أحمد عبد الغني - لسان العصفور..!




لسان العصفور ..!!

بقلم:  أحمد عبد الغني

معرفش مين اللى سمى نوع من أنواع المكرونة بالاسم دا .. لسان العصفور .. والنوع دا يعتبر أشهر أنواع المكرونة فى مصر.. وكل الأطفال فى مصر بتحبه .. وأول حاجة الأمهات بتفكر تأكلها لولادها بعد الفطام والذى منه، هذا النوع من المكرونة .. وفى مصر بيسموه  شوربة لسان العصفور .. ومعرفش ليه لازم يبقى شوربة مع أنه ممكن يبقى طاجن ؟؟ ، وليه مايتعملش مكرونة بالصلصة زى إى نوع من أنواع المكرونة .. ؟؟
كل التساؤلات دى بتيجى فى دماغى لما أجى أكل لسان العصفور اللى اتفطمت عليه وتقريبا أدمنته زى باقى الشعب المصرى .. لكن فى تساؤل تانى دايما كنت بسأله لنفسى وأنا صغير .. إحنا إزاى بناكل لسان العصفور .. طب هو العصفور بيتكلم إزاى دلوقتى ؟؟ ، وإزاى عرفنا أصلا نقطع لسان العصفور دا عشان نأكله ؟؟ ، وياترى دا لسان عصفور واحد اللى فى الطبق بتاعى ولا دا لسان مجموعة من العصافير؟؟.. وساعات كانت بتصعب على العصافير  ومقدرش أكل لسان العصفور .. وأزعل على حالهم واللى جرى ليهم .. ولكن أرجع أقول هم أكيد عملوا حاجة غلط عشان كدا قطعنا لسانهم ..أو قطعنها علشان هما بيزنوا وبيعملوا دوشة .. وساعات كنت أسمع أمهات بتهدد ولادها وتقولهم لو عملتم حاجة غلط هأقطع لكم لسانكم .. فكنت بضحك وأقول أكيد هيعملوا لسانهم زى لسان العصفور ..!!

من هنا خرجت بمبدأ أن اللى بيغلط أو اللى بيكدب بيتقطع لسانه .. ولما كبرت شفت أوروبا والدول المتقدمة والعياذ بالله بتحاسب المسئولين والوزراء لديها فعلا على زلة اللسان وعلى الكدب وعلى التصريحات الفشنك أو التصريحات الغير مسئولة ..  وترى هذه الدول أن الكلام لازم يكون موزون بدقة ويطلع بحساب من السادة المسئولين لأنهم بيمثلوا بلادهم وكمان لأنهم قدوة فى مجتمعهم فمينفعش يبقى القدوة بيكدب أو بيحرف تصريحات أو بيعمل فرقعة إعلامية .. يعنى بالبلدى كدا بيقطعوا لسان اللى يغلط ..عشان كدا الناس دى معندهاش لسان عصفور ..!!

لكن فى مصر والحمد لله وعلشان إحنا لازم نكون مختلفين تماما عن الآخرين فمحدش  من المسئولين أو الإعلاميين أو الفنانين أو الوزراء اللى هما المفروض واجهة المجتمع وكدا يعنى  بيتحاسب على كدبه ولا على زلة لسانه وتصريحاته التى تسىء للبلد قبل أن تسىء لنفسه .. عندنا وبس وحصرى الكدب والدعاية الكاذبة والتملق والتعريض بسبب وبدون سبب .. وسيل من التصريحات والأقاويل والأكاذيب اللى شغال عمال على بطال .. فهذا يشتم ذاك .. وهذا يسئ لذاك .. وواحد يقول هنصدر كلاب وواحد تانى يسب زملائه فى البرلمان وآخر يشتم معارضيه وأخرى تنطق بالأكاذيب .. وإعلامى يدافع عن زميل له كاذب ومنافق وهو يعلم ذلك ولكنه يكذب من أجله .. وواحد تانى بيشكك فى الدين والأحاديث ويقولك بجتهد ..وصحفية بتشكك فى رؤيا للأنبياء ورئيس لمؤسسة كبرى بيدافع عن اختراع وهمى لعلاج الأمراض .. وبرلمان بيخبط وبيشتم فى بعضه .. ووزير يخرج بلفظ سىء عن النبى صلى الله ليه وسلم ثم يعتذر ويقول زلة لسان .. ويزعل لما حد يقوله استقيل لأنك قدوة وكان لازم تمسك لسانك وتوزن كلامك قبل ما تنطق به .. لكنه كان متأكد أنه لن يعاقب .. فهو مثل غيره من الوزراء والمسئولين الحاليين والسابقين اللى هدوا الدنيا بتصريحاتهم ومحدش كان بيحاسبهم .. ولا بيسألهم عن زلة لسانهم .. عارفين ليه .. عشان عندنا لسان العصفور بيتقطع ويتاكل بدل من قطع لسان اللى بيغلط أو بيكدب .. لأن لو حد اتحاسب قبل كدا على تصريحاته وزلة لسانه مكانش حد عمل كدا تانى .. !!

لكن بعد عزل وزير العدل الأسبق عن تصريحاته بشأن تعيين أولاد الزبالين فى القضاء ثم عزل توفيق عكاشة من البرلمان على خلفية تصريحاته أيضا ثم حاليا عزل وإقالة وزير العدل الحالى عن تصريحاته أيضا .. وواضح أإن فى ناس تانية جايه فى السكة وهتتحاسب على أفعالها وتصريحاتها ويارب يكون منهم اللى فى بالنا .. ودا لو حصل هتبقى فعلا بشرة خير .. وساعتها ممكن يختفى لسان العصفور اللى إحنا بنعاقبه ونقطع لسانه نأكله بدل ما نعاقب المسئولين على تصريحاتهم .. !!

شارك المقال

فيس بوكتويترجوجل +


الإبتساماتإخفاء