حسناء الزغيبي - مدد ياحُره مدد



مدد ياحُره مدد


حسناء الزغيبي


فيها البراح ضَيق والرقصه مخنوقه..!
وعاوزِني قال ارقص والِف تَنوره..
ده الجسد زنزانه وانا روحي فيه مسجونه..
والاسم إفراج وفـ سِجنها محبوسه..
___

-أربع جِدار بـ الضِحكه مسنوده
خالين من الدفا والعَتمه مفروضه..
عَجز الجسد زنازين والشمس محجوبه..
شمس الصَبيه عِنين ضِحكاتها معلوله..
بنت فـ العشرين سابها الزمن بـ عجوبه..
بتبكي ضِحك حزين فيه لَحن وعزوبه..
صابها الكِبر فاجأه وجات وراه شَيخوخه..
والباقي حِكم فارغه بـ الدَمع مكتوبه..
___

هحكي حكاية اُم
خافِت علي جَنينها من قَبل ماتحسهُ
رفضت الادويا لجل المرض ما يمسهُ
___

اُم فـ عِز وجعها حَبت لجل الضنا ضَحت
صابها سَهم العَجز ومـ الحركه اتحرمت
تِسعّ شهور مـ الالم ولا لحظه فيهم ندمِت
___

يامه يانبع الامان ليا 
لو اقدر اشيل الوجع 
راح اشيلهُ بـ عنيا..
بكفايه هموم يامه
ده الزمن عدي 
وزرعتي صِباكي فيا..
___

بنفهم الحِكمه متأخره جداً 
لما سِم الفُراق يكون قَدر مُحكم..
كتِر شعرها الاْبيض
وكَتب مـ الهَم كام مُعجم..
___

مِدي ياحلوة رجليكي واتمشي
واجري ياخيل حُر مِتلجِم..
ده الحُريه انتِ والعَجز مِتمكِنّ..
___

ابكي ياروحها وع الوجع خَطي
لو الدموع عِلّه مكنتش السما تنَّدي..
ده البُكا نِعمه مش ضَعف بيهزِك
بيسقي الروح وللقوة بيغذي..
___

كُتر السكوت يقتِل.. رقص الطيور مُحزِن..
والضِحكه لو كِدبه.. بتكون حقيقه تحَزِن..
خلي البُكا يفضفض.. الطير مهوش مُذنِب..
عَقرب ساعات الليل.. بـ الإشتياق متحزِم..
بيعَدي فـ دواير حَنين.. وفـ الخانات مترتِب..
يامربوطه بـ الجنازير.. الحُريه كَفه بـ الصبر راح تغلِب..

- جِدار البيت بـ ضِحكِك اتسَنِد..
فـ مدد ياحُره مدد
صَبرِك هَزم سِجن المرض
رغم العَجز كُنتِ السّند..
يادافعه تمن حق النَفس
من وجعِك يامه قلبي اتولد..
ربيتي فيا الامل.. وقَلبِك فـ الدُنيا زَهد..
روحِك مسجونه فـ جسد.. حَكمهُ المرض..
___

عَلمتي روحي تطير.. رغم جِناحِك يامه اتكسر
قولتي عني حُره بِلا قيود.. وهبتيني مُفتاح القفص..
___

كام مره يامه اشتاقتي
علي الطريق تتمشي
وتشوفي نور ربنا..
ده العَتمه كات عِشتِك
ولِسّه عندِك رضا..
لساكي بتسبحي
وبتطلُبيلي الهنا..
وبتحمدي ربنا 
علي نعمتهُ فـ الضنا..
___

يااخونا صونوا النِعم
ده الحُب اصل الرحمه ..
والاُم لو دَمعت 
بتبكي السما مطره..
لو نطقت شقوق جِلدها
هتكمل الدعوة..
___

-أربع جِدار وباب ذِكري
الاسم إفراج 
وبـ سِجنها راضيه..
بتعلم ملامِحي الضِحكه
وع الابتلاء صابره..
______




 




الإبتساماتإخفاء