانت ساعة إجابة ؟ وساعتها هتندمى إنك فكرتى حتى تدعى عليه بأى شر .
ممكن.. ؟؟ ممكن ..؟؟ ممكن ..؟؟

أنا إعتراضى مش على الأمهات ولا باتحامل عليهم ، لأ خالص على فكرة ، ربنا يخليهم لينا ويبارك لنا فيهم ، لكن إعتراضى على أسلوب تربية خطأ ولكنه متوارث للأسف ، ونفسى نغيره .

وفى الآخر طبعا لازم نشيد بدور أمهاتنا فى حياتنا وندعيلهم بالصحة والعافية والرضا عننا علشان يرضى ربنا عننا ، ويرحم كل الأمهات اللى توفاهم الله .

وأتمنى ما أسمعش العبارات دى فى جيل الأمهات القادم بإذن الله ، لأنها عبارات مكرره ولكن ليس لها معنى .

شكرا، والسلام عليكم ...

شارك المقال

فيس بوكتويترجوجل +


الإبتساماتإخفاء