حنان العقباوى - إنما بقي لو انتي متجوزة يبقي..!



إنما بقي لو انتي متجوزة يبقي..!

حنان العقباوى 



الست من ساعة ما اتخلقت وهي بتهتم بنفسها وفي حالة بحث دائم عن الجمال مرة بقي هوليود سمايل ومرة بوتوكس وغيره وغيره؛ وممكن أوي متاكلش ومتشربش في سبيل إنها تشتري أو تعمل حاجة هتخليها أجمل في عيون نفسها وفي عيون الناس. صحيح الموضوع بيكون بنسب متفاوتة في الستات بس استحالة نلاقي ست مش عايزة تبقي جميلة!  ولوحصل وفي ست قالت كده فهي بنسبة 99.9% كدابة.

والاتجاه السائد بقي اليومين دول في موضوع الجمال ده هو الوصفات الطبيعية أوي زي مثلا الكركم للسنان والروزماري للشعر وغيره. ومش بس كده ده بقي في كمان دعوة كاملة للاستغناء عن كل ماهو كيميائي واستبداله بمواد طبيعية؛ تخيلوا بقي إن الدعوة دي وصلت كمان للشامبو!

 آه والله زي مابقولكوا كده، في اتجاه إن احنا نستغني عن الشامبو ونستخدم بداله مواد طبيعية، ودي طبعا حاجة جميلة عشان غير إنها موفرة أوي، وبتقلل الضرر الناتج عن كل المواد الكيميائية اللي بنستخدمها في حياتنا، مش متعبة ولا مرهقة خاصة ان استبداله بيكون بالبيض والخل مش زيت دهن الفيل مثلا! كل ده كلام جميل جدا لكن اللي مش جميل إني ألاقي البنت صاحبة الوصفة دي كاتبة في الآخر خالص الجملة الغبية دي:"ريحة الشعر طبعا مش هتكون حلوة خالص وعشان كده بقي لو انتي متجوزة هتحتاجي تغسلي شعرك بنقطة شامبو صغيرة اوي في الآخر"؟! وبصرف النظر عن حاجات كتير في الجملة دي أولها التناقض.. التفكيراللي جه في دماغي كان التالي: هو ليه - بلاش أنا، عشان حقيقي  بتمني إني عمري ما أقابلك بريحة شعرك دي، إنما ليه أهلك واخواتك وأصحابك والبواب وانتي ذات نفسك تشمي ريحة مش حلوة؟ّ! وكمان تستني لما تتجوزي عشان تبقي ريحة شعرك حلوة؟! ليه أصلا تعملي كده في نفسك؟! ليه أصلا كل حاجة جميلة وحلوة بتشيليها للجواز؟!.. ليه متبقيش انتي حلوة لنفسك مش لحد تاني؟! 

الكلام هنا مش بس علي ريحة الشعر إنما دي حالة عامة بشوفها كتير... ألاقي دايما بنت بتقول "أنا فرحي كمان مش عارف اد ايه.. تفتكروا محتاجة ايه عشان ابقي جميلة؟" وسيل الإجابات بقي وصفات وعناوين دكاترة عشان تظبط كل حاجة من ساسها لراسها! مش ده المهم ولا المهم حتي كمية الفلوس الخزعبلية اللي بتتصرف في الوقت ده والإرهاق المادي اللي بتكون فيه هي وأهلها، ولا العيب إنها بتدور إنها تكون جميلة في فرحها بس العيب إن ثقتها في نفسها تبقي مهزوزة أوي كده وإنها تأجل كل حاجة حلوة عشان فرحها!.

 شعرك ضعيف اهتمي بيه.. سنانك مش مظبوطة اعملي تقويم وللا روحي للدكتور يقولك علي علاج.. عندك عيب في جسمك مش قادرة تتعايشي معاه وتقبليه ظبطيه لنفسك في الأول مش لحد تاني؟! إنما مش تستني فرحك وللا خطوبتك عشان تكوني جميلة!

ليه تشيلي برفان حلو وللا بلوزة جميلة لما تتجوزي؟ ليه كل حاجة هتبسطك شايلاها للجواز.. ليه أصلا فرحتك بنفسك مؤجلة؟! افرحي بنفسك من دلوقتي وشوفي انتي عايزة تبقي جميلة ازاي؟!.

وفي الآخر بقي أحب لكل واحدة انتي بجد جميلة وزي القمر من غير أي حاجة خالص! ولو عاوزة تعملي أي حاجة اعمليها من دلوقتي مش لازم تستني الفرح!...

سلام ياحلوين




الإبتساماتإخفاء