حنان العقباوي - مرحب شهر الصوم مرحب

 بمناسبة شهر رمضان الكريم، قرر أعضاء ورقة ساخرون إن كل المقالات خلال الشهر ده هتدور حول رمضان، سواء كانت ذكريات أو مقالات دينية، أو ساخرة كعادتنا..

وهنفتتح سلسلة المقالات بمقالة نُشرت من قبل في كتاب "ويبقي الحنين"، دار كلمات عربية للنشر، ديسمبر 2015.

كل سنة وانتم طيبين وينعاد عليكو بخير وبصحة وسعادة وعبادات مقبولة إن شاء الله.




مرحب شهر الصوم مرحب

بقلم حنان العقباوي 


1992

السحورة: اصحي يا ست حنان وحدي الله، اصحي يا ست أم حنان وحدي الله، السحور يامؤمنين، وحدوا رب العالمين
-         أول طبق فول كل سنة وانتو طيبين ياولاد
-         وحضرتك طيب يا بابا
-         ايه ده يعني ايه سحور؟
-         بكرة أول يوم رمضان، شهر الصوم، وعشان نصوم لازم نتسحر
-         يعني ايه صوم؟
-         يعني احنا مش هناكل ولانشرب من آذان الفجر لآذان المغرب
-         ليه يعني؟
-          ربنا أمرنا بكده عشان نحس بمعاناة الفقرا اللي مش لاقيين نعمة الأكل والشرب زينا، عشان نعرف قيمتها ونقول الحمدلله
-         امم طيب... يعني أنا هصوم بكرة؟
-         لأ انتي لسة صغيرة مش السنة دي
-         ليه مصومش يعني.. مش السحورة قالت اسمي؟!!
-         طيب هنشوف 
نهار أول يوم رمضان، بعد العودة من المدرسة
-         يا حنان، يا حنان.. يللا عشان تاكلي
-         لأ أنا صايمة
-         ماهو انتي ممكن تاكلي حاجة عشان تقدري تكملي صيام
-         لأ بابا  قال انو مناكلش ولا نشرب لغاية المغرب
-         لأ ماهو ممكن ماهو السندويتش والعصير دول عادي... ممكن تكملي بعديهم صيام
-         ايه ده بجد؟
-         هضحك عليكي يعني؟
-         طيب يا ماما انتي هتاكلي معايا؟
-         لأ أنا أكلت وانتي في المدرسة
-         طيب
وتصدق حنان حيلة أمها وتاكل السندويتش وتشرب العصير عشان تقدرتكمل صيام، غالبا أصلا هي كانت بردو فطرت قبل ما تروح المدرسة!
******
1993

السحورة: اصحي يا ست حنان وحدي الله، اصحي يا ست أم حنان وحدي الله، السحور يامؤمنين، وحدوا رب العالمين
-         أول طبق فول كل سنة وانتو طيبين ياولاد
-         وحضرتك طيب يا بابا
-         حنان السنة دي انتي هتصومي يوم الأجازة من المدرسة بجد لغاية الظهر، عشان انتي كبرتي ولازم تتعودي علي الصوم
-         أيوا طبعا أنا كبرت ولازم أصوم
-         طب يللا اتسحري كويس عشان تقدري تصومي.. خلصي طبقك كلو
وتقضي حنان علي الأخضر واليابس عشان تصوم.. ده صيام يا جماعة مش هزار
*****
1994
 السحورة: اصحي يا ست حنان وحدي الله، اصحي يا ست أم حنان وحدي الله، السحور يامؤمنين، وحدوا رب العالمين
-         أول طبق فول كل سنة وانتو طيبين ياولاد
-         وحضرتك طيب يا بابا
-         حنان السنة دي كبرت وبقت شاطرة وهتصوم يوم الأجازة كله، مش لغاية الظهر زي السنة اللي فاتت
-         حاضر
****** 
1995
 السحورة: اصحي يا ست حنان وحدي الله، اصحي يا ست أم حنان وحدي الله، السحور يامؤمنين، وحدوا رب العالمين
-         أول طبق فول كل سنة وانتو طيبين ياولاد
-         وحضرتك طيب يا بابا
-         حنان السنة دي كبرت وبقت شاطرة وهتصوم يوم رمضان كله، مش  يوم الأجازةبس زي السنة اللي فاتت
-         حاضر 
******
اللي كنت بحكيه ده كان تطور رحلتي مع صيام رمضان.
رمضان دايما ليه نكهة وريحة خاصة كده بنستناها من السنة للسنة  سواء أطفال أوكبار. رمضان يعني المسحراتية أو السحورة، زي ما بحب اسميها، تيجي وتنادي عليا عشان اصحي اتسحر، رمضان يعني الفانوس بجميع أشكاله من الفانوس اللي بشمعة، للفانوس اللي فيه كتكوت، للفانوس اللي بيغني وحوي يا وحوي للفانوس اللي بيأذن، بس خلاص عشان اللي موجود دلوقتي مش فوانيس ده كلام فارغ وقبح،  رمضان يعني زينة مالية الشوارع، رمضان يعني فانوس كبير متعلق في كل مدخل عمارة، رمضان يعني تشتري حاجات حلوة وتفضل تبصلها ومستني المغرب يأذن عشان تاكلها،  رمضان يعني فوازير عمو فؤاد اللي بتيجي الساعة 3 العصر كل يوم قبل الفطار، رمضان يعني البلح بلبن والسمبوسك علي الفطار، والكنافة والقطايف وبلح الشام بعد الفطار، رمضان يعني بابا ينزل يصلي التروايح في الجامع ولما يرجع نعمل الشاي وناكل معاه الكنافة، رمضان يعني حسن مصطفي وبرنامج بدون كلام، رمضان يعني إعلانات طارق نور وسمنة الهانم أم طاقية حمرا، رمضان يعني فوازير نيللي وشريهان، رمضان يعني الكاميرا الخفية وابراهيم نصر، رمضان يعني ألف ليلة وليلة، رمضان يعني رأفت الهجان وسليم البدري والعمدة ونازج السلحدار في ليالي الحلمية، رمضان يعني نصف ربيع الآخر ومين مبيحبش فاطمة وامرأة من زمن الحب.
رمضان زمان كان ليه طعم مختلف، كانت الناس كلها تبقي صايمة مسلمين ومسيحيين ووقت الفطارالشوارع اسكت هس عشان كلنا بنفطر. تمشي في الشوارع تحس فيها باختلاف عشان رمضان. رمضان زمان كنت تحس ان هو كمان فرحان عشان جه يزورنا، كان ضيف عزيزعلي قلوبنا، مش زي دلوقتي زي ما راح زي ما جه.








الإبتساماتإخفاء