شيماء كامل - ‏مقام المش عايشين‬‬

 ‏

مقام المش عايشين‬‬

شيماء كامل 


من قلبى المحبوس فى كمانجا ..
بيدوزن ليكوا النغم الحُر
والدمع النادى على مخدة 
من نغم الصَبا ومقام الكُرد
وبفرض أنا قلبى ماهوش طاير 
ولا صوتى ف قلب العود فاير 
وبفرض إنى ماليش فى الدنيا
زى العايشين..
وماليش فى الأرض..
بياتى انا نغمى وقالوا قديم
وبدندن حزن ودمعى مقام 
والنهنهة ع النهاوند تطير 
واصلين السما لسنين قُدام
من قلبى الساكن فى ضميركم
من دَقُه تِعِب ..والسجع عقيم
مش لاقى النغم اللى يسايره
ولا لاقى حروف زى العصافير 
وبرغم الوتر اللى اتفتفت
مليون آهه
ومليون تفسير
وبرغم النغم اللى مسمع..
حد الزلزلة للمش سامعين
وبرغم النوتة ومفتاح صول ..
اللى مغير مطرحه ليمين
أنا محجوز قلبى وروحى حجاز 
بتطوف فى سوناتا من العاشقين
وحاصرت الليل فى ياليل وياعين
ومسبتش عتمته تلبسنى 
وانا جوا مقام ..المش عايشين



الإبتساماتإخفاء