كامل كمال - إتجاه تاني



 - إتجاه تاني - 

بقلم: كامل كمال


سلّم جبينك للعنان
الخوف.. جبان
طول مَ اللي راكن في الضلوع
لسّابه نبض
العشق فرض
فَ امسك كتابك باليمين
واحلف يمين
عاشقك يا نبت الطيبين.  اللي صفوا
الشعرا عاشوا يوصفوا
سهم العينين الدباحين
لمس الايدين
 وانا لسه وحدي بوصِفِك
نخلات وطين
وايدين تتبّت ع الزناد
فتعيش أبد
لسه البلد
هي الجميلة اللي بيحميها الولد
والمطمع اللي غوى
والنجم لما هوى
طلع الكلام  ..لو تدخلوها ....آمنين
وإن فيها ما اتسأل
 زيتون وتين
أول مِن اللي قال( يارب... موحدين)
معشوقة لسه في العيون
بنوته .بفراقها يبات الكون حزين
ملكت نواصي الحلم ب نهار حسنها
والليل ضفاير مجدولين
والناس عطاشى مشتاقين
لو  بلّ ريق
فيضان من القول لو هسرسبله
بس اللسان تحاريق
متحاشه بالعيب كلمتي
وانا عشقي فرض
والبِت. عرض
هما اللي لسه عشقهم حوّا _ لكين_
انا عشقي أرض

شارك المقال

فيس بوكتويترجوجل +


الإبتساماتإخفاء