ياسمين حسن - كلنا بنخاف



كلنا بنخاف

بقلم: ياسمين حسن 


الخوف" كان مصطلح معبر عن حاجات ممكن تحصل في حياتك فيوصل بيك الأمر في المرحلة الأخيرة إنك خايف !!.. ده سببه حاجات كتير جداً، وطبعاً بتختلف من شخص لآخر ..لكن في حاجات كلنا بنخاف منها.. ساعات بننكر ده، لكن دي الحقيقة ..

كلنا بنخاف من "المجهول"، بس مش بنعبر عن ده، وفي ناس كتير مننا متعرفش أصلاً أن ده ممكن يكون سبب خوفها ..

كلنا بنخاف من فكرة الفراق الحقيقي، مش فراق العلاقات العاطفية اللي بيبتدي بأغنية مرسال لحبيبتي اللي عاوز يجبلها "من الياقوت كفة"، وبينتهي بأغنية شيروفوبيا "وإني محتجالك بعيدة بس محتجالك معايا".. بعد ما بنشكر مسار إجباري على بداية العلاقة ونهايتها أحب اقول إن الفراق الحقيقي زي أن حد من أهلك ربنا يختاره ..التفكير في الموضوع أصلاً بيسبب خوف مش طبيعي، لكن بيحصل، وحياتك بتكمل عادي. 

أغلبنا بيخاف من البدايات، بالرغم من أنها حلوة ومبهجة، إلا أنها هتجيب نهايات مؤلمة.. وده بيحصل برضه وبتكمل حياتك عادي .

بتخاف تتأخر على الشغل، لكن بتتأخر، واليوم بيخلص وبيعدي وبتتأخر تاني .

بتخاف محفظتك تضيع علشان الورق اللي فيها عاوز أسبوع في المصالح الحكومية ما بين دمغة ومدام عفاف، وبرضه المحفظة بتضيع. 

بتخاف على فلوسك، وبتخلص، وتبتدي تعمل فلوس تاني علشان تخلصها برضه 
بتخاف على حلمك، لدرجة انك بتنسى تحققه من كتر خوفك ..

بتخاف على أصحابك وخوفك مش بيشيل عنهم الوجع، هتصحى من النوم هتلاقي كل واحد فيهم اتورط في شئ ما .

بتخاف تهرب.. تزعل.. تتكلم ..

الخوف إحساس موجودى عندنا كلنا علشان بس يفسد الأشياء .. الخوف بيفسد كل الحاجات الحلوة 

الخوف مش هيشيل عنك مصيبة، بالعكس، هيدمر بس كل حاجة حلوة ممكن تحس بيها..
متخافوش..

شارك المقال

فيس بوكتويترجوجل +


الإبتساماتإخفاء