ماجى مجدى - وطن العك



وطن العك

بقلم: ماجى مجدى


سؤال بساله لنفسى كل يوم ومحيرنى اوى، زمان فى المدرسه قالولنا مصر هيا بلد الأمن و الأمان ؟! فين ! ازاى ! من انهى اتجاه !

لو حد رد عليا و قالى اه كانت ايام مبارك كده قبل ما الثورجيه يعملوا سبعه رجاله فى بعض و يخلعوه ، ردى هيبقى مباشر جدآ بـ إنه كداب جدآ لان ايام مبارك مكنتش امان الا برمى الشباب و اى معارض ف المعتقل و السجون او بـ إنهم كانوا بيخلصوا منهم ، فـ أمان ازاى بقى ووقتها الخوف كان مسيطر على اللى مبيتكلمش اكتر من اللى اتكلم و اتمرممط .

هتقولى أمان فى سنه المجلس العسكرى و لا فى عهد مرسى هقولك محصلش ، الناس كلها عارفه ايه اللى حصل و اشهرها كانت احداث محمد محمود و احداث المقطم و مذبحه الـ 74 شهيد فى بورسعيد .

هتقول أمان دلوقت و مصر بتتقدم هقولك احنا دافنينوا سوا ، أمان ايه اللى بتتكلم عنه فى وسط الهيصه اللى احنا فيها ، هتقول بسبب الارهابين هقولك نص الارهابين دول من النظام اللى ماسكينا و حاكمينا .

بقيت حاسه ان البلد دى مكتوب عليها تتسلم من عصابه لـ عصابه و المشكله ان كل عصابه جديده بتبقى اوسخ و اقذر من اللى قبلها .

كل عصابه بتفصل لـ نفسها قوانين و اعلام و للى ضددها قوانين و اعلام يهاجم و يطبل و يشوش عقل الراجل الغلبان اللى قاعد مسلم راسه للمطبلطيه .

عصابه هدفها الاول انتشار الفساد بشكل رسمى ، زياده مصالحهم و حسابتهم ، دورها مش انها تحل المشاكل دورها انها تركن فى المشاكل و تحط حواجز قدام حل المشاكل ، كل عصابه جايه تشحت على الشعب .

عايزه افهم حاجه ؟

فين التعامل مع سرقه الآثار الاخيره التابعه لمخازن سقاره أكتر من ٨٠ قطعه آثريه اتسرقت بالاضافه لإن ٤ صفح من سجل الجرد اتقطعوا و اختفوا ؟

هو التعامل مع أزمه الدولار الحاليه هيبقى إيه ؟ غير الردح !!

كل حاجه فى البلد اتضربت تقريبآ .. 

لما السيسى قال هنعمل مشروع المليون فدان .. قال من غير ما يبقى فى دراسات و لا معرفه لمنين هنجيب مصادر المياه نروى بيها المشروع ازاى .. المهم ان هو مشروع و هوبا تسلم الايادى بقى و قوم نادى على الصعيدى .. و بالتالى عشان القرض كان هيبقى من البنك الدولى فـ اترفض .. مش حرب ضد البلد لا .. عشان محدش من اللى مسؤلين عن المشروع عرفوا يقولوا المشروع هيتم ازاى من غير مايه ؟! مفيش دراسه جدوى أساسآ .. زى ايام تفريعه قناه السويس و الهيصه اللى اتعملت و مفيش دراسات عن نتايج المشروع و هل هو مهم و لا لا مجرد كلام كان بيتردد بس من غير أى دليل استراتيجى او اقتصادى .. 

مشكله الناس الغلابه من الشعب انهم لما بيحبوا حد بيعبدوه زى بالظبط لما واحده تحب واحد و متصدقش أى كلمه بتتقال عليه حتى لو فى مليون دليل بعكس لو بتكره واحد هتصدق عليه الهوا حتى لو مفيش ربع دليل .

الناس اللى بتموت ؟؟ لـ امتى ! ايوه لـ امتى الموت ؟؟ فين حق اللى بيموتوا و اللى ماتوا؟
فين العدل اللى فى البلد ؟ فين القانون اللى بيطبق على ناس و ناس ؟ 

لتالت مره اتقبض على المسؤلين عن اغتيال النائب العام مع إن فى مرتين قبل دول اتقتل ناس تحت بند إنهم ورا اغتيال النائب العام .. ازاى و بـ أى منطق .. مش عارفه الصراحه .. بس تقريبآ كل أما بيحصل دوشه يقولوا نقتل و نقول حق الشهيد رجع فالمطبلاطيه يقوموا بدورهم و تحيا مصر تلات مرات ..

يعنى إيه طفل عنده ١١ سنه يتقبض عليه و يتوجه ليه تهمتين احداث شغب و قتل واحد من الشهداء بطلق نارى فى مظاهره من سنتين يعنى كان عنده ٩ سنين يا ساده !! 

طب يعنى ايه اخر امل و اللى هو التعليم النُص كُم يخرج من التصنيف العالمى للجامعات !! و طبعآ وزير التعليم مسكتش .. قال أحسن !!

انا جايز مش عارفه اوصف و لا اكتب ، بس جوايا بركان غضب ميتوصفش .

البلد يطلق عليها دلوقت وطن العك .



الإبتساماتإخفاء