عبده العتيقي - تفاصيل بتنحت في الوجع






تفاصيل بتنحت في الوجع 

عبده العتيقي 


علي القهوة ...ف نفس الشارع المُعتاد ..
بييجي الخوف علي سهوه ..يعيد من تاني ف المتعاد ..
ويحكيلك عن الماشيين ..وع الخاينين ..وعن كل اللي كان جوّاه بيتخبّي ..
وعن شوقه اللي زاد حبّه ..وعن عاشر مدينه نصر والتبّه ..وعن كوبري الوجع ف النيل ..
يطول الليل ...وصوت سومه بينخر فيه نفق للموت ..ويردم فوق حنينه الجاي ..
(انساك ياسلام ..انساك دا كلام ) وهنسي ازاي ؟! ..طبيعي ان انت مش نسّاي..
(كرهنا الدنيا والعيشه ...ياعم مصيلحي هات شيشه ..وحبّه شاي ..وعلّي الصوت )
كتير بنداري بالكلمه حاجات بانت بصوت واضح ...
ونضحك ملو افواهنا عشان دمع السنين فاضح ..ونلعن خوفنا وظروفنا وكل الجاي والرايح ..
ونلعن عُمر بيخوننا ..نخبّي الحسرة ف عيوننا ..ونلعب طاوله ع المشاريب ...
بقالك قد ايه عايش وعمر ما جالك الجرأه ف مرّه تسيب ..؟!.. قدر ونصيب ..
رصاصه ف قلب طير بتصيب ..(الطير وقع ..والخوف جدع ..تفاصيل بتنحت ف الوجع )
تمدّ اديك علي الطاوله تجرب حظك القاسي ..تهدّ ف كتفك الشيله ...
ما يمكن حُزنك الليله.. يكون ميّت من الفُرقه ونايم ع الوجع ناسي ..ويمكن شوقك المُجرم يقرر فيك يموتهم ..
ويمكن صوت صدي صوتهم 
يبطّل حبّه يوجعني ...هموت والعب ...
هتخسر...! طب وايه يعني ؟!...ومين قاللك بأنّي كُنت متعودّ علي المكسب ..
وحتي اسأل ..كلام كان نفسي اقولهولها بقالي سنين ومش عارف ..
وسايبه هناك علي المكتب ..
هكون بكدب لو اوصفلك شعوري بأني مش خايف ..ومش ندمان ...ومش دوغري ..
انا عيّل ومن صُغري ..ضعيف وجبان ..وحتي اسأل بقيت أصحابي ف الملعب ..بخاف م الدعوة تسخطني ..
بخاف م الكورة تخبطني ..واخاف م البُعد يكسرني ..
واخاف م الخوف ليكسرهم .. 
واخاف اكسبني فاخسرهم ....واخاف اخسر فبخسرني ..
واخاف للشيخ يكون غضبان ..فيدعي عليا يلعنّي ..ويلعنهم ..بخاف منّي علي خوفهم ..واخاف عن خوفي من شوفهم ..واخاف علي قلبي ليشوفهم ..بدون زينه بدون مكياج ..اكدّب نفسي ف القصّه ..واكمّل شرح ف الحصّه ...ومفهمشي ...واقول دا جنان ..
بخاف اضعف واخاف لاحتاج ..واخاف احكي ف يوم عنهم ..ف يوم عنّي ..
(ياعم فُلان ..بقالك ساعه بتفكّر .هتلعب ولا اقوم امشي ..)
تبص لناحيه المجهول ..وتلمس قلبك النسمه ..تنط قصادك الكلمه ..تخاف لتقول ..
بقالك قد ايه عايش ..سؤال بايش ...بقالك قد ايه يائس ..سؤال بائس ..
بقالك قد ايه فعلا مبطّل تحسب الايام ...كفايا كلام ..عشان فعلا ..
حروف الكلمه بتعاني ..(هتلعب ايه ؟)
بلاش تضحكله من تاني ..وتدبح بالوجع افيه ..
لو انت بجدّ مش جاني ..ومجني عليه ..فمين مسؤول ..؟!..ومين باعك ..؟!
كلام معقول ....وحلم حقيقي كان يمكن ..يطيّب كل اوجاعك ..دا لو كان عاش ..
حقيقه حقيقي موجوده ...سنين العُمر معدوده ؟؟؟
سنين العُمر كات قاسيه ..ولو كل الحاجات ناسيه ..ملامح وشّك السودة ..وطرف ايديك علي المكتب ..بتلمس فيك حنين قاتل ..لكل حكاايه ف الاوضه ..ومبتنساش ..
زمان الوحده مش سامعه ..تمدّ ايديك علي الدمعه ..
متلحقاش ..
تكمّل ضحك بالعافيه ؟..
بترمي الزهر غش ف غش ..
كأنك يعني مش ناسي ..
جميله القهوة لو كانت ...بعكس العالم القاسي ..فو وقت البرد ايد دافيه ..
ووقت الصيف نجوم صافيه ..وطول الوقت من غير وشّ ....


الإبتساماتإخفاء