شيماء المزين - ياعزيزي كلنا كندة علوش


ياعزيزي كلنا كندة علوش
شيماء المزين


من فترة شفت فيديو لرسام جنائي جابوه وجابوا نساء متطوعات قعدوهم في نفس المكان من غير ما يقدروا يشوفوا بعض ، كانوا بس سامعين بعض ، كان الرسام  يسألهم عن شكل شعرهم وعيونهم وأبرز حاجة تتلاحظ في وشهم ، ومن ردهم يرسمهم ،
في فترات الأنتظار بره كان المتطوعين قاعدين وبيتكلموا مع بعض ، فلما يدخلوا عشان يترسموا ، كان الرسام يسألهم عن شكل أي متطوعة من اللي قابلوهم بره وشكل عيونهم وتفاصيل وشوشهم ويرسم اللي قالوا عليه ،
في الأخر الرسام بيحط الرسمة اللي وصفتها لنفسها والرسمة اللي وصفها شخص أخر من المتطوعين لشكل الست دي ، ويجيب الست تتفرج ع الرسمتين بتوعها جنب بعض ، وكانت المفاجأة أن معظم الصور المرسومة بناء علي وصف النساء لنفسها هي نسخة مشوهة من نفسها  ، وجه حزين وقبيح وأكبر من سنها بكتير  ، والصورة اللي أترسمت بناء علي وصف الناس  دايماً كانت أجمل وفيها أبتسامة جميلة ووجه شابة ، وطبعا النساء بيتصدموا بصورهم الحلوة وبيتأثروا قوي وبيحسوا انهم أحلي مما تخيلوا وتوقعوا ، حتي واحدة منهم قالت : اننا بنعيش ونضيع عمرنا بنحاول نصلح حاجة حلوة ومش محتاجة تصليح أصلاً !
حياة النساء صعبة قوي ، حاسيين انهم دايماً تحت الميكروسكوب و العين عليهم وده خلي البنات والسيدات عايشين طول الوقت بتخيلات عن نفسهم وشكلهم مش حقيقية ، والعمر ضاع في جلد وتعذيب الذات علي أوهام لا وجود لها من الأساس !
الممثلة السورية كنده علوش أعترفت في برنامج جه في أحد القنوات انها مبيعجبهاش شكلها لأن فيها ديفوهات كتير ،  و أن عين من عينيها فيها شبه حول وعندها عين أكبر من التانية ، وبوقها معوج شوية وتخينة جداً !!
طبعاً المذيع أتفاجئ وقالها مفيش اي حاجة من الكلام صح وانها زي القمر ، قالتله انا للأسف دايماً شايفة نفسي كدا !
ورغم أن أعتراف كنده كان صادم لناس كتير جداً إلا ان معظم النساء كدا وأغلبهم شايفين نفسهم بشعات ومليانين ديفوهات و فوق الوزن ، مع ان ده كله أوهام  بس تقول لمين !
أنتي حلوة .. بجسمك المليان أو النحيف حلوة ، بطولك الزايد أو قصرك الزايد حلوة ، بشعرك الناعم أو الكيرلي حلوة ، 
أنتي حلوة بجمال روحك و صدقك وطيبتك ، بضحكتك اللي مالية وشك ، الجمال نسبي وزائل ومش بأيديكي ، فمتخليش حاجة تتحكم في حياتك .. أنتي روحك .. وطول ما روحك حلوة أنتي أحلي واحدة في العالم !

شارك المقال

فيس بوكتويترجوجل +


الإبتساماتإخفاء