جالا عرفان - سيد الحبايب يا ضنايا امتي!




سيد الحبايب ياضنايا امتي؟!


بقلم:  جالا عرفان

واضح إن إحنا في مارس، وواضح كمان إن عيد الأم الشهر ده، وبرضه واضح إن في إجماع علي ده. وأنا بقي من موقعي هذا بقول نعمل هُبل! بصوا أنا هفهمكوا حاجة دلوقتي؛ أبوك عمل من أوغندا في ال    Valentine’s  وييجي بقي في عيد الأم يعمل فيها جامد ويسأل هتجيب ايه لماما؟! طب ما كنت انت جبتلها الأول... يلا بقي ربنا يسامحه.
نيجي بقي للأم اللي هي أصلا محور الكلام ... يا ما افترت عليك وقالتلك ذاكر علشان تبقي دكتور.. خد بالك إنه هي أصلا اللي دبستك في الوكسة السودة اللي انت فيها دي! هدية ايه وبتاع ايه ده انت المفروض تكتبها شيكات على بياض وتبلغ عنها علشان تعرفها فايدة إنك لو كنت محامي وللا حتي ظابط كنت نفعتها أكتر.. وكمان المهنتين دول مش محتاجين كم الكتب اللي اتفحت في المذاكرة ولا المحاضرات اللي حضرتها!
فرضنا مثلا إن أمك غنية ودفعت اللي عليها وطلعت! نرجع برضه لنفس المشكلة .. هنجيب لماما ايه؟! تعمل فيها ابن ناس وتسألها اجيبلك ايه؟ تقولك مش عاوزة من وشك حاجة.. كفاية عليا الضغط والسكر!

وساعتها الأحسن بقي إنك تألف أول حاجة تيجي في دماغك؛ جو الحاجات بتاعة البيت؟ لو أمك شايفة نفسها هتقولك هو ده كان بيت أبويا وعايشة فيه لوحدي وبأجره إيجار جديد يا جزمة.. مانت عايش معايا فيه!..

شنط؟ برضه بلاش شنط علشان انت هتجيب شنطة ومرات ابنها التاني هتجيب شنطة؛ الفكرة دي بقت مستهلكة! وأصلا الحريم دي تكبر أد ما تكبر يفضل برضه هاجس "عاوزة أنقي حاجتي بنفسي" في دماغها.. هي الدماغ متركبة كده! بلاها شنط  أحسن لك!
جزم؟.. برضه منصحكش علشان لو واسعة هتقولك واسعة وهتبقي سهلة للقلع وغالبا انت أول واحد هتجربها. ولو ضيقة بقي، طول ما هي مضيقاها هتسبلك! امشي يا جزمة وحشة الجزمة.

تجيب make up تقولك انت فاكرنفسك ابن نانسي عجرم؟!
بعد التفكير وبعد ما ترجع أم ده شريط في دماغك، تلاقي بقي إن الحل الوحيد هو إنك تاخد الجنسية الأوغاندية من أبوك وتعمل نفسك من بنها! أيوا أبوك اللي هو الراجل اللي فوق اللي طنش في ال Valentine’s.
تصبح الصبح بقي يوم واحد وعشرين مارس وتتقمص دور محمود ياسين في فيلم أين عقلي، وأول ما أمك تصحى تعمل اللي تقدر عليه علشان تقنعها إننا في إبريل أصلا؛ ويا سلام بقي لو تجيبلك فسيخة  وتحاول تقتعها إن شم النسيم جه!  وتقوم بقي الست الغلبانة تقتنع وتضرب معاك فسيخ (ملحوظة، الرنجة تنفع بديل للفسيخ في حال لو أمك تنكة شوية).
ولازم برضه اليوم ده تطفي التليفزيون علشان أغاني عيد الأم الميتة دي ماتلفتش نظرها!
طول عمري عندي مشكلة مع فايزة أحمد؛ هي أصلا ازاي تغني لأمها كده وهي عايشة؟! أومال لو كانت ميتة كانت عملت فينا ايه؟! وسعاد حسني كانت عندها أغنية لكل أمهات الحيوانات؛ أنا فاكرة الكليب كويس كان كله دبابيب وقطط وكلاب أمهات.. دي حتى ماجبتش سيرة الأم الإنسانة!

نيجي بقي لأوبريت أمي ثم أمي أنا أصلا مش مقتنعة إن تامر حسني يغني لأمي.. هو ماله؟! طالما أنا مغنيتش لأمه يبقي هو كمان ميغنيش لأمي! ياريت كل واخد يخليه في أمه!

وتبقي هوية عيد الأم مجهولة ، ويبقي السادي مخترع هذا اليوم نايم في تربته مرتاح بعد مانكد علي أبونا!



الإبتساماتإخفاء