ولاء حجازي - هي بتنجاناية إذا هي..!





هى بتنجانايه إذا هي.....!

بقلم: ولاء حجازي

* يحطوا صورة لواحد بدقن خفيف ومتصور النص التحتانى من وشه ومبتسم ابتسامه لذيذة ومكتوب عليها..

"بلحية إذا هو جذاب"... إيه العلاقة؟ مش جايز يكون مش معاه فلوس يحلق أو مكتئب مثلا! مش شرط كل اللى بلحيه يكونوا حلوين، لأ وإيه تلاقى الصورة لفت الفيس بوك كله.

  * صورة لبنت مديانا ضهرها وشعرها طويل ومكتوب على الصورة "شعرها طويل إذا هى جميلة"، لأ مش شرط على فكرة، مش جايز لواديتنا وشها وشوفناه نلاقيها عم جمال ... مش جميلة!.

" بتلبس كعب إذا هى أنيقة"، وحياة ربنا تلات أرباع اللى بيلبسوا كعب بيكونوا قصيرين ولابسينه غصب عنهم عشان مش حابين قصرهم - وده ما يمنعش أنهم انيقين برضه-  لكن ما علاقة الكعب بالأناقة! فيه مليون طريقة تتأنقى بيها ولا مؤاخذة -مع الاعتذار للقصيرين- هتفهموا كلامى فى آخر المقال.

* "بتلبس نظارة إذا هى ....."، بسسس اسكتوا تعالولى بقى عشان انا بالبس نظارة إذا انا كنت دحيحه لحد ما اتعميت، وخدنا ايه من الهندسة إلا قلة النظر ياخواتي.. معلش أخدت حته ليا من المقال.

* بتحب الشيكولاته إذا هى رقيقة"  طب عليا النعمه أنا مأعرف حاجه عن الرقة، بس بأعشق الشيكولاته، وفيه رجاله بشنبات بيحبوا الشيكولاته أكتر مننا،- ماحدش يسألنى هما مين عشان ماعرفهمش- بس موجودين، مش شرط يعنى بنت ورقيقه عشان تبقى بتحبها.
* "اتجوز اللى اسمها فتكات"، دى الرقة والأدب والأخلاق والذوق وهتعرف تسعدك.

* "حمادة بينام على السرير، وبياكل بصوابع إيديه وبيشرب فى الكوبايه"، آه والله، خليك زى حماده.

* "ولاء بتروح الشغل، ولاء بتساعد مامتها، ولاء بتغسل سنانها"، خليكى زى ولاء.

* "اتجوز فتاة العذراء"، يمكن مثلا عشان عذراء ولو اتجوز غيرها ما ينفعش ؟؟، ماهو لازم تكون عذراء أومال ايه، إنتم فاهمين طبعا إنهم يقصدوا الأبراج.

*إسمها (نقول مثلا خلود) "إذا هى حنينه وطيبة الدنيا فيها ومخلصة ومتربية  وبنت ناس وبتنور فى الضلمة"،ما علاقة الاسم بكل ما ذكر سابقا ؟؟!

* "ماعندهاش ولاد على الفيس بوك إذا هى محترمة، تزوجها"،ههههههههههه ، كفايه الضحكه دى بدون تعليق.

* "بتضحك كتير إذا هى ضاربه الدنيا أجدعها شوز ومنفضالها"، سيبوا كل مهموم فى حاله، أى والله مهمومين وكله فيه اللى مكفيه.

أنا بقول كفايه كده ونتكلم بقى شويه عن الناس دى، كاااام صورة على هذه الشاكله، وكل اللى اسمها خلود تعمل شير للصورة أوالبوست اللى عليه اسمها وكل اللى شعرها طويل تفرح بنفسها، وكل  اللي بتحب الشيكولاته تعمل شير لإذا هى رقيقة، وكل اللى دقنه خفيفة يعمل شير لصورة الشاب الأنيق أبو دقن خفيفة، وحمادة وولاء شغالين طول اليوم الله ينور وصفحتهم اتوزعت على الفيس بوك كله (هتلاقونى بقول فيس بوك وليس فيس فقط ، لأني لاحظت إن فيه ناس بيتضايقوا من اختصار الكلمه زى واتس كده، بيقولوا يعنى أنت خلاص مش فاضى تقول باقى الكلمة! وبصراحه عندهم حق، ليه تقول لاب وهو لابتوب وفيه فرق بين الاتنين، ماعلينا مش موضوعنا).

 المهم إن مش كل من شعرها طويل جميلة ولا كل من شعرها قصير جريئه، فيه واحدة تحب تضفر وواحدة بتزهق من تسريح شعرها، يعنى ممكن نقول أم شعر طويل بالها طويل وأم قصير ماعندهاش وقت .. أى حاجه. و مش كل من دقنه خفيفه فهو شاب وسيم . مش شرط تتجوز العذراء، فيه حوت وحلوين برضه والله (زيي مثلا، ما هو لازم اتكلم عن برجى بقى، ماهم هيوقفوا حالنا كده . ومش لازم تعملوا زى حمادة وولاء ، هم مش من أولياء الله الصالحين . ومش شرط إنكم تعملوا شير للحاجات دى علشان تعرفوا الناس بنفسكم ! الهدف من كلامى مش إنى أمنع حد إنه يعمل شير لحاجة ،لأ بالعكس، كل حد حر يعمل ما يحلوا له؛ لكن الهدف إني أقول لكل شاب  وكل فتاة (بصوت اللمبى) إن ربنا خلقنا كلنا جميلين " لقد خلقنا الإنسان فى أحسن تقويم " يعنى إنتى جميلة بعيونك البنية والزرقاء والعسلية وشعرك الطويل والقصير وبشرتك القمحية والبيضاء، ببرجك سواء حوت أو جردل أو عذراء، خليكى واثقه فى نفسك وفى خلقتك اللى ربنا خلقك عليها، وإنت كمان جميل بروحك وأخلاقك وبلحيتك أو من غيرها لو مش حاببها (بس بلاش والنبى حلقة الطبق اللى بتحطوه فوق دماغكم ده اللى انتشرت الفترة دى، وارحمونا). ومش كل حاجه تصدقوها، مش لازم توجعى رجلك وتلبسى كعب عشان شوفتى بوست بيقول إن الكعب بيدل على الأناقة، خليكى واثقة فى نفسك وإلبسى اللى تحبيه وكلى اللى تحبيه  وإوعى تعملى بالمثل إياه "كل اللى يعجبك وإلبس اللى يعجب الناس"، لأ خالص ده إنتى تاكلى وتلبسى اللى يعجبك وإوعى تحطى فى دماغك الناس، حطى ربنا وبس . وآه نبطل نعمل شير للحاجات دى.. ليه لأ ! واكتبى إنتى عن نفسك فى صفحتك، مش شرط تكون واحده باسمك تكتب عن نفسها تقومى إنتى مشيره اللى كتبته.  ماهو اللى عملت بوست العيون الزرقا، عيونها زرقا، أو الواد اللى بيحبها هو اللى عمله، واللى عملت بوست الكعب بتحب الكعب وبتمشى إكس فيه.. إمشى انتى بفلات واعملى بوست لنفسك عن الفلات.

من الآخر نبطل تقليد ونحب نفسنا ونبطل نعمل شير ونقلد ناس قاعدين فاضيين وبيلعبوا زى حمادة وولاء كده، متضايقة منهم أوى وخصوصا إن ده اسمى واسم ابن عمى مالاقوش غيرنا يعنى !

مش عارفه أختم المقال بإيه .. بس هقول لكم ، شكرا والسلام عليكم .


الإبتساماتإخفاء