ياسمين حسن - الناس الحلوة




الناس الحلوة


ياسمين حسن

كلنا عندنا ناس حلوة في حياتنا، مهما حصل بيفضلوا الحلوين.. الدليل على ده الأيام والوقت اللي بيعدي علينا ومفيش أي شخص يقدر ياخد مكان الناس الحلوة...
زي ما لازم نتخلص من الناس اللي حياتنا من غيرهم أحلى ، لازم كمان نتمسك ونحافظ على الناس الحلوة. 
اللي مش بتشيل هم انك تبررلهم كل تصرفاتك الناس اللي قابلينك زي ما انت.
اللي ممكن تكلمهم أي وقت من غير ما تبص في الساعة دول نعمة من عند ربنا..
اللي بتفتكرك في عز انشغالها مش وقت ما يكون عندهم وقت فراغ دي ناس فعلا بتحب مش بتمثل وانت شخص غالي عندهم لدرجة انهم فاكرينك وهما مشغولين..
اللي بتعمل كل جهدها علشان تضحكك وانت بتبكي الناس دي بتحبك لدرجة انهم مش بيقبلوا فكرة أن الحزن يأكل في روحك..
اللي مش ممكن يسمحوا لأي شخص يجيب سيرتك بالوحش الناس دي بترد غيبتك وممكن يداروا الموضوع علشان خايفين على شعورك ..
اللي انت عارف انك ممكن تتسند عليهم فعلا الناس دي نمسك فيهم علشان دول بس اللي باقيين ..
اللي تشوف الفرحة في عيونهم وقت فرحك الناس دي حبيتك زي ما بتحب نفسها وبتفرحلك بجد كأن الفرح ليها ...
الناس المبهجة الطيبة اللي طول ما انت معاهم مبتسم وواخد طاقة حلوة تخليكي تواجهه اكتئابك بليل وانت لوحدك ..
ناس بتفكر تفرحك حتى لو بتراك مزيكا ممكن تكون سمعته قبل كده لكن ده شئ هيفرحك ان في حد بيشاركك حتى المزيكا اللي بيحبها ..
ممكن يتقبلوا فكرة أنك فعلا مش عاوز تتكلم ويمنحوك مساحتك لحد ما تبقى كويس الناس دي لازم نتمسك بيهم وفي نفس الوقت محتاجين نعملهم محمية طبيعية يعيشوا فيها بسلام ..
ممكن جدا تكون أنت الشخص ده أو انا أو انتي ، بس الأكيد أن كلنا عندنا ناس بتعمل حاجة من الحاجات دي أو حاجتين أو كلهم .. 
حافظ على الناس دي .. الناس دي بتحبك من غير أي مصلحة .



الإبتساماتإخفاء