جالا عرفان - زمن الشقط الجميل!


زمن الشقط الجميل!

بقلم جالا عرفان

دلوقتي أنا مش ضد الشقط طالما هو برضا الطرفين ومتفق عليه ومتماشي مع أخلاقهم! وده طبعا عملا بمبدأ إن هما الجوز فلة ومش بيضروا حد غير نفسهم! يعني يشقط عندي أحسن ما يعاكس واحدة مش عايزة تتعاكس! أو مثلا يعملولهاgoogle maps  بما إننا عارفين إن أماكن الشقط معروفة وقربوا يحطوها علي application  وتفتح ال GPS زي Uber  و Careem كده.

بس تعالي بقي قوللي مين اللي قال إن ال Facebook بتاع واحدة عليه أمها وخالتها وولاد خالتها والجيران وعيلة العيلة والبواب ومراته وعمر سليمان الله يرحمه ويديله طولة العمر في نفس ذات اللحظة.. يبقي بتاع واحدة عايزة تتشقط؟! هل ده مكان يسمح بحاجة زي كده؟! ايه اللي أوحي لك طيب إنها داخلة تتعرف وتعمل علاقات علي ال Facebook؟!

نيجي بقي للمكان اللي ضرب الرقم القياسي في محاولات التظبيط الفاشلة! LinkedIn.. أصلا كلنا علي LinkedIn  مش زي ال Facebook خالص... عندنا ناس منعرفش عنها غير Titles وأماكن شغل وبس! وأصلا يعني إحنا عاملين  Profiles عليه عشان تبادل الخبرات العلمية أو إنه نكون أسـعـد حـظـا
ويجيلنا  شغل عن طريقه.. يعني من الآخر مفيش أي مجال للشقط أو حتي إنه يكون بيننا زمالة – شوف زمالة مش صداقة حتي -  في العالم الحقيقي! وحياة أمي وأمك يا شيخ، وحياة الأخوة، والعشرة دول، بلاش ونبي الرسايل الللي بتبعتها أول ما البنت تعملك accept  من نوعية "شكرا لقبولك إضافتي" و"أنا سعيد جدا إني بقيت في ال connections بتاعتك" أو "أنا فلان وياريت أتشرف ونبقي أصدقاء في الحقيقة وأعرفك أكتر"!  أصل بص هقولك حاجة غير إن الطريقة دي بلدي أوي يا حسين... أكيد أكيد أكيد مفيش واحدة هتعبر واحد من LinkedIn عشان  يعني ده مش ناصية Sequoia في أبو الفدا، ده بالنسبة لأي واحدة مكان أكل عيش وبس مش عشان تطلع بعريس لقطة!
 
وبالرغم من إنك ممكن تكون أصلا شبه الخرتيت الأسود وحيد القرن الإفريقي اللي انقرض ده، بس فرصك في الشقط برة LinkedIn أعلي بمراحل!.. آه والله.. اشتري مني بس واسمع الكلام!
 فين زمن الشقط الجميل؟! اللي هو إنت شمال ورايح لواحدة شمال برضه! وده غالبا بيكون في جامعة الدول، أو في شارع الهرم بعد الباريزيانا، أو في عباس العقاد عند McDonald’s.. عشان كده لا كان في مشاكل ولا ناس متضايقة ولا تسييح بال Screen shots زي الأيام دي.. كان تصنيف كده واضح وجميل وكل واحد عارف هو عاوز ايه ورايح فين وجاي منين. مش جو التوهان اللي إحنا فيه ده!  خصيمك النبي يا شيخ منك ليه انزل خد عربيتك واخصم تمن البنزين من اللي هتدفعه! بلاش بقي الاستسهال ده وهي لما تحس إنك سعيت جامد صدقني هتقدرك!

 وإحنا بقي ال مجموعة ال  anti- شقط لمّا تعتقنا لوجه الله هنقدرك برضه! روح يا شيخ ربنا يوقفلك اللي إنت عايزهم في سكتك.. عايز شقط تلاقي.. عايز ولاد حلال تلاقي! 


الإبتساماتإخفاء