حنان العقباوي - HR على ما يجيبوا مدرس فرنساوي





HR  على ما يجيبوا مدرس فرنساوي!

بقلم: حنان العقباوي

المقال اللي فات تكلمت فيه عن الـHR  وتناكتهم وعجرفتهم مع الـ Candidates، وفي الحقيقة المقال ده لاقى استحسان ناس كتير، سواء مروا بتجارب مماثلة مع موظفين الـHR ، أو كانوا موظفين HR بذات نفسهم، بس برضو بعض من هؤلاء نبهني مشكورا إن كمان الـCandidates  عندهم مشاكل كتير وبيطلعوا عين الـHR !
في الواقع برضو أنا مؤمنة إن مفيش حد ملاك وحد شيطان طول الخط، وأي مشكلة عامةً بيكون الطرفين فيها غلطوا، بس يمكن ما كنتش لامسة المشكلة الحقيقية بنفسي غير لما ربنا كرمني -أو اختبرني- وخلاني ألعب دور الـHR  في الشغل على ما تفرج، وبقيت أكلم الناس وأعمل Interviews سواء عن طريق التليفون أو عن طريق المقابلات وجها لوجه، وفي الواقع التجربة كلها ما كانتش سيئة، بالعكس، كانت ممتعة جدا، بس ده مش موضوعنا دلوقتي، أنا بس حابة أناقش بعض السلوكيات اللي لمستها بنفسي من بعض الأشخاص، بما إني شفتها من وجهة نظر الـ HR وكانت مش مقبولة، علّ وعسى أي حد بيدور على شغل يستفيد.

أول حاجة كانت بالنسبة لي صدمة في الموضوع ده، إني أول ما أكلم حد وأقول له أنا عندي ليك Offer كذا في الحتة الفلانية هل حضرتك مهتم ولا لأ؟ ألاقي أول رد ماشي بس المرتب كام؟! عادي، إحنا كلنا بندور على الفلوس وبنهتم بيها، ولما بنغير من شغل لشغل بنركز برضه على فرق المرتب، بس أرجع أقول هو مش كل حاجة، ممكن تتحسب بطريقة تانية، مثلا، هل أنت فعلا محتاج تنقل؟ هل في تغيير إيجابي؟ هتستفيد؟ وبرضو مش غلط إنك تبص على المرتب، بس أنا كمان من وجهة نظر الشغل مش هديك مرتب إلا لو أنت فعلا تستحقه.

طيب أنت بقى يا برنس دلوقتي عديت الـ Phone Interview وحددت معاك ميعاد تيجي فيه، وإديتك كل التفاصيل، وكمان رقم التليفون عشان لو في حاجة، والميعاد كان مناسب ليك، تيجي متأخر مش خمس دقايق ولا حتى ربع ساعة، لأ أنت جاي متأخر ساعة إلا ربع يا مؤمن! بحجة إنك كنت بتدور على المكان، طيب ما أنت معاك رقم التليفون اتصل اسأل!! أنا بس هسألك سؤال، هل لو واحد صاحبك متفقين تتقابلوا وتأخر عليك الوقت ده هتقبلها؟! واحد صاحبك مش ميعاد شغل أنت أصلا وافقت عليه ووافقت إنك تيجي وقلت إنك مهتم تعرف تفاصيل أكتر!!
وكله كوم بقى وإن حضرتك ما تيجيش بعد ما ميعاد الـInterview  اتحدد ووافقت ده كوم تاني، وكمان ما تهتمش إنك تعتذر؟! لو أنت مش مهتم من الأول وافقت ليه؟!

حاجة مهمة برضه، أنت جاي Interview مش رايح النادي! إزاي يعني تيجي بكوتشي؟! ماشي الجينز أوكي أهو برضو يندرج تحت بند الـ Smart casual، بس بكوتشي؟! ليه مش مهتم بمنظرك؟!
خلاصة الكلام ده، آه أنا برضو متحاملة على الـHR  أكتر ومش موافقة على عجرفتهم وغطرستهم، بس مش معنى ده إني أوافق على تصرفات غلط بتضيع كتير من فرص شغلك، خاصة لو كنت لسه متخرج!

هقول لك كده على شوية نصايح ممكن تكون سمعتها كتير، بس صدقني هي مهمة فعلا:
 بص، حاول دايما تكون ملتزم بمواعيدك أو تروح بدري حتى عشر دقايق، واعمل حساب السكة، ما هو برضو التأخير المسموح بيكون في حدود عشر دقايق. برضو ممكن تسأل كل اللي أنت عاوزه في التليفون في حالة إن الـHR  مقالش لك كل التفاصيل بما فيها المرتب، الأسئلة مش عيب أبدا. أنت عرفت دلوقتي الوظيفة بتاعتك واسم الشركة، ليلة الـInterview  كده ادخل اقرأ أكتر عن الشركة والوظيفة ومهامها، صدقني وعن تجربة الحاجات دي بتفرق جدا جدا، وأنت بنفسك هتحس بده وأنت بتتكلم. برضو بقى من ناحية اللبس، لازم يكون شكلك كويس، مش لازمFormal  قوي عشان في دلوقتي شركات كتير مش بتلبس Formal، بس طبعا لو بنك أوهيئة معينة كده لازم تكونFormal  قوي، هو عموما في كل الأحوال إنك تروح لابسoverdressed  أفضل بكتير من إنك تكون underdressed، بس تاني ممكن تسأل عن الـDress Code  في التليفون وهما بيحددوا معاك ميعاد الـ Interview. طبعا الـInterviewer  بيكون قرأ الـCV  بتاعك كويس، بس برضو أنت لازم قبل الـInterview  تراجع الـCV  تاني كويس، عشان تفتكر الحاجات اللي بتعرف تعملها والـPositions  اللي كنت فيها، ومنها برضو تساعدك إنك تحضر إجابة معقولة على سؤال Introduce yourself. أما بالنسبة بقى لتحضير الأسئلة، يا ريت ما تحفظش، ابعد عن الحفظ، هو مش امتحان ثانوية عامة، وما فيش أصلا إجابة نموذجية، بس ممكن تكتب كام  نقطة تكون حابب تتكلم فيهم. برضو يا ريت تكون صادق قدر الإمكان وما تحطش حاجات في الـCV  أو تقول على حاجات إنك بتعرف تعملها وهي مش حقيقية! مش عيب تقول ما أعرفش بس ممكن أتعلم، لكن العيب إنك تكذب.

في النهاية برضو لازم تكون عارف إن كله رزق ونصيب، والشغل ده رزقك اللي مكتوب لك، بس مش معنى كده إنك تفضل مأنتخ ومعتمد على إنه لو نصيبك هتاخده، لأ، اجتهد واعمل اللي عليك وتوكل علي الله.

ربنا يكرمنا ويوفقنا جميعا.



شارك المقال

فيس بوكتويترجوجل +


الإبتساماتإخفاء