ياسمين حسن - لما تتجوزي..!


لما تتجوزي!

ياسمين حسن


طبقا للعادات والتقاليد في مجتمعنا الجميل.. البنت لما تحب أي حاجة مهما كانت بسيطة وسهلة وتفكر تطلبها زي أي إنسان عادي تلاقي الرد الشهير الصادم "لما تتجوزي "!!..
عاوزة أسافر ..لما تتجوزي سافري مع جوزك.. ولا عاوزة الناس تقول بنت ومسافرة لوحدها !!

عاوزة اقص شعري ..لما تتجوزي قصي شعرك براحتك ..
عاوزة اسهر ..لما تتجوزي ابقي اسهري مع جوزك ..
عاوزة البس فستان ..لما تتجوزي البسي لجوزك ..

طيب..
خلينا نتكلم.. هنا، لازم نلاقي سؤال.. هو لازم اتجوز علشان يبقى عندي كارت مرور لحاجات انا شايفة أنها أبسط حقوقي في الحياة؟؟.. طيب.. بلاش.. هو اللي هتجوزه ده انسان عادي ولّا كائن طالع من الفانوس علشان يحقق كل أحلامي؟!!

نفرض هو مش بيحب السهر.. نجبر الراجل ليه؟ !!
إيه علاقته هو بطول أو لون شعري؟ !!
إيه اللي هيحصل لو سافرت وأنا مش متجوزة !!؟ 
وكمان أنا عاوزة البس فستان ليا أنا مش لحد !!

أسئلة مهمة.. لكن طبعاً مجتمعنا الجميل مش هيقبل بعض حقوقي في الحياة، وبيشارك في ده العائلة كمان.. كل الحاجات دي ممكن تتعمل من غير راجل بالمناسبة.. غير أن الراجل مش مطلوب منه يستحمل كل العقد اللي هطلعها عليه بعد الجواز . 

البنت بيفضل عندها رغبة في فعل كل شيء اتحرمت منه، وفي انتظار الراجل اللي هيحققلها كل ده.. ويبقى عندها صدمة كبيرة لو رفض ..

السفر.. والشعر.. والفستان، كل دي حاجات مش محتاجة راجل.. دي أبسط حقوقك في الحياة ..

الجواز والراجل مش علشان أبسط حقوقك خالص، بالعكس الجواز أو الارتباط عموماً مشاركة ومودة ورحمة وحاجات حلوة ملهاش علاقة خالص بكل اللي فوق ده ..


1 comments:


الإبتساماتإخفاء