هاجر وصفي - يجوز



يجوز 


بقلم: هاجر وصفي

يجوز يعنى ما نيش ليلى
ومانتاش قيس ف ايامه
يجوز اصلاا مافيش بينا
كلام الليل واوهامه
يجوز لو يوم تشوف ضلى
تعدى الخطوه قدامه
- وتعمل قال متعرفنيش -
ولو سألونى يوم عنك
ارد بقوتى ب " مفيش "
يجوز مكتوب لقانا ف يوم
يجوز اللحظه دى متجيش
يجوز العمر قدامنا
يجوز هنموت .. يجوز هنعيش
يجوز ميجوزش نستنى 
ونتعشم كما الدراويش
نقصقص فرو احلامنا
ونغزل ف الهوا كرانيش
يجوز العمر ما يكفيش
يجوز الحلم ما يوفيش
يجوز لكن متسألنيش 
بربك ليه ✋!!!
يجوز لو كان بايدى قرار
ما كاتش الروح تميل سنه
بحق الرحله والمشوار
وحق اللى ما كان بينا
وحق ايماننا بالاقدار
وكفر بمر لهفتنا
- وتنهيدنا على الاحلام -
بحق اللى ما فرقنا
برغم الغربه والايام
بحق سنين كتير قدام
يا عالم ايه مخبيه
وردى تملى - ايوه تمام -
وربى الأدرى بالنيه
بحق حكاوي مطويه
ف نن القلب رافضه تبوح
وحق اللى خلق قلبى
وداوى ف جرحى لو مجروح
ولمعه ف عينى من غلبى
مصاحبانى منين ما بروح
تغازل ضحكتى وتروح
وتتخبى ما بين رمشين
فتتمايل 
وتتنهد
وتسأل من زمانك فين
- وتشهق روحى من جوه -
يجوز القلب خان العين
يجوز صاب الهوا هوا
يجوز زاده البعاد ؛ قوه !
ما نيش طالباك تكونلى القيس
ولا انى اكون ف يوم ليلى
مانيش غاويه حيطان مايله
ولا رايداك فارس عصرك
لا طالبه الجاه
ولا قصرك
ولا عاوزاك يكون اصلك
واحد م الناس
كفايه تعيش اسير شعرى
مجرد حلم ع الكراس . .