سحر الإمام - السبع قضايا



السبع قضايا 


بقلم: سحر الإمام 


"كلنا عايزين نحب .. كلنا نقدر نحب .. بس لازم نبقى عارفين ان تمن الحب ده هايتقسّط على كل دقيقة فعمرنا" .. دى جملة الأستاذ ماجد الكدوانى فى فيلم "هيبتا" .. عجبتنى جدا .. وكمان الأغنية .. مااااعلينا .. المهم  ..

التواصل بين البشر مش سهل .. بالعكس .. دى عمليات إرسال واستقبال رسايل بين كائنات شديدة التعقيد –اللى هو احنا-  .. ليها مستويات كتيرة جدا للفهم والترجمة الواعية واللاواعية .. وردود الأفعال كمان .. وخاصة لما تبقى الرسايل دى حب وانجذاب عاطفى .. وعشان تكون عمليات الإرسال والاستقبال دى ناجحة .. لازم نحط إدينا على أسرارها .. من واقع حياتنا وثقافتنا.  

اوعى تفتكر ان الحب هو انك تدوووب فى اللى بتحبه .. لدرجة تنسيك نفسك .. زى ما معظم الأغانى العربية بتقول .. اوعى تصدّق كلام الأغانى و تنسى نفسك .. حب بضمير وعقل .. اخلص للى بتحبه .. لكن ماتلغيش عقلك باسم الحب .. ماتخليش قلبك هو سيد التصرف .. ماتكمّلش الصورة الأولية لحبيبك من خيالك وتتجاهل النتايج المنطقية لتصرفاته .. ماتغمّيش عنيك عن أخطاء وعيوب حبيبك .. ماتبرّرهاش .. سيبه يبرّر لو غلط ... بعض التغاضى مطلوب طبعا لكن التغاضى الواعى المدروك الأسباب .. سيب كل الأمور طبيعيّة وبالتدريج لحد ماتقدر بعد كده تفهم من نفسك .. ساعتها مش هاتحتاجه يشرحلك.

أى علاقة عشان تبقى ناجحة لازم تبقى متبادلة بشكل عادل .. كذلك الحب .. زيّه زىّ أى علاقة تانية .. هات وخد .. بس الفرق إننا بندّى واحنا مش طمعانين ناخد .. بس محتاجين اللى يبيّن لنا إن الطرف التانى مستعد يدّى زى ما بياخد .. محتاجين نسمع كلام حلو .. محتاجين هديّة معبّرة عن مشاعرنا .. محتاجين ده عشان نقدر نكمّل .. أو ننهى  بشكل محترم .. يليق بالعلاقة المقدّسة دى..

التقدير ...  احتياج إنسانى زيّه زى الأكل والشرب .. مابالك بقى لما يكون من الحبيب .. أكيد هاتفرق كتير ..

" وأخاف أسرح، تفوتني لمحة منك، وم الدنيا اللي أجمل من خيالي" .. ده كلام الست .. مش عيب انى ما اتفقش معاها فى اللى بتقوله ..  من رأيي إن التركيز الشديد والمبالغة فى القرب شئ مزعج جدا .. كل واحد بيحتاج دايما لمساحته الخاصة .. اللى ماينفعش حد يخترقها كده حتى لو كان عاشق أو حبيب .. عشان العلاقة تفضل وتستمر .. ماينفعش تحاصر حبيبك فكريا .. وتعرّى أفكاره كده باسم الحب ..

على فكرة .. الحب مش تعويض عن مرارة الحياة .. انت بتحب شخص مش نص إله .. الاعتمادية العاطفية المفرطة دى مش صح أبدا .. بتموّت العلاقة .. لأنك ببساطة بتحمّل الطرف الآخر أكتر من طاقته .. وبتعرض نفسك لخيبات أمل كتير .. لازم تؤهّل نفسك انك هاتعيش حتى لو العلاقة دى انتهت لاقدر الله.

كل واحد فينا عنده طموح .. أهداف .. لازم تعرف ده .. اوعى تفتكر ان قمة الحب إنك تلغى طموحك أوتسمح لحد يحبطك  -حتى لو كان حبيبك-  أو تدوّبها فى طموح اللى بتحبه عشان ترضيه .. انت كده بترتكب غلطة عمرك .. اه والله زمبقولك .. دوّر على نفسك ولاقيها عشان تعرف تحب بضمير .. ولو بتحب بجد .. يبقىى تساعد اللى بتحبه انه يلاقى نفسه ويحقق طموحه وأهدافه -الأول-  تشحنه طاقة إيجابية كل ماتلاقيه وقف فى نص الطريق ومش عايز يكمّل وينجح  ..  عشان يعرف يحبك بجد  .. ازاى هاتحب حد تايه مش لاقى نفسه ولاحتى عارف يحدد ملامحه ..

الاحتياج .. مين فينا مابيحتاجش يحس ان فيه حد محتاجله .. شعور بيدّى ثقة من نوع تانى .. ماتنساش تحسس حبيبك انك محتاجله .. بس برضه ماتحسسهوش انك ميّت من غيره .. لا .. الاحتياج اللى اقصده هو انك تحسّسه انه أضاف طعم حلو لحياتك .. هو ده الحب .. الإضافة .. إضافة تفصيلة جميلة لكل حاجة فحياة حبيبك..

الحب يا سادة يعنى إننا ندوق طعم النجاح مع بعض .. نفرح فرحة قلب واحد .. نسيبنا من التفاصيل ونبص على الصورة كاملة .. .. نتأمل ألوانها مع بعض .. نسعد نفسنا بنفسنا عشان نعرف نسعد بعض .. 

آه .. ماتنساش تجيب ورد .. وشوكولاتة  .. لآخر يوم فى عمرك.

شارك المقال

فيس بوكتويترجوجل +


الإبتساماتإخفاء