جالا عرفان - اتقوا الله، إنتو ما عندكوش إخوات عفاريت!!



اتقوا الله، إنتو ما عندكوش إخوات عفاريت!!

بقلم: جالا عرفان

دايما أي حد عايز يتشهر يروح في سكة الجن والعفاريت، فأنا بقى قررت أروح هناك، هو انا صغيرة؟! ده أنا أخوف العفريت شخصيا!!
نبدأ بالراحة من أول المعتقدات الخيالية، ليه الشبشب المقلوب بيجيب الفقر في حين إن جدتي لو كانت عايشة لحد دلوقتي كانت عرفت لوحدها إن داخلة Burberry أول الشهر بتجيب الفقر أكتر من الشبشب ده؟! ده أنا أصلا ذات نفسي بجيب لأهلي الفقر أكتر من محل شباشب مقلوبة!!

العنصرية اللي المجتمع بيمارسها على القطة السودة، أنت ترضى لو أنت أسود حد يقول عليك نحس؟! أو يعني في أحسن الحالات يقولوا عليك عفريت لمجرد إنك أسود؟! مع إن أنا كبني آدمة شفت ناس أنحس بكتير من القطة السودة والبومة مع بعض، ويقول لك ده أنا بيتفاءلوا بيا! يللا أهم حاجة الثقة بالنفس!!

بلاش ده كله...
فكرة التماثيل في البيت وإنها بتتلبس، طيب ما إحنا عندنا في البيت تمثال غزالة، هل لمجرد إن إحنا بنسيبها بالليل في الضلمة هنصحى نلاقيها مبرطعة في الـliving room  بقى؟!
ولا نظرية إنك ما تغنيش في الحمام، يعني أنا لو كان صوت أهلي عدل وينفع أغني في نجوم FM  ما كنتش اتأخرت وربنا، بس أعمل إيه بقى حماقي أخد مكاني في الوسط الفني! وبعدين الـSound Effect  بتاع الحمام طارق مدكور شخصيا ما يعرفش يجيبه!!
فكرة قصر البارون اللي مسكون، أنا شايفة أصلا إن كم الحفلات اللي بتتعمل هناك تطفش قبيلة من عينة عادل إمام في فيلم الإنس والجن، إلا إني برضو متأكدة إن لو في عفريت قال رأيه في الفيلم ده كان هيقول لعادل إمام "يا راجل بطّل أفورة، والله إحنا ما بنعمل كده خالص!"، ده غير بقى إن التربي في الفيلم والست أمينة رزق ويسرا بيخوفوا أكتر من العفريت!!
نيجي بقى للنجمة اللي صاحبت عفاريت مصر كلها، اللي العفريت قبل ما يركب بيقطع منها تذكرة، أيوا هي الأخت ريهام سعيد، في الحقيقة نفسي بس أسألها هي العفاريت ليه بتروح العشوائيات بس؟! ما معهوش فلوس مثلا يركب لحد القطامية هايتس ولا بالم هيلز؟!  بصراحة أنا لو عفريت، هختار أكيد حاجة منهم، مش هروح أعيش في منشية ناصر، ده إيه الفقر ده! وبعدين يقول لك أصلها حلوة فعشان كده اتلبست، بجد والله؟! يعني العفريت ساب Taylor Swift وAdriana Lima ونص Victoria’s Secret Angels  وMonica Bellucchi وScarlett Johansson علشان عجبته شيماء ولا مديحة في أرض اللوا؟! أما عفريت local  وغبي صحيح؟!


بصي يا أختي أنا مش عايزاكي تحترمي عقلي إطلاقا، أنا بس نفسي تحترمي آدمية العفاريت اللي إحنا مرمطناهم معانا ودوخناهم السبع دوخات! إيه هو إنتو ما عندكوش إخوات عفاريت؟!

شارك المقال

فيس بوكتويترجوجل +


الإبتساماتإخفاء