ماجى مجدى - مش مع بعض




 مش مع بعض 

ماجى مجدى 


لكى الله يا حلب ،كلنا مع حلب ، زيه بالظبط زى من سنتين قعدنا نقول لكى الله ي غزه شعارات فيسبوكيه و بس ، بـالإضـافه وقتها لـتغير صوره البروفايل طبعآ مع شويه أخبار متداولـه عن محاولات مصر المستمره لوقف إطلاق الـنار على غزه ، و ده اللى بيحصل حاليآ فى التعامل مع حلب ، نفس الشريط ، هيا دى بقى اللى بيقولوا عليها الوحده العربيه ؟

قـالولنا زمان فى المدارس إن الـوحده العربيه مـا هيا إلا إتحاد الـدول العربـيه سويآ .

لـكن من و أنا صغيره عـرفت إن مش هـيبقى فى وحده بين العرب إلا فى الإجتماعات اللى بـتتعرض فى التلفزيون .

إزاى مـطلوب إننا نبقى إيـد واحده كـعرب و فى نفس الوقت كل دولـه وحِـدتها مع نفسها مِش مُتكامله .

كِبرت أكتر و الموضوع بـدأ يتاكـدلى أكتر ، مبقاش مُجرد إستقصاد فى الفصل عشان مباخدش درس عند مدرس الماده ، و لا مُـجرد إن إسمى إتـكتب على السبوره مـع اللى بـيرغوا لـمُجرد إن اللى واقف على الفصل مبـيحبنيش عشان مَـرضِتش أسلفه القلم الاسود بتاعى .
كبرت لما عرفت إن الحقوق فى بلدى للجهات السياديه بس و الرفاهيه من حقهم هما بس ، حتى الطموح ليهم الأولويه عننا فيه .

فهمت أكتر لما لـقيت المجتمع كل شويه  بـيتقسم طـبقات و الفجوه ما بين كل طبقه و التانيه بـتزيد فى أقل وقت ، عكس أيام زمان كانت الطبقات مـتقسمه : غنى ، متوسط ، فقير ، لكن دلوقت بقى بين كل طبقه و التانيه أكتر من عشر طبقات ، المساواه فى الحقوق تقريبآ بـقت شِبه معدومه ، بـقى كل اللى بـيحصل عمليه واحده بـس و بـالبلدى بـتتسمى عمليه الطحن ، الشعب بيتطحن زيه زي حبوب الفول اللى بتطحن عشان يتعمل منها الطعميه ، فـ إزاى هـيبقى فى وحده بين شعوب و فى شعب بيطحن فى نفسه .

بلاش دى ، إزاى يـحصل وحده و أقل حـق من حقوق الانسان اللى هو التعليم مـقسم الناس بين مدارس حكومى وخاص و تجريبى و لغات و أزهرى ، يعنى كل حى فى وادى زى ما بيقولوا .

بلاش المدارس ، إزاى و المجتمع متقسم لفئات غير المسلم و المسيحى و اليهودى ، فجأه تحس إن الناس إتقسمت لـ أديان مُـختلفه تـحت مـُسميات غريـبه و كـأن الخارج عن رأيك مِش من دينك و لا من بلدك ، و من غير أى انسانيه كـل طرف بـيتمنى الموت للتانى ، عندك يا سيدى دلوقت ، الارهابى ، العميل ، الخاين ، الاخوان ، العسكر ، الفلول ، الحزب الوطنى ، الطابور الخامس ، العواجيز ، الثوار ،و الالتراس .... و إلخ ، وطن شعبه مستنى التانى يغلط و كأنها علاقه حب بيدوروا فيها على تلكيكه عشان زى ما بيقولوا يفركشوا .

و تحس إن كل واحد فصيل بقى فى اتجاه مُـختلف تمامآ عن التانى لـمُجرد إخـتلاق فى الاراء .

إزاى عـايز تـعمل وحده و إنتَ مفيش عدل فى بلدك ، و القانون بقى متفصل عشان يضيع حقوقنا أكتر ما يجيبها و يرجعها لينا .

أنـا كـنت صُـغيره وقت أما قـولت مـستحيل هـيبقى فـى وحده طـول مـا المُـدرسه بـتخلينا مـنلعبش فى حصه الالعاب زى الفصل اللى جنبـينا عشان بتقول علينا فصل دمه تقيل ، و لما كبرت و دخلت الجامعه إتاكدت لما الدكتوره بِـتسقط نـاس فى الدفعه عشان مش على مزاجها .

 إحنا أساسآ مِش مـع بعض و كل واحد فى إتجاه مُـختلف عـن التانى و مفيش حد قابل رأى حد ، و لا بـيحاول يـسمع لـصوت الـتانى ، مش فى السياسه بس ، ده فى كل علاقـتنا فـى الحياه ، الاب مبيسمعش ابـنه لـمُجرد إنـه فـى نـظره لـسه عـيل و إنـه يـعرف أكتر منه و هكذا .

و طـول مـا إحنا بـنتعامل مع الامور بـالطريقه دى فى كـل حـاجه بـتحصل فـى حياتنا ، مستحيل نفكر حتى نساعد بلد تانيه ، و أخـرنا هـيبقى شويه صور ننشرها و نغير حاله و ننزل فى تويتات و بس .

فـ نـصيحه من شخصى المتواضع : بـلاش تـتاجر بقضيه عشان تثبت إنك أحسن من بلاد كتير ، بلاش تتاجر  بـقضيه أيـآ كُـنت إنت مـين لـمُجرد إنك تَـبنى بـيها شعبيه عـلى حساب نـاس مستنين أى أمل يـتعلقوا بيه ، إنت مفيش فى إيدك غير إنك تدعى ليهم ، و فى سِرك كمان مِش لازم الشعب كله يعرف إنك بتدعى ، غـير كده مـتعشمش الناس بـحاجه إنت مش قدها ، لما تِـقدر تحل مشاكلك إبقى فـكر تحل مشاكل غيرك ، لـكن حـاجه معروفه إنك طول مـا عندك مشاكل هـتفضل محلك سر لـ هـتساعد شعبك و لا هـتعرف تتـحرك من مكانك و تساعد غيرك ، و شـويه كـلام الميديا ده : كلام و الكل عارف إنـه كلام و إن إحنا كمصريين بالذات الكلام أسلوب حياه فى التعامل مع الازمات عندنا ، مُجرد كلام 

و مدام مفيش فى إيدك حـاجه تتعمل غير الدعاء .. ادعى ليهم فى كل صلاه بتصليها بينك و بين ربنا و بس .



الإبتساماتإخفاء