ولاء حجازي - بدون فصال





بدون فصال

بقلم: ولاء حجازي


ماما: إنزلى يا ولاء هاتيلى ٢ كيلو طماطم .
أنا : حاضر يا ماما.
أنا : بكام الطماطم لو سمحت ؟
 البائع : ب ١.٥ الكيلو
أنا : طيب عاوزه ٢ كيلو
البائع : اتفضلى
 أنا : إتفضل ال٣ جنيه
البائع : ايه ده إنتى ما بتفاصليش ؟! ، خدى نص جنيه أهو ، الكيلو ب ١.٢٥ ، أنا افتكرتك هتفاصلى عشان كده قولتلك جنيه ونص .
أنا : شكرا ، بس ماعرفش إن الطماطم بيتفاصل فيها ، ده غير إنى ما بحبش الفصال ، سلام عليكم.

**

 أنا: بكام التى شيرت ده لو سمحت ؟  
البائع: ب٢٠٠ جنيه .
أنا: طب بعد إذنك عاوزاه . اتفضل ال٢٠٠ جنيه.
وأخرج من عنده بقى وأنا حاسه إنى اتضحك عليا ، ماهو إذا كان فيه فصال فى جنيه ونص ، مش هيبقى فيه فصال فى ال٢٠٠ جنيه !

**

 أنا: ماما تعالى معايا أما اشترى لبس ليا ، عشان أنا مش باعرف أفاصل وعاوزاكى توفريلى شوية.
أنا : بكام ده ؟
البائع : ب ٣٠٠ جنيه
 . ماما : ٣٠٠ إيه ، هما ٧٥ جنيه.
 أنا( بينى وبين ماما): ياماما حرام عليكى إنتى منزله السعر للربع ! ده لو صوت فى وشك يبقى حاجه بسيطه والله!
 البائع بصوت هادى على غير المتوقع : لا والله يا مدام ماينفعش .
 قالها بهدوء إذا فيه أمل إن السعر يترفع سيكا بس برضو مش ل٣٠٠.
 ماما : طب هى ١٠٠ ، هتجيبه والا ايه ؟؟
البائع : طب هزيها شويه
أنا (بيني وبين نفسي): تهز ايه بالظبط ؟!
ماما : لأ ده اخره ومش ههز .
البائع : لأ مش هينفع .
ماما : يالا نشوفه فى مكان تانى ، هو يعنى اللى صنعه ماجابوش غير فى المحل ده!
 واحنا ماشيين يقوم ينادى علينا البائع : خلاص تعالى يا مدام ، بس خليها ١١٠ .
ماما : هى ١٠٠ مافيش غيرها
أنا (بيني وبين نفسي): يا سلام ياماما يا حمشه ، ما بتستخدمش معانا الحماشه دى
 البائع : هو واقف عليا بخسارة ، بس عشان خاطر الآنسه أنا هاديهولك زى ما انتى عاوزه
انا بينى وبين نفسى : وحياة طنط ؟!
***
 الست: بكام حزمة الجرجير؟
 البائعة: بنص جنيه
مثلا  نص جنيه ايه الاتنين بنص ، أو هتاخد منها واحده بنص بس هتمد ايديها تاخد كام عود على الحزمه، مع إنه في أي مول محترم تدخل تلاقى الحاجات بشىء وشويات وعليها السعر ، تشتريها وانت سكتم بكتم!

**

الفصال عند المصريين حاجة كده بتجرى فى دمهم ، حتى لو مكتوب على الحاجة بدون فصال ، لازم يستنصحوا يقولوا له : مش بكذا ؟؟ ، يقوم هو بكل تناكة يشاور على اليافطة اللى مكتوب عليها ( بدون فصال ) بدون ما يتكلم كلمة واحدة . ليه بنفاصل ؟؟ عشان بتصادف إنه يبيع حاجة ليا بسعر ويبيعها لغيرى بسعر مختلف، وبالتالى أى حد بيشترى مش هيحب إنه يتضحك عليه ولازم ينتصر على اللى اشترى قبله أو على الأقل يكون بنفس السعر.  بس فيه طريقة أنا باتبعها فى الشراء وهى  بكام ده ؟؟ هيقول بكذا ، فانا هقول له : بص أنا مش بفاصل قول لى اخرها كام ولو ضحكت عليا يبقى إنت وضميرك ، وأشترى الحاجة وأقول يارب لو أخد زيادة فأنا إعتبرتهم صدقة ، وخصوصا لو باشترى الحاجة دى من مكان متواضع وصاحبه فعلا يستحق الصدقة . في حاجات تانية بقى ما تستحقش غير الصدقة ، بالعكس ده لو قال لك سعر فإنت تزود بكل سرور لأن الموضوع مش مستاهل فصال ( زى حزمة الجرجير كده )، لأن دى ست قاعدة فى الشارع فى عز البرد أو الحر عشان فى آخر اليوم ترجع بعشرة أو عشرين جنية – قوت يومها يادوب!- فإحنا بنصرف شىء وشويات وعليها فى حاجات كتيرة جدا وبنطلب دليفرى وبندخل كافيهات ندفع فيها فى ساعة واحدة ، اللى الست دى بتقعد تجمعة فى يوم أو يومين . وكذلك فى موضوع الصدقة وإنت فى ميكروباص ، لو ليك ربع جنيه والسواق مش معاه فكه ، سيبهوله وخليه بنية الصدقة ( بلاش ناخده ونديه لراكب ونقول لما أسيبه لراكب أحسن ما أسيبه للسواق، لأ على فكره السواق ممكن تلاقيه محتاج ، هو الربع ممكن مش هيفرق معاه فى حاجة ، بس أقل صدقة بتفرق عند ربنا . وأخيرا بقى، هنبطل نفاصل إمتى؟؟ ولو بطلنا هل البائعين هيبطلوا يضحكوا علينا ويزودوا الأسعار؟؟ لحد إمتى هارجع لماما بحاجة شارياها وتسألنى إشتريتيها بكام ؟؟ وأقول لها بكذا ، ترد عليا : جاتك وكسه على أمك دى بتتباع  بكذا فى السوق تحت، أقوم أرد أنا برد يريحنى نفسيا وأقول: أنا أصلا عارفه أنها بكذا بس أنا إعتبرت الباقى صدقة ! لحد إمتى هحاول أقلد ماما وأنزل السعر للربع وأجرررى من البائع قبل ما اتضرب أو اتشتم . وأصلا مافيش أحلى من المحلات اللى مكتوب عليها ( بدون فصال )، دى بتريح نفسيا أى حد بيدخل يشترى منها . تقاليد وعادات مصرية أصيلة ونصب وناس بتستحل الفلوس اللى بتاخدها مع إنها أكتر من حقهم وضمير واخد أجازة لحد إمتى مانعرفش؟! ربنا  يصبرنا.
 شكرا، والسلام عليكم .

شارك المقال

فيس بوكتويترجوجل +


الإبتساماتإخفاء