ماجى مجدى - ثرثرة جنب النيل..!



مالك يا ابنى ؟!
خايف، البلد حالها ميطمنش.. عدينا مرحله البلد على حافه الهاويه.. عدينا كمان مرحله إحمد ربنا مش أحسن ما تبقى زى سوريا والعراق، تقريبا كمان سنتين وجايز أقل هناخد أخواتنا السوريين اللى عندنا ونشوف كلنا مكان للجوء.. خايف من الغلب اللى إحنا فيه والظلم اللى عايشينه.. مفيش حريه مفيش رأى بيتسمع مفيش صوت حق إلا وبيتخون مفيش صاحب علم إلا لما بيحولوه لعميل ويشوهوا صورته مفيش فنان محترم إلا وبيشطبوه من النقابه ويخوضوا فى عرضه وفى أهله بكل ما يحلو لهم ..!

من الاخر كده أى عقل بيفكر مش مسمحوله إنه يبقى موجود فى الصوره، بلدنا بتدور على الجهل و تضحك له، مفيش شعب غلبان أكتر مننا.. حقوقنا بتتسحب مننا بالتدريج .. حقوقنا مش كماليتنا.. كماليتنا، إحنا كشعب غلبان عمرنا ما عرفنا يعنى إيه كماليات اساسًا..!

كان كل طموحنا شويه حقوق، حاولنا نخلع نظام عشان نحققها ومات كتير وانجرح أكتر عشان نخلعه .. لكن الجهل كان دايمًا هو المنتصر الاخير بعد كل ثوره .. وحب بعض الفئات للعبوديه بيضيع كل خطوه مشيناها زمان وكل خطوه بنحاول نمشيها.

أنا قلقان، قلقان أتجوز في البلد دى.. جواز يعنى استقرار يعنى مرتب يكفى بيتى وابنى اللى جاى.. يعنى محتاج أحس بأمان عشان اقدر أوصل الاحساس ده لبيتى.. لكن أنا دلوقت مممكن لو شيرت صوره من أى موقع على الفيس بوك بتاعى مثلا لمجرد بسخر او بقول رأى او بنقد يتقبض عليا وميتعرفش مكانى إلا لو حبوا يعرفوا حد انا فين.. لو ماشى فى الشارع و شكلى مش عاجب الباشا الظابط يجرنى على البوكس واتمرممط واروح القسم ويتعمل عليا زى ما بيقولوا بالبلدى كده "حفله".!

هطمن ازاى على مراتى لما تخرج فى الشارع و لما تروح الشغل و انا عارف ان المتحرشين بقوا زى الرز المزروع فى أرض خصبه و محصول كل سنه الحاجه الوحيده اللى بتزيد .. يعنى إيه أخلف عيل و أعلمه مبادئ و أقوله يا حبيبى الساكت عن الحق شيطان أخرس وأوعى تسيب حقك مدام صح وأحاول اعلمه ازاى يحلم .. ولو سيبتوللمدارس والكليات يعلموه هيتعلم الجهل وأى علام هيتعلمه من ذاته هيلاقيه على أرض الواقع ويكتشف إنه مفروض عليه العيشه فى مجتمع ديكتاتورى منذ ميلاد المجتمع المصرى.

مرعوب على البلد نفسها .. إقتصادها فى النازل الجنيه المصرى داخل على مرحله تعويم .. قريب مش هيبقى لينا كمصريين أى قيمه، أكتر ما احنا قيمتنا كل يوم بتتبعتر .. بقينا من البلاد الاورنج فى السياحه يعنى الممنوع زيارتها بالنسبه للسياح إلا فى الحالات الضروريه .. منبوذين من العالم عينى عينك كده .. بسبب قله كل حاجه فى البلد و النظام الاستبدادى اللى بيحكم .. المنظومه السياسيه فى مصر فاشله لدرجه عدت فشل أى حد حكم قبل كده .. و للاسف مفيش إعتراف بكده و مكملين فى كده و كأنهم جايين واخدين عهد على نفسهم ليخربوها قبل ما يمشوا .. و للاسف كمان إنهم لاقين اللى بيطبلوا ليهم و يشجعوهم على كده و بيدوسوا على الناس اللى حواليهم فى سبيبل إن صوتهم بس هو الافضل من وجهه نظرهم .. المشكله ان احنا هنستلم البلد دى على الحديده .. مش بعيد نعيش على معونات و نبقى زى الصومال و أسوا كمان.. البلد بتروح مننا..!

 استنى كده..

وأنا ايه اللى هيزعلنى.. أنا مستقبلى مضمون .. أيوه و الله مضمون ، كمان ٤٧ سنه هتبدأ تتحقق و تتنفذ كده و أفرح بيها ، البلد هتستقر و الأمن هيبقى بزياده كمان ، الديمقراطيه هتبقى زى المايه بتتشرب كده ، ده أحنا ممكن من كترها نطلب من السلطه تحكمنا بـ حبه ديكتاتوريه ، آه ما الدلع الزياده وحش بردوا ..

دلوقتى أقدر أرد عليك و أقولك، أنا تمام..!


الإبتساماتإخفاء