ولاء الدين فاروق - إلي الست اللى قبل الشوفه حبتنى



إلى الست اللى قبل الشوفه حبتنى


بقلم: ولاء الدين فاروق 




إلى الست اللى جابتنى
إلى الست اللى قبل الشوفه
حبتنى
إلى الست اللى ربتنى
لو اترتب كلام الكون
ف كارت معايده
ما يكفى ..
و لو على حبى يا أمى
خطاويكى لا تلمس أرض
تخطى بس على كفى
يا أجمل كل شىء عشناه
يا أمى اصلا انتى حياه
يا شباكى على الجنه
يا دعوة خير
بأننا نعلى نتهنى
يا ضحكة قلبنا العاشق
على اديكى هنتسابق
نبوسها ..نكون حواليكى
نشوف الفرحه ف عنيكى
و لا عروسة ليلة حنه
ف يوم عيدك
بقولك إن وليدك .. بقا شاعر
و بيدور ف صندوق الكلام ياما
و يكتب حب و مشاعر
لكن عندك لقيت كل الكلام سافر
مفيش منه يعبر ع اللى جوايا
أنا جايلك أقولك بس يمايا
يدوم ربى عليكى ..
احسن حال
و راحة البال .. يطول عمرك
و تبقى و تفضلى معايا


شارك المقال

فيس بوكتويترجوجل +


الإبتساماتإخفاء